JOSUÉ 21 - Quichua Imbabura Bible

Levitacunapaj pueblocunami(1 Crón. 6:54-81)

1Levita familiacunapaj taitacunata mandajcunaca, Eleazar shuti curapajman, Nun shuti runapaj churi Josuepajman, Israel aillucunapaj taitacunata mandajcunapajmanmi shamunajurca.

2Paicunaca, Canaán llactapi Silo shuti pueblopimi cashna ninajurca: “Mandaj Diosca, Moisestami ñucanchi causana pueblocunataca, animalcunata michina pambacunandi, ñucanchiman cuchun mandarca” ninajurcami.

3Shina nijpimi israelcunaca, paicuna japinajushca alpacunataca, Mandaj Dios mandashcashnallata pueblocunatapash, michina pambacunandi levitacunaman cunajurca.

4Suerteta rurajpica, Coat shuti runapaj mirai familiacunapajmi urmarca. Paicunaca, Aarón curapaj mirai levitacunami carca. Suertata rurajpimi, paicunaca Judapaj, Simeonbaj, Benjaminbaj aillucunapaj llactacunapi, chunga quimsa pueblocunata japinajurca.

5Coat shuti runapaj mirai purallata caishuj miraicunaman suerteta rurajpica, Efraín shuti, Dan shuti aillu familiacunapaj, Manasespaj chaupi aillupaj familiacunapaj llactacunapimi urmarca. Chai llactacunapimi, chunga pueblocunata japinajurca.

6Gersón runapaj miraicunaman suerteta rurajpica, Isacar, Aser, Neftalí aillupaj familiacunapaj, Basán shuti llactapi causaj Manasespaj chaupi aillu familiacunapaj llactacunapimi urmarca. Chai llactacunapimi, chunga quimsa pueblocunata japinajurca.

7Shinallata Merari shuti runapaj mirai familiacuna imashna cashcashnallatami, Rubén, Gad, Zabulón shuti aillucunapaj llactacunapi, chunga ishcai pueblocunata japinajurca.

8Israelcunaca Mandaj Dios imashna Moisesta mandashcashnallata suerteta rurashpami levitacunamambash, cai pueblocunata, michina pambacunandi cunajurca.

9Judá shuti, Simeón shuti aillucunapaj llactacunapica, cai shuti pueblocunatami, levitacunaman cunajurca:

10Chai pueblocunatami, Aaronbaj churi puramanda Leví shuti runapaj churi Coat shuti runapaj familiacuna japinajurca. Punda suerteta rurajpi paicunapaj urmajpimi, chashna japinajurca.

11Judá aillupaj urcupica, Anac shuti runapaj taitapaj cashca Quiriat-arba nishca Hebrón shuti pueblotami, chai muyundipi michina pambacunandi cunajurca.

12Ashtahuangarin chai pueblo muyundipi uchilla pambacunataca llactacunandimi, Jefone shuti runapaj churi Caleb shuti runaman, paipaj cachun cunajurca.

13Aarón curapaj miraicunamanga, huañuchijcuna pacajuna Hebrón shuti pueblotami, michina pambacunandi cunajurca. Ashtahuan cai pueblocunatapash, michina pambacunandimi cunajurca: Libna,

14Jatir, Estemoa shuti pueblocunatapash, michina pambacunandi,

15Holón shuti, Debir shuti pueblocunatapash michina pambacunandi,

16Aín, Juta, Bet-semes shuti pueblocunatapash, michina pambacunandimi cunajurca. Chai ishcai aillucunapaca, iscun pueblocunami carca.

17Benjamín aillupaj llactapica, cai pueblocunatami, michina pambacunandi cunajurca: Gabaón, Geba,

18Anatot, Almón shuti, chai chuscu pueblocunatami, michina pambacunandi cunajurca.

19Aaronbaj mirai curacunaca, tucuimandaca chunga quimsa pueblocunatami, michina pambacunandi japinajurca.

20Ashtahuangarin Coat shuti runapaj mirai levita familiacunaman suerteta rurajpica, Efraín aillupaj pueblocunatami japinajurca. Paicunaca, Coat shuti runapaj miraicunamanda quedashcacunami carca.

21Efraín urcupi tiaj Siquem shuti pueblotapash, michina pambacunandimi cunajurca. Chai puebloca, huañuchijcuna pacajunami. Shinallata cai pueblocunatapashmi, michina pambacunandi cunajurca: Gezer,

22Kibsaim, Bet-horón shuti, chai chuscu pueblocunatapash, michina pambacunandimi cunajurca.

23Dan shuti aillupaj llactapica, cai pueblocunatami, michina pambacunandi cunajurca: Elteque, Gibetón,

24Ajalón, Gat-rimón shuti chuscu pueblocunatami, michina pambacunandi cunajurca.

25Manasespaj chaupi aillupaj llactapipash, Taanac shuti, Gat-rimón shuti ishcai pueblocunatami, michina pambacunandi cunajurca.

26Coat shuti runapaj caishuj mirai familiacunamambash, tucuimandaca chunga pueblocunatami, michina pambacunandi cunajurca.

27Gersón runapaj mirai levita familiacunamanga, Manasespaj chaupi aillupaj Basán llactapimi, michina pambacunandi Golán shuti pueblota cunajurca. Chai puebloca, huañuchijcuna pacajunami. Chai llactapillata, Beestera shuti pueblotapashmi cunajurca. Chai ishcai pueblocunataca, michina pambacunandimi cunajurca.

28Isacar shuti aillupaj llactapica, cai pueblocunatami, michina pambacunandi cunajurca: Cisón, Daberat,

29Jarmut, En-ganim shuti chuscu pueblocunatami, michina pambacunandi cunajurca.

30Aser shuti aillupaj llactapica, cai pueblocunatami, michina pambacunandi cunajurca: Miseal, Abdón,

31Helcat, Rehob shuti chuscu pueblocunatami, michina pambacunandi cunajurca.

32Neftalí aillupaj Galilea llactapica, Cedes shuti pueblotami, michina pambacunandi cunajurca. Chai puebloca, huañuchijcuna pacajunami. Shinallata Hamot-dor, Cartán shuti pueblocunatapashmi cunajurca. Chai quimsa pueblocunataca, michina pambacunandimi cunajurca.

33Gersón shuti runapaj mirai familiacuna imashna cashcashnallatami, michina pambacunandi chunga quimsa pueblocuna carca.

34Merari shuti runapaj mirai puramanda quedashca caishuj levita familiacunamanga, cai pueblocunatami Zabulón aillupaj llactapi, michina pambacunandi cunajurca: Jocneam, Carta,

35Dimna, Naalal shuti chuscu pueblocunatami, michina pambacunandi cunajurca.

36Rubén aillupaj llactapipash, cai pueblocunatami, michina pambacunandi cunajurca: Beser, Jahaza,

37Cademot, Mefaat shuti chuscu pueblocunatami, michina pambacunandi cunajurca.

38Gad shuti aillupaj Galaad llactapica, Ramot shuti pueblotami, michina pambacunandi cunajurca. Chai puebloca, huañuchijcuna pacajunami. Shinallata cai pueblocunatapash, michina pambacunandimi cunajurca: Mahanaim,

39Hesbón, Jazer shuti chuscu pueblocunatami, michina pambacunandi cunajurca.

40Merari shuti runapaj mirai familiacunamanda puchushca caishuj levita familiacunapaca, imashna suertecunata rurashcashnallatami, chunga ishcai pueblocunata cunajurca.

41Levitacunapaj tucui pueblocunaca, israelcunapaj cachun japinajushca alpa chaupicunapimi, tucuimandaca chuscu chunga pusaj pueblocuna, michina pambacunandi carca.

42Chai pueblocunaca, carupi carupimi carca. Cada pueblo muyundipimi, michina pambacunapash tiarca. Tucui pueblocunallatami, shina carca.

Israelcunaca, paicuna japinajushca alpacunapimi causai callarishca

43Shinami Mandaj Diosca, israelcunapaj, ñaupa taitacunaman llactata carashapachami nishpa juramentushcataca, israelcunaman cararca. Chai tucui llactata paicuna japishpami, chai llactapi causanajurca.

44Mandaj Diosca, paicunapaj ñaupa taitacunaman imatalla carangapaj juramentushpa nishcashnallatami, tucui chai llactapica casilla, ali causaita cararca. Shinamandami, israelcunata fiñajcunaca maijanllapash macanajungapaj shayaritaca, na usharca. Chai fiñaj runacunataca, Mandaj Diosmi tucuicunata israelcunapaj maquipi churarca.

45Mandaj Diosca, israelcunaman alicunata carashapachami nishpa juramentushcataca, shuj shimitallapash na saquishpami, tucuita pactachirca.