EZEQUIEL 34 - Quichua Imbabura Bible

Israelcunata michijcunata llaquichinata villashcami

1Mandaj Diosca cai shimicunatami, cashna nishpa villahuarca:

2“Huañuna aichayu runa. Israelcunata michijcunata fiñashpa llaquichinata villai. Cashna nishpa chai michijcunaman villangui: Mandaj Jatun Diosca, cashnami nin: ‘Israelcunata michijcunalla, ¡aij imachari tucunguichi! Cangunaca, cangunallatamari michirinajunguichi. Michijcunaca, ¿nachu llamacunata michin?

3Cangunaca, virataca micunajunguichimi, milmataca churajunatami ruranguichi. Virayashca llamataca, umata fitishpami huañuchinguichi. Ashtahuangarin caishuj llamacunataca, na michishpami saquinguichi.

4Irquilla llamacunatapash, na shinllichishpami saquircanguichi. Huañujuj llamagutapash, na jambishpami saquircanguichi. Chaqui faquitapash, na huatachishpami saquircanguichi. Caita chaita purinajujpica, corralpipash na tandachishpami saquircanguichi. Chingajpipash, na mascanllu carcanguichi. Ashtahuangarin ninandapacha llaquichishpami, mandashpa charircanguichi.

5Paicunaca michij illaimandami, pandashpa caita chaita purinajurca. Shinamandami, sachapi causaj tucui animalcunapi japi tucushpa micui tucunajurca. Caita chaitami rinajurca.

6Ñuca llamacunaca chingashcami, tucui urcucunata, tucui lomacunata purinajurca. Ñuca llamacunaca cai pachapica, caita chaitami purinajurca. Paicunataca pipash na mascarcachu, paicunamandaca pipash na tapurcachu.

7Shina cashcamanda michijcunalla, Mandaj Dios imatalla nishcata uyaichi:

8Mandaj Jatun Dios ñucami, cashna nini: Ñucaca causajunipachami. Ñuca llamacunataca, michij illajpimi shuhuanajurca. Sachapi tiaj tucui millai animalcunami, japishpa micunajurca. Ñuca llamacunataca, ñuca michijcunapash na mascagrircachu. Ashtahuangarin chai michijcunaca, pai purallata michirishpami, ñuca llamacunataca napacha michinajurca ninimi.

9Shina cashcamanda michijcunalla, Mandaj Dios ñuca imatalla nishcata uyaichi.

10Mandaj Jatun Dios ñucami, cashna nini: Ricuichi, michijcunahuanga ninanda fiñarishcami cani. Ñuca llamacunataca, chai michijcunapaj maquimandami mañasha. Llamacunata michinataca saquichishami. Michijcunapash, na ashtahuan paicunallata michirinajungachu. Ashtahuangarin ñuca llamacunataca, paicunapaj shimimanda cacharichishami. Paicuna micunajuchunga, na ashtahuan saquishachu ninimi.

11Mandaj Jatun Dios ñucami, cashna nini: Ricuichi ñuca, ñucallatami ñuca llamacunataca mascangapaj rishpa rijsisha.

12Imashnami michij runaca, caita chaita cachashca llama puracunapi paipaj llamacunata rijsin, chashnallatami ñucapash ñuca llamacunataca rijsisha. Fuyulla junda, yana yana punllapi caita chaita cachashca pushtucunamandami llujchimusha.

13Ñucami paicunataca, shuj gentecunamanda llujchimushpa, shuj llactacunamanda tandachimusha. Paicunataca, paicunapajpacha llactaman pushamushpami, Israel llacta urcucunapi, jatun yacu manñacunapi michisha. Chai llactapica, gentecuna causaj tucui pushtucunapimi michisha.

14Ali jihuacunapimi michisha. Paicunataca, Israel llacta jatun urcucunapimi tandachisha. Chaipimi, ali corralpi puñunajunga. Israel llactapi tiaj urcucunapica, juyailla verde ali jihuacunata micushpami purinajunga.

15Ñuca llamacunataca, ñucallatami michisha. Paicuna tandanajuna pushtutapash, ñucami carasha. Mandaj Jatun Dios ñucami, chashna nini.

16Caita chaita rishpa chingashca purijujtapash ñuca mascashpami, corralman tigrachimusha. Chaqui faquitapash huatachishpami, irquilla llamatapash shinllichisha. Ashtahuangarin virayashca llamata, ninan shinlli llamataca tucuchishami. Imatapash cashcatapacha rurashpami michisha.

17Ashtahuangarin ñuca llamacunalla, cangunamandaca Mandaj Jatun Dios ñucallatami, cashna nini: Ricuichi, ñucami llamacunataca llamapura, jari llamacunataca, jari chivocunahuan agllashpa, canguna imatalla rurashcata ricuchisha.

18Cangunaca, ali jihuacunata micunajushpapash, chai jihua puchushcataca, chaquihuan sarushpami mapayachinguichi. Punchalla ali yacuta ufiashpapash chaquihuan sarushpami, chai yacu puchushcataca mapayachinguichi. Shina rurashpapash, ¿imapash na canllu yashpachu puringuichi?

19Ñuca llamacunaca, canguna sarushca jihuatami micunajun. Canguna sarushpa mapayachishca yacutami ufianajun.

20Chaimandami Mandaj Jatun Dios ñucaca, cashna nini: Ricuichi, virayashca llama, irquilla llama imatalla rurashcataca, ñucami ricuchisha.

21Cangunallatami, chai irquilla llamacunataca lado vijsahuan, rigrahuan t'angashpa shitarcanguichi. Shinallata tucui irquilla llamacunatami, cangunapaj cachucunahuan tuparcanguichi. Caita chaita llujchishpa cachangacamanmi, chashna rurarcanguichi.

22Ñuca llamacunataca, ñucami quishpichisha. Na cutin shuhuashpa apanajungachu. Llamacunataca, llamapura tandachishpami, imatalla rurashcata ricuchisha.

23Shinallata paicunata michichunga, shuj michijtami churasha. Paimi michinga. Ñucata servij Davidta churajpimi, paica llamacunata michij canga.

24Mandaj Dios ñucami, paicunapaj Taita Dios casha. Ñucata servij Davidca, paicunata mandajmi canga. Mandaj Dios ñucami, chashna nircani.

25Paicunahuanga, casilla ali causai tiachunmi ari nishpa callarichisha. Cai llactamandaca, millai animalcunatapash anchuchishami. Jichushca pambacunapipash, imatapash na manllashpami causanajunga. Bosque ucucunapimi puñunajunga.

26Paicunatapash, muyundi ñuca lomacunatapashmi bendiciasha. Tamiana punllacunapimi, tamiatapash cachamusha. Chai tamiaca, bendiciashca tamiami canga.

27Pambapi yurapash, alimi fucunga. Alpapipash, ali granotami fucunga. Paicunapaj llactapica, imatapash na manllashpami causanajunga. Shina causashpami ñucataca, Mandaj Dios cajta yachanajunga. Paicunata yugushpa huatashca huascata fitijpi, paicunata servichishpa charijcunapaj maquimanda cacharichijpimi, chashna yachanajunga.

28Shuj llactacunapi causajcunaca, na ashtahuan quichushpa apanajungachu. Llactapi tiaj millai animalcunapash, na micungachu. Ashtahuangarin pipash na llaquichijpimi, imatapash na manllashpa causanajunga.

29Ali rijsishca yuracunatami, paicunaman viñachisha. Cai llactapica, na ashtahuan yarjaimanda huañunajungachu. Shuj llactacunapi causajcunapaj maquipipash, na ashtahuan pingai tucushpa causanajungachu.

30Shinamandami, paicunata Mandaj Taita Dios ñucallata, paicunahuan cajta yachanajunga. Israelcunaca, ñuca agllashca gentecuna cajtapashmi yachanajunga. Mandaj Jatun Dios ñucami, chashna nini.

31Cangunaca, ñuca llamagucunami canguichi. Ñuca jihuapi micuj ñuca llamacunalla, cangunaca runacunallami canguichi. Ñucaca, cangunapaj Taita Diosmi cani’ ninmi Mandaj Jatun Diosca nishpa villai” nihuarcami.