HECHOS 26 - Quichua Imbabura Bible

Pabloca, cacharihuachun yashpami Agripa shuti mandajman villashca

1Chai jipami Agripa shuti mandajca, Pablotaca:

—Ñucami, candaca villailla nini— nirca.

Shina nijpimi, cacharihuachun yashpa Pabloca, maquita chutashpa, cashna villai callarirca:

2—Judea llacta runacuna imatapash nishpa juchachishcatami cunanga, cacharihuachun yashpa Agripa shuti quiquin jatun mandajman cushijushpa villagrini.

3Ashtahuambachaca, Judea llacta runacuna imata rurashpa causajtapash, imata ninajushcatapash, canllata tucuita alimi yachapangui. Chaimandami ama ñapash fiñarishpa, ñuca villajujta uyapai nipani.

Pabloca, pai imashna causashcatapashmi villajushca

4Huambra cashcamandapacha, ñuca llactapi, Jerusalenbi ñuca imashna causashcataca, Judea llactapi causajcunapash, tucuillami alipacha yachahuan.

5Callarimandapachami fariseopura carcani. Shina cashpami, ñucanchi imata crishcatapash, aligutapacha tucuita pactachini. Canshna cajtaca, paicunallata alimi yachahuan. Caicunata villangapaj munashpaca, villachunlla.

6‘Huañushcacunataca causachishapachami’ nishpami, ñucanchipaj ñaupa taitacunaman, Taita Diosca nijushca. Shina nishcata pactachinatami, cushijushpa shuyajuni. Chaimandami, imatalla rurashcata ricuchingapaj cayai tucushcani.

7Diosca, causachishapacha nishcataca pactachinga nishpami, ñucanchi chunga ishcai aillu puracuna shuyanajunchi. Shina cashpami, paicunapash tutandi, punllandi Taita Diosta servinajun. Ñucapash, chaitami cushijushpa shuyajuni. Jatun mandaj Agripa. Judea llacta runacunaca, chaimandallami cashna juchachihuan.

8¡Imata! ¿Taita Dios huañushcacunata causachinataca, canguna purapica nachu cringuichi?

Crijcunata llaquichishpa purishcatami, Pabloca villashca

9Nazaret pueblomanda Jesusta crijcunataca, ima nalicunatapash rurashpami llaquichina cani yarcanimi.

10Shinami Jerusalenbipash llaquichircani. Chashna llaquichingapaca, curacunata mandajcunatami, ushaita mañarcani. Paicuna cujpimi, Diospajlla causajcunataca, ashtacacunatapacha prezuna huasiman apachun mandan carcani. Shinallata huañuchinajujpipash, alitami ruranguichi nijunmi carcani.

11Paicuna crishcata saquishami nichunmi, tandanajuj huasicunapica, maipi cashpapash ninanda llaquichijurcani. Paicunahuanga, ninandapacha fiñarishca cashpami, caru llactacunamambash rishpa, chai pueblocunapipash catiriashpa llaquichishpa purijurcani.

Imashna crishcatapash Pabloca, cutinmi villashca(Hech. 9:1-19; 22:6-16)

12Chashna llaquichingapaj yariajlla cashpami, curacunata mandajcuna ushaita carashpa cachajpi, Damasco shuti puebloman rijurcani.

13Jatun mandajlla. Ña chaupi punlla cajpimi, ñanda rinajushpaca, jahua pachamanda micha, inditapash yali punchapamba shitamujta ricurcani. Chai michami ñucatapash, ñanda ñucahuan rinajujcunatapash chaupipi churarca.

14Shina cajpi alpaman tucuilla urmashca cashpami, hebreo rimaipi cashna nishpa rimajta uyarcani: ‘Saulo, Saulo, ¿imamandata ñucata catiriashpa llaquichihuangui? Canllatami, huagrata tujsina buyapi huashaman jaitashpa chugrijunshna, ninan llaquita apagringui’ nijtami uyarcani.

15Shina nijpica: ‘¿Pita capangui, Taitalla?’ nircanimi. Shina nijpimi Apunchi Jesusca, cashna nihuarca: ‘Can catiriashpa llaquichijuj Jesusmari cani.

16Cunanga jatarilla. Cunambi imata ricushcata, jipaman imata ricunatapash villashpa, ñucapajta rurangui ninimi. Chaipajmi cunanga, canman ricurishcani.

17Cambaj llactapura gentecunaman, na israelcunamambash villachunmi, candaca cachagrini. Paicuna llaquichingapaj munajpipash, candaca ñucami cacharichisha.

18Paicunaca, Satanás mandajujpimi, yana yana tutapishna causanajun. Paicunataca, canmi ñavita pascanshna michata ricushpa, Taita Diosta catichun yachachingui. Paicunaca, ñucata crishpami, juchacunata anchuchi tucunga. Shina cashpami paipajlla tucushcacunahuan, Dios carashapachami nishcataca japinajunga’ nihuarcami.

Muscuipishna ricurishcataca cazurcanimi nishpami, Pabloca villashca

19Jatun mandaj Agripa. Chaimandami, muscuipishna jahua pachamanda ñucaman ricurishcataca, imatapash na nishpa cazurcani.

20Shina cashpami, Damasco shuti pueblopira villai callarircani. Chai jipami, Jerusalenbipash, tucui Judea llactapipash, shuj llactacunapi causanajuj na israelcunamambash, cashna nishpa villajurcani: ‘Taita Diospajman llaquirishpa tigrarinami canguichi. Nalita rurashpa causajushcata saquishpa, aligutami causana canguichi’ nishpami villajurcani.

21Shina villajpimi, Judea llacta runacuna ñucata Diospaj huasipi japishpaca, huañuchingapaj munarca.

22Ashtahuangarin ñucataca, Taita Dios cuidajujpillami, cunangaman catijushcani. Shina cashpami, yangalla gentecunaman, jatungunamambash villajuni. Dios ima nishcata villajcunapash, Moisespash ñami jipaman ima tucunatapash villashca. Chaitallami cashna nishpa villajuni:

23‘Quishpichij Cristoca, huañuchi tucushpapash, huañushcacunapaj chaupimanda pundami causarina carca. Israelcunaman, na israelcunamambash, paillata michashna cajta villangapajmi, causarina carca’ ninajushcami— nijurcami.

Agripa shuti runa crichunmi, Pabloca villashca

24Cacharihuachun yashpa Pablo cashna villajujpimi Festo shuti runaca, cashna nishpa ninanda caparirca:

—Pabloca, juizu illajmari tucujungui. Canga, ninanda yachajushca cashpami, juizu illajman tigrashcangui— nircami.

25Shina nijpimi Pabloca, cashna nirca:

—Ninanda alicachi tucushca mandaj Festo runalla. Juizu illajmandaca, na cashna nijunichu. Ashtahuangarin na llullashpami, aliguta yarishpa villajuni.

26Juchucunapica, maipipash na chashna tucushcachu. Chaitaca, jatun mandajpash alimi yachapan. Shina cajpimi na manllashpa, paipaj ñaupajpi cai shimicunataca villajuni.

27¿Dios ima nishcata villajcuna villashcataca cringuichu, jatun mandaj Agripa? Paicuna villashcataca, cambash cringui yanimi— nircami.

28Shina nijpimi, Pablotaca:

—Ashamandami ñucataca, Cristota catichun crichihuangui— nirca.

29Shina nijpimi Pabloca, cashna nirca:

—Ashamandalla crijpi, na crijpipash, canda ñucashna crij cachun, Taita Dios munashcanman yanimi. Shinallata caipi tucuilla ñucata uyajcunatapash, crij cachun yanimi. Ñucashna cadenahuan huatai tucuchunllami na munani— nircami.

30Shina tucuita Pablo nijpimi, jatun mandaj Agripa shuti mandajca, Festo shuti mandaj runandi, Berenice shuti huarmindi, chaipi tianajuj gentecunandi jatarirca.

31Chai ucumanda llujshishpaca, paicuna purallami cashna nishpa parlarinajurca:

—Huañuchi tucungapajpash, prezuna huasipi churai tucungapajpash, cai runaca ima nalitapash na rurashcachu cashca— ninajurcami.

32Shina parlarishpami Agripa shuti mandajca, Festo shuti mandajta cashna nirca:

—Chai runaca: ‘Jatun mandaj Cesarmi, ñucataca tapuchihuanga’ nircami. Na shina nishca cajpica, cacharimanllami carcani— nircami.