JOB 32 - Quichua Imbabura Bible

Eliú shuti runaca, Job rimashcataca tigrachinallami cani nishcami

1Job runaguca, paipaj yuyaipica, imatapash cashcatapacha rurajmi cani nijujpimi, chai quimsa runacunaca, imatapash na tigrachi ushashpa, upalla uyanajurca.

2Shinamandami, Ram shuti runapaj familiapura buzita nishca Baraquel shuti runapaj churi Eliú shuti runaca, Job runahuan ninandapacha fiñarirca. Taita Diostapash yali ima pandapash illajmi cani nijujpimi, ninanda fiñarirca.

3Job runapash, paipaj quimsa cumbacunahuanga, nina japirinshnami ninandapacha fiñarirca. Paicunaca, Job runata ninanda juchachinajushpapash, imatapash na tigrachi ushajpimi, chashna fiñarirca.

4Eliú shuti runaca, chairalla viñai caimandami, caishuj rucucuna Job runahuan parlai tucuchingacaman shuyajushcalla carca.

5Shina shuyajushpami, chai quimsa runacunaca, imata nitallapash na ashtahuan ushanajujta ricushpa Eliú shuti runaca, nina japirinshna ninandapacha fiñarirca.

6Chaimandami, buzita nishca Baraquel shuti runapaj churi Eliú shuti runaca, cashna nishpa rimarca: “Ñucaca, chairalla viñaimi cani. Cangunaca, ña rucucunami canguichi. Shinamandami ñucaca manllashpa, ñuca imatalla yarijushcataca, nara parlarcani.

7Ñucaca, cashnami yajurcani: ‘Ashtaca punllacunata causajcunara rimachun, unai huatacunata charijcunami, ali yachaihuan rimanga’ yajurcanimi.

8Runaca, Dios carashca espirituta charimbachami. Tucui Ushaita Charij Diospaj Samaimi, imatapash yachachin.

9Unai huatacunata causanajuj rucucuna cashcamandalla, alipacha yachajushcacunaca na canllu. Rucucunapash, aliguta mandanataca na yachanllu.

10Shinamandami, ñucapash cangunataca: ‘Uyahuaichi, ñuca ali yachaita villangapajmi munani’ nircani.

11Ricuichi, ñucaca canguna aliguta yarichunmi shuyashcani. Canguna rimajtami ali uyajurcani. Imata rimangapajpash, cangunaca yarircanguichirami.

12Ñucaca alimi uyajurcani. Uyaichi cangunaca, Job runataca na chashnachu nitaca, maijambash na ushashpami, upalla carcanguichi. Pai ali yarishpa rimashcatapash, napacha tigrachi ushashpami tianajurcanguichi.

13Na cangunallata: ‘Ñucanchimi, ali yachaita charinchi’ ninachu canguichi. Taita Diosllami mishan. Runaca, na mishai ushanllu.

14Cunanga Job runaguca, ñucataca na fiñashpa imatapash rimahuarcachu. Ñucapash paitaca, na canguna yarishcashna tigrachishachu.

15Paicunaca manllarishpami, na ashtahuan tigrachi ushanajurca. Paicuna aliguta yarinajushcapash chingarcami.

16Paicunaca, imatallapash rimangapashchari yashpami shuyajurcani. Ashtahuangarin upalla cashpami, imatapash na ashtahuan ninajurca.

17Shinamandami ñucapash, ñuca imatalla yachashcata, imatalla yarishcata parlangapaj munani.

18Ñucapash, ashtaca rimanacunatami charini. Chaimandami ñuca shungupi tiajuj espirituca, ucha rimachun yarichijuhuan.

19Shinamandami, ñuca shungupica, mushuj cara muchilapi vinota churajpi, samai na llujshi ushashpa tugyagrijunshna tiajun.

20Imatallapash rimashpapachami, ali cangapaj munani. Ñuca shimita pascashpa, imatallapash tigrachishpami ali casha.

21Cunanga, maijandapash na ñavipi ricushpalla rimashachu. Maijandapash canga, alimi cangui nishpa llullaitapash na ushashachu.

22Ñucaca, uyanayaita llullashpa parlanataca na yachanichu. Shina rurajpica, ñucata Ruraj Diosca ñapashmi chingachihuanman.