HEBREOS 7 - Quichua Imbabura Bible

Melquisedec shuti runagumi, curacunataca mandajushca

1Cai Melquisedec shuti runagumi, Salem llactata jatun mandajpash, jahua pachapi tiajuj Taita Diospaj curapash cashca. Llactacunata jatun mandajcunahuan, Abraham macanajushpa mishashpa tigramujujpimi, Melquisedec runaguca tuparingapaj rishpa bendiciarca.

2Abrahambash, Melquisedec runagumanmi chungamanda shujgutaca, tucuimanda cun carca. Melquisedec shutica, pundaca: “Imatapash cashcatapacha ruraj Jatun Mandajmi” nishpami, shina nijun. Shinallata: “Salem llactata Jatun Mandajmi” nishpapash: “Casilla ali causaiguta charij Jatun Mandajmi” nishpapashmi, shina nijun.

3Melquisedec runagupaj taita mamatapash, paipaj ñaupa taitacuna maijanlla cashcatapash, pipash na yachanllu. Pai huacharishcatapash, pai huañushcatapash, pipash na villanllu. Shina cashpami, Taita Diospaj Churishnalla causaita causajujlla cura tucushca.

4Melquisedec runaguca, jatumbachamari cashca. Chaitaca yarinami canguichi. Ñucanchipaj ñaupa taita cashpapashmi, Abrahamga macanajushpa pai quichumushcamandaca, chungamanda shujguta Melquisedec runaguman cujushca.

5Leví shuti runapaj mirai puramanda curacuna tucushpaca, mandashcapi nijunshnallatami Abrahambaj miraicuna chungamanda shujgutaca, israelcunamandallata japinatapacha charin. Paicunaca, Abrahambajllata huahuacuna cashpapash, paicunapaj huauquicunamandallatami japinata charin.

6Ashtahuangarin Melquisedec shuti runaguca, na Levipaj mirai cashpapashmi, Abraham imatalla macanajushpa quichumushcataca, chungamanda shujguta japijurca. Shina japishpami Melquisedec runaguca, Dios carashapacha nishcata japinata charij Abrahamdaca bendiciashca.

7Jatunyachi tucushca runami, yangalla runaguta bendiciashca. Chaitaca yachanchipachami.

8Caipica cunambica, huañuna runacunallami chungamanda shujguta cushcata japinajun. Ashtahuangarin chai punllacunapica, causajujlla shuj runagu tiajta ricuchijuj shuj runagumi japijurca.

9Shinamandami, cashna ni ushanchi: ‘Chungamanda shujguta japijuj Leví shuti runagupaj miraicunapash Abrahammanmi, chungamanda shujguta curca’ ni ushanchimi.

10Melquisedec runagu, Abrahamda tuparingapaj rishca punllapica, Abrahambaj mirai Leví runaguca, nara huacharircachu.

11(Leví runapaj mirai curacunamandami israelcunaca, mandashca shimicunata japinajushca). Curacuna, Diospaj ñaupajman pushai ushana cajpica, Melquisedec curashna na shuj cura shamunmanllu carca. Paica, Aaronshnalla cura tucungapaca, na shamushcachu.

12Curatapash mushujta churashpami, mandashca shimicunatapash mushujta tigrachi usharin.

13Chashna nishpaca, Apunchi Jesusmandami shina nijun. Paica, shuj aillupaj miraimi cashca. Cai aillumandaca, shujllapash na altarpi servircachu.

14Ñucanchi Apunchi Jesusca, Judá aillupaj miraimandami shamushca. Chaitaca yachai ushanallami. Chai aillupaj miraicunamanda cura tucunataca, Moisesca imatallapash na villashcachu.

15Caitami paica, ashtahuan yalita ricuchishca. Melquisedec curashnalla cashpapash paica, paita ashtahuan yali ali cura cajtami ricuchishca.

16Cai miraimanda chai miraimandami cura tucunga nishpa mandashcamandaca, na cura tucushcachu. Ashtahuangarin na tucuri causaipaj ushaita charishpami, cura tucushca.

17Paipaj causaimanda villashpaca, cashnami nin:

“Canga, causaita causaicamanmi Melquisedec

curashna, curapacha cangui” nijunmi.

18Chaimandami, ñaupa mandashca shimicunaca, imapajpash na ushaita charishpa yanga tiajushcamandaca, anchuchi tucushca.

19Shinallata juyaillaguta japigrinata shuyanata Dios cushcamandami, anchuchi tucushca. Chai shuyanata cushcamandami, ñucanchica Taita Diospajman quimirircanchi. (Mandashca shimicunataca, imapash na aligutapachaca rurarcachu).

20Jesusta cura cachun churanataca, juramentushpami chashna churarca.

21Chaishuj curacunataca, napacha juramentushpa churashcachu. Ashtahuangarin Jesusca, Dios juramentushcamandami cura tucurca. Chai juramentushcapica, cashnami nijun:

“Jatun Diosca, cashna nishpami juramenturca:

‘Canga, causaita causaicamanmi Melquisedec

curashna curapacha cangui’ nishcami.

Shina nishcataca, na llaquiringachu” nijunmi.

22Shinamandami, tucuita yali aligutapacha Dios ari nijushcataca, Jesusca pactachijpacha tucurca.

23Chaishuj curacunaca, huañujlla cashpami, na shuj curalla tiai ushashpa, taucacuna cura tucunajushca.

24Ashtahuangarin Jesusca, causaita causajujlla cashpami, paica causaita causaicaman cura canga.

25Shina cashpami Jesusca, paimandalla Taita Diospajman quimirijcunataca, causaita causaicaman quishpichi ushan. Paimi, Diosta paicunamanda mañangapaca, causaita causajun.

26Curacunata mandaj chashna curami, ñucanchipaca minishtirishcapacha carca. Paica, jucha illaj, ima nalita ruranatapash na yachaj, ima mapapash illaj, juchata ruraj gentecunapaj chaupimandapash anchurishcami. Paica, jahua pacha jahuaman churai tucushcami.

27Paica, curacunata mandaj curacunashna punllandi paicunapaj juchacunamandara, chai jipaca gentecunapaj juchacunamandapash, animalcunata Diosman cushpa huañuchinataca na minishtinllu. Ashtahuangarin paica, paillata Diosman cararishpami, causaita causaipaj shuj viajella huañurca.

28Mandashca shimicunaca, curacunata mandaj tucuchunga, imatapash na rurai ushaj runacunata churachunmi mandajun. Ashtahuangarin mandashca jipaman Dios juramentushpaca, curacunata mandaj cachunga, paipaj Churita churanatami juramentushca. Paitaca, causaita causaicaman ima pandatapash na rurajtami, Diosca rurashca.