1 CRÓNICAS 21 - Quichua Imbabura Bible

Israelcunatami Davidca cuentashca(2 Sam. 24:1-25)

1Ashtahuangarin Satanasca, israelcunata fiñashpa jatarishpami, israelcunata cuentana yuyaita Davidman curca.

2Chaimandami Davidca Joab runatapash, israelcunata mandajcunatapash, cashna nirca:

—Richi, Beerseba shuti pueblomanda callarishpa, Dan shuti pueblocaman tucui israelcunata cuentanguichi. Chai jipaca, mashna tiashcata ñuca yachangapaj, ñucaman villaj shamunguichi— nircami.

3Shina nijpimi Joab runaca, cashna nirca:

—Mandaj Diosca, pai agllashca israelcunataca, shujmandalla patsajta mirachishpami ali canman. Ñuca amo, jatun mandajlla, tucui paicunaca, ¿nachu ñuca amo canda servijcuna? Shina cashpaca ñuca amo canga, ¿imapajta chashna cuentachun mandangui? Chashna rurashpaca, tucui israelcunapaj juchapajllami canga— nircami.

4Ashtahuangarin jatun mandaj mandashcami, Joab runataca yalirca. Chaimandami Joab runaca, tucui Israel llactata muyushpa cuentangapaj llujshirca. Jerusalenman pai tigramushpami, mashna israelcuna tiajta cuentashpa escribishcata Davidman curca.

5Tucui Israel llactapica, espadahuan macanajuiman llujshinallacunaca, shuj millón patsaj huaranga runacunami tiashca carca. Judá llactapipash, macanajuiman rinalla, chuscu patsaj canchis chunga huaranga runacunami tiashca carca.

6Paicuna purapica levitacunapash, Benjaminbaj miraicunapash, na cuentai tucurcachu. Jatun mandaj mandashcacunaca, Joab runapaj yuyaipica napacha ali cajpimi, paicunataca na cuentarca.

7Shinallata Taita Diospash na alicachircachu. Chaimandami, israelcunataca llaquichirca.

8Chaimandami Davidca, Taita Diosta cashna nishpa mañarca:

—Caita rurashpami, jatun juchatapacha rurashcani. Canda servij ñuca cai jatun nalita rurashcataca anchuchipailla nipanimi. Shuj juizu illaj runashnami, caitaca rurashcani— nircami.

9Shina mañajpimi, Dios ricuchishcata Davidman villaj Gad shuti runagutaca, Mandaj Diosca cashna nirca:

10“Davidpajman rishpa, cashna nigri: Mandaj Diosca cashnami nin: ‘Quimsa llaquicunatami canman ricuchini. Chai quimsamandaca, maijanhuan ñuca canda llaquichijuchun munashpapash, can agllailla’ ninmi nigri” nircami.

11Gad shuti runaguca, Davidpajman shamushpami cashna nijurca:

—Mandaj Diosca, cashnami nin:

12‘¿Quimsa huatata yarjaihuan llaquichijuchunllu munangui? Na cashpaca, ¿canda na ricunayachishpa fiñajcuna mishashpa, espadahuan huañuchingapaj catijpi, quimsa quillata pacajushpa puringapajchu munangui? Na cashpaca ¿Mandaj Diosllata angelta, tucui Israel llacta manñacunaman cachamujpi, quimsa punllata espadahuan israelcunata llaquichijuchunllu munangui? Chai llaquica, tucui israelcunata ung:uihuan ninanda llaquichinami canga. Cai quimsa llaquicunamandaca, canllata agllailla’ ninmi. Ricui, can imata nishcatami, ñucata caiman cachamujman villagrisha— nijurcami.

13Shina nijpimi Davidca, Gad shuti runataca cashna nirca:

—Ninan llaquipimari cani. Mandaj Diospaj llaquinaca, ninan jatumbacha cashcamanda, paipaj maquipi llaquichi tucungapajmi munapani. Ashtahuangarin runacunapaj maquipi urmangapaca, na munanichu— nircami.

14Shinami Mandaj Diosca, jatun ung:uita israelcunaman cachamurca. Chai ung:uihuanga, canchis chunga huaranga runacunami huañurca.

15Mandaj Diosca, Jerusalenbi causajcunata tucuchijuchunga, shuj angeltami cachamurca. Ashtahuangarin chai ángel tucuchijujta Mandaj Dios ricushpami, chai llaquita rurajushcamandaca ninanda llaquirirca. Chaimandami, tucuchij chai angeltaca: “Ña shinalla saqui, ama ashtahuan cambaj maquihuan llaquichijuichu” nirca. Mandaj Diospaj angelca, jebuseopura Ornán shuti runapaj trillana pambapimi carca.

16David vichai ricushpaca, Mandaj Diospaj angeltaca jahua pachahuan, cai pachahuan chaupipi shayajujtami ricurca. Paitaca, espadata paipaj maquipi chaririaj, Jerusalenman ricuchishpa shayajujtami ricurca. Chaimandami Davidpash, mandaj rucucunapash cungurishpa, alpaman chayajta urai cumurinajurca. Paicunaca, cañamuhuan quilparishcacunami carca.

17Davidca, Taita Diostaca cashnami nijurca:

—Gentecunata cuentachunga, ¿nachu ñuca mandarcani? Ñucallatami, juchata rurashpa jatun nalitapacha rurashcani. Ashtahuangarin llamagucunashnalla cai gentegucunaca, ¿imatata rurapashcayari? Ñucata Mandaj Taita Dioslla, cunanga ñucata, ñuca taitapaj huasi ucu purata, cambaj maquihuan llaquichihuailla. Ama can agllashca gentecunataca, cai jatun ung:uihuan llaquichipaichu— nijurcami.

18Mandaj Diospaj angelca, Gad shuti runagutami cashna nishpa mandarca: “Chai jebuseopura Ornán shuti runapaj trillana pambaman vichai rishpa: ‘Mandaj Diosman shuj altarta rurai’ ninmi nishpa, Davidman villagri” nircami.

19Chaimandami Davidca, Mandaj Diospaj shutipi, Gad shuti runa imashna villashcashnallata vichai rirca.

20Ornán shuti runaca, trigota trillajushpami tigrarishpa ricushpaca, angelta ricurca. Chai angelta ricushpami, chaipi paihuan cashca chuscundi churicunaca pacajurca.

21Trillana pambaman David chayamujujtami, Ornán shuti runaca ricurca. Chaita ricushpami Ornán shuti runaca, trillana pambamanda llujshishpa, Davidpaj ñaupajpi cungurirca.

22Chaimandami Davidca, Ornán shuti runataca cashna nirca:

—Mandaj Diosman shuj altarta shayachingapaj, trillana cai pambata jatuhuai. Gentecunata huañuchijuj ung:ui anchurichunmi, chai altarta rurangapaj munani. Mashna valijpipash, chashnapaj jatuhuailla— nircami.

23Shina nijpimi Ornán shuti runaca, Davidtaca cashna nijurca:

—Chai alpataca, cambaj cachun japipailla. Cai pambapica, can jatun mandaj ñuca amopaj imashna ali cajpipash rurapailla. Diosman animalta cushpa tucuillata rupachijuchumbash huagracunatami cusha. Yamdata rurachumbash, trillana caspicunatami cusha. Shinallata Diosman carachunga, trigotapashmi cuni. Ñucaca tucuitami carani— nijurcami.

24Shina nijpimi, jatun mandaj Davidca, Ornán shuti runataca cashna nirca:

—Chaitaca na rurashachu. Ashtahuangarin mashna valijpipash, chaitapacha cushpa randingapajmi munani. Mandaj Diosman carangapaca, cambaj cajta yanga japingapaca, na munanichu. Shinallata imahuanllapash na randishca animalta Diosman cushpa huañuchishpa tucuillata rupachingapaca, na munanichu— nircami.

25Chashna nishpami Davidca, chai pamba alpamandaca, sucta kilo chaupi yalita pezaj orota Ornán shuti runaman curca.

26Davidca, chaipimi Mandaj Diosman shuj altarta rurarca. Chai altarpimi, Diosman animalta cushpa tucuillata rupachirca. Dioshuan ali cangapaj carashcacunatapash rupachishpami, Mandaj Diosta mañarca. Pai mañajujta uyashpami, tucuillata rupachina animalta churashca altar jahuaman, ninata jahua pachamanda cachamurca.

27Chaimandami Mandaj Diosca, angeltaca rimarca. Chashna rimajpimi angelca, paipaj espadataca alichinapi alichirca.

Diospaj huasita shayachina pushtumandami villajun

28Jebuseopura Ornán shuti runapaj trillana pambapi mañajpi, Mandaj Dios uyashcata ricushpami Davidca, Diosman animalcunata cushpa chaipi huañuchirca.

29Jichushca pambapi Moisés rurachishca, Mandaj Diospaj jatun carpapash, Diosman animalta cushpa tucuillata rupachina altarpash, Gabaón shuti lomapimi carca.

30Ashtahuangarin Davidca, Taita Diosta tapungapaca, na chaiman ri usharcachu. Mandaj Diospaj ángel charijushca espadata ricushcamandami, ninanda manllashpa na chaiman ri usharca.