EZEQUIEL 20 - Quichua Imbabura Bible

Israelcunata, Taita Dios imashna llaquichishcatami villajun

1Canchis huatapaj, picha quilla chunga punllapimi, cashna tucurca: Israelcunata mandaj huaquin rucucunaca, Mandaj Diosta tapungapaj shamushpami, ñuca ñaupajpi tiarinajurca.

2Chaipimi Mandaj Diosca, cai shimicunata cashna nishpa villahuarca:

3“Huañuna aichayu runa. Israelcunata mandaj rucucunaman, cashna nishpa villai: Mandaj Jatun Diosca, cashnami nin: ‘Cangunaca, ¿ñucata tapungapajchu shamunguichi? Ñucaca causajunipachami. Canguna tapushcataca, na tigrachishachu’ ninmi Mandaj Jatun Diosca.

4Huañuna aichayu runa. Paicuna imatalla rurashcataca, ¿can ricuchingapaj munanguichu? Chaita ricuchingapaj munashpaca, paicunapaj taitacuna jatun millanayaicunata rurashcacunatara rijsichishpa,

5cashna ningui: Mandaj Jatun Diosca, cashnami nin: ‘Israelcunata agllai punllallatami, Jacobopaj huasi ucu puracunaman juramentungapaj, ñuca maquita alsarcani. Paicuna Egipto llactapi cajpillatami, paicunaman rijsirishpa, ñuca maquita alsashpa: Ñucaca, cangunata Mandaj Taita Diosmi cani nishpa juramenturcani.

6Ñuca maquita alsashpa juramentui punllapica, Egipto llactamanda llujchishpami lechepash, balun mishquipash ashtacapacha tiaj llactatami carasha nishpa juramentushca llactaman pushasha. Chai llactaca, tucui llactacunata yali juyailla llactagumi’ nircanimi.

7Cashnatapashmi nircani: ‘Chai millanayai yanga dioscunataca, tucuicunallata cangunapaj ñaupajmanda llujchishpa shitaichi. Egiptopi tiaj yanga dioscunahuanga, na mapayanachu canguichi. Ñucami, cangunata Mandaj Taita Dios cani’ nircanimi.

8Ashtahuangarin paicunaca, ñucata fiñashpami, na cazungapaj munanajurca. Chai millanayai, yanga dioscunata, paicunapaj ñaupajmanda anchuchingapaca, tucuicunallata na munanajurca. Egiptopi tiaj yanga dioscunatapash, na saquinajurcachu. Chaimandami cashna nircani: ‘Ñuca ninanda fiñarishpami, Egipto llacta chaupipillata llaquichisha nishca pactachunga, ñuca ninanda fiñarishcataca, paicunapaj jahuapimi talinshna cachamusha’ nircanimi.

9Shina nishca cashpapash, shuj llactacunapi causajcunapaj ñaupajpi, ñuca shuti ama nalicachi tucushca cachunmi, na llaquichircani. Chai llacta chaupicunapimi, paicunaca causanajurca. Chai llactacunapi causajcunapaj ñaupajpi rijsishca tucushpami israelcunataca, Egipto llactamanda llujchimurcani.

10Paicunata Egipto llactamanda llujchishpaca, jichushca pambamanmi pusharcani.

11Chaipimi, pactachinajuchun ñuca cushca shimicunata curcani. Imata rurachun ñuca mandashcacunatapashmi rijsichircani. Chaicunata pactachishpami, runaca causanga.

12Ñucahuan, paicunahuan imatapash pactachij cashcata ricuchij cachunmi, samana ñuca punllacunataca curcani. Ñucapajlla cachunga, Mandaj Dios ñucallata shicanyachin cashcata yachachumbashmi curcani.

13Ashtahuangarin israelcunaca jichushca pambapimi, ñucataca fiñashpa jariyanajurca. Pactachinajuchun ñuca cushca shimicunatapash, na cazurcachu. Imata rurachun ñuca mandashcacunatapash, yangapimi churanajurca. Chaicunata pactachij runallami causanga nishpami villarcani. Samana ñuca punllacunatapash, yangapipachami churanajurca. Chaimandami paicunataca: ‘Ñuca ninanda fiñarishcata paicunapaj jahuapi talinshna cachamushpa, jichushca pambapillata tucuchisha’ nircani.

14Ashtahuangarin shuj llacta runacuna ricushpa, ñuca shutita ama nalicachi tucushca cachunmi, na llaquichircani. Paicunataca, chai gentecuna ricujtami llujchimurcani.

15Shinallata jichushca pambapipashmi, maquita alsashpa cashna nishpa juramenturcani: ‘Lechepash, balun mishquipash, ashtacapacha tiaj llactaman, tucuita yali juyailla llactaman na pushashachu’ nircanimi.

16Paicunallatami, imata rurachun ñuca mandashcacunataca cunganajurca. Pactachinajuchun ñuca cushca shimicunatapash, na cazunajurcachu. Samana ñuca punllacunatapash yangapi churashpami, paicunapaj yanga dioscunatara yariaj causanajurca.

17Chashnacuna cajpipash ñuca ñaupajmanda quishpichishpa, na huañuchishpami, jichushca pambapipash na tucuchircani.

18Ashtahuangarin paicunapaj huahuacunamambash, jichushca pambapillatami cashna nircani: ‘Cangunapaj taitacuna yachachishcashnaca, na purinachu canguichi. Paicuna mandashcacunatapash, na pactachinachu canguichi. Paicunapaj yanga dioscunahuambash, na mapayanachu canguichi.

19Ñucami, cangunata Mandaj Taita Dios cani. Cangunaca, pactachinajuchun ñuca cushca shimicunapi nishcashna causaichi, ñuca mandashcacunata cazushpa, chaita ruraichi.

20Samana ñuca punllacunataca ñucahuan, cangunahuan ari nishcata pactachij cashcata ricuchij cachunmi, shicanyachina canguichi. Shina rurashpami ñucataca, cangunata Mandaj Taita Dios cajta yachanguichi’ nircanimi.

21Ashtahuangarin paicunapaj huahuacunapashmi, ñucata na cazunajurca. Pactachinajuchun ñuca cushca shimicunapi nishcashnaca, na causanajurcachu. Imata rurachun ñuca cushca shimicunata pactachingapaca, na cazunajurcachu. ‘Mandashcacunata pactachij runami causanga’ nircanimi. Samana ñuca punllacunatapash, yangapimi churanajurca. Chaimandami: ‘Ñuca ninanda fiñarishcataca, paicunapaj jahuapi talinshna cachamusha. Ñuca fiñarishcataca, jichushca pambapi paicunata llaquichishpa pactachingapajmi, chashna cachamusha’ nircani.

22Ashtahuangarin, shuj llactapi causajcuna ricushpa ñuca shutita ama nalicachishpa rimanajuchunmi, paicunataca na llaquichircani. Paicunataca, chai gentecuna ricujtami llujchimurcani.

23Shinallata jichushca pambapillatami, paicunataca tucui cai pachapi tiaj llactacunaman chajchushpa, caita chaita cachasha nishpa, maquita alsashpa juramenturcani.

24Paicunaca, imata rurachun ñuca mandashcacunataca na pactachinajurcachu. Ashtahuangarin pactachinajuchun ñuca cushcapi nishcatapashmi cunganajurca. Samana ñuca punllacunatapash, yangapi churashpami, paicunapaj taitacunapaj yanga dioscunatara ricurianajurca.

25Chaimandami ñucapash, nalita mandajuj shimicunata paicunaman curcani. Chai mandashcacunata rurashpaca, na causai ushachunmi curcani.

26Tucui punda churicunata, chai dioscunaman carashpa rupachinajujpimi, paicuna imatalla ñucaman caranacunatapash mapayachircani. Ñucaca, paicunata llaquichishpa, Mandaj Dios cajta rijsichingapajmi, chashna rurarcani.

27Huañuna aichayu runa. Chashna cashcamanda israelcunaman, cashna nishpa villai: Mandaj Jatun Diosca, cashnami nin: ‘Cangunapaj taitacunaca, ñucata rimashpa pingaichishca jahuapashmi, ñucataca nalicachinajurca.

28Cangunaman carashapachami nishpa, ñuca maquita alsashpa juramentushca llactamanmi pushamurcani. Chai llactaman pushamujpica, chaipi tiaj jatun lomacunata, fanga junda quirucunata ricushpami, chaipi animalcunata carashpa huañuchinajurca. Ñuca na ricunayachishcatami, chaicunapica cunajurca. Shinallata mishquilla ashnajuj inciensotapash, chaipimi cushnichinajurca. Chaipimi, talina vinotapash talinajurca’ ninmi nishpa villai.

29Chaita ricushpami, ñucaca: ‘Lomacunapi tiaj altarcunaca, ¿ima cajpita ringuichi?’ nishpa tapurcani. Chai altarcunaca, cunan punllacamanmi Bama shutihuan tiajun.

30Shina cashcamanda israelcunataca, cashna ningui: Mandaj Jatun Diosca, cashnami nin: ‘Cangunapash, cangunapaj taitacunashnallatami nalita rurashpa mapayarcanguichi. Millanayai dioscunata catishpami huainayarcanguichi.

31Cangunaca, imatalla caranacunatapash carashpa, cangunapaj churicunatapash cangunapaj tucui yanga dioscunaman carashpa rupachishpami, cunangaman ninanda mapayashca causanguichi. Israelcunalla, ¿chashna cajpitachu canguna tapujpica tigrachishalla? Ñucaca causajunipachami, canguna tapushcataca napacha tigrachishachu’ ninmi Mandaj Jatun Diosca ningui.

32Canguna yarishcashnaca, na cangachu. Cangunaca, cashnami ninajunguichi: ‘Shuj llactacunapi causajcunashna cashunchi. Cai pachapi causanajuj caishuj gentecunashna caspita, rumita servishpa causashunchi’ ninguichimi.

33Mandaj Jatun Dios ñucaca causajunipachami. Ñucami, cashna nini: Shinlli maquihuan, rigrata chutashpami, ñuca fiñarishcata talinshna cachamushpa, cangunataca mandasha.

34Gentecunapaj chaupimanda llujchimushpami, shuj llactacunapi caipi chaipi causanajujtami shinlli maquihuan, ñuca rigrata chutashpa, ñuca fiñarishcata talinshna cachamushpa tandachimusha.

35Jichushca pambapishna causanajuj gentecunapajman pushashpami, cangunahuanga ñavi ñavi chimbapurashun.

36Imashnami Egipto llactapi tiaj jichushca pambapi cangunapaj taitacunahuan chimbapurarcani, chashnallatami cangunahuambash chimbapurasha. Mandaj Jatun Dios ñucami, chashna nini.

37Cangunataca, varahuan cuentashpami yalichisha. Ñucahuan ari ninajushcata, aliguta pactachishpa causachunmi churasha.

38Canguna puramandaca, ñucata na cazujcunatapash, jariyajcunatapashmi shicanyachisha. Shuj llactapi causanajujpipashmi llujchimusha. Ashtahuangarin paicunaca, Israel llactaman na yaicungachu. Shina rurajpimi ñucataca, Mandaj Dios cajta yachanguichi.

39Israelcunalla, cangunata Mandaj Jatun Dios ñucallatami, cashna nini: Canguna ñucata na cazungapaj munashpaca, cangunapaj yanga dioscunata catishpa, tucuicuna servishpa causaichilla. Ashtahuangarin jucha illaj ñuca shutitaca, imata carashcacunahuambash, cangunapaj yanga dioscunahuambash, na ashtahuan yangapi churanachu canguichi.

40Mandaj Jatun Dios ñucallatami, cashna nini: Ashtahuangarin Israel llactapi tiaj ñucapajlla urcupi, jatun urcupimi, tucui israelcunaca ñucata servinajunga. Chai llactapica, tucui paicunatami servinajunga. Chapimi, paicunataca chasquisha. Chaipimi, ñucaman imatalla caranacunata carachumbash, punda fucushca granocunata carachumbash, ñucapajlla cachun tucui shicanyachishcacunata carachumbash mañasha.

41Gentecunapaj chaupimanda llujchimushpa, shuj llactacunapi caipi chaipi causanajushcamanda cangunata tandachimushca jipaca, mishquillagu ashnajuj inciensotashnami chasquisha. Cangunahuan alita rurashcamandami, shuj llactacunapi causajcunapaj ñaupajpica, jucha illaj ricurisha.

42Israel llactaman pushamujpimi, ñucataca Mandaj Dios cajta yachanguichi. Chai llactatami, cangunapaj ñaupa taitacunaman carashapachami nishpa, ñuca maquita alsashpa juramenturcani.

43Chai llactapi cashpami, canguna imashna causanajushcata imata rurashpa mapayashcatapash yaringuichi. Shinamandami, canguna rurashca tucui juchacunataca, cangunallata millanayachinguichi.

44Israelcunalla, ñucaca ñuca shutita juyaimanda, canguna nali causanajushcamandapash, jatun nalita ruranajushcamandapash llaquichina cashcashnaca, na llaquichijpimi ñucataca, Mandaj Dios cajta yachanguichi” ninmi Mandaj Jatun Diosca.

Neguev llactata llaquichinatami villashca

45Mandaj Diosca, cai shimicunatami cashna nishpa villahuarca:

46“Huañuna aichayu runa. Cambaj ñavihuan urai ladoman ricushpa, Neguev pambapi tiaj bosqueta llaquichinata villai.

47Neguev pambapi tiaj bosquetaca, cashna ningui: Mandaj Diospaj shimita uyaichi. Mandaj Jatun Diosca, cashnami nin: ‘Ricui, ñucami cambica ninata japichini. Chai ninami, cambi tiaj verde quirucunatapash, chaquishca quirucunatapash, tucuilla rupachishpa chingachinga. Chai ninaca, napacha huañungachu, ashtahuangarin ura ladomanda, jahua ladomanda ricunajuj tucui gentecunapaj ñavitami rupachinga.

48Mandaj Dios ñucallata, chai ninata japichishcataca, tucuicunami ricunajunga. Chai ninaca, napacha huañungachu’ nishpa villai” nihuarcami.

49Shina nijpimi ñucaca, cashna nircani: “¡Aij, Mandaj Jatun Dioslla! Paicunaca, ñucataca cashnami ninajun: ‘Cai runaca, chimbapurana parlocunatallami parlan’ ninajunmi” nircanimi.