1Jotam shuti runaca, ishcai chunga picha huatata charishpami mandai callarirca. Paica, chunga sucta huatatami, Jerusalenbi mandajurca. Paipaj mamaca, Sadoc shuti runapaj ushi Jerusa shutimi carca.
2Jotam shuti runaca, Mandaj Diospaj ñaupajpica, paipaj taita Uzías shuti runa tucui alicunata rurashpa causashcashnallatami alitalla rurajurca. Shina cashpapash, Mandaj Diospaj huasiman yaicuitaca na usharcachu. Ashtahuangarin gentecunaca, nalitallami rurashpa catinajurca.
3Mandaj Diospaj huasipi ashtahuan jatun pungutaca, paimi rurachirca. Jatun pirca jahuapipash, tauca shinlli torrecunatami rurachirca.
4Judá llactapi tiaj urcucunapica, pueblocunatapashmi shayachirca. Bosquecunapica, shinlli torrecunatapash, jatun torrecunatapashmi rurachirca.
5Amonitacunata jatun mandajhuan macanajushpapash, paimi misharca. Chaimandami amonitacunaca, chai huatapica sucta chunga pusaj quintal culquita, chuscu huaranga chuscu patsaj quintal trigota, chuscu huaranga chuscu patsaj quintal cebadata cunajurca. Amonitacunaca, shuj cati huatapipash, ishcaipaj cati huatapipash chashnallatami cunajurca.
6Jotam shuti runaca, paita Mandaj Taita Diospaj ñaupajpi paipaj causaita alichirishpami, ninan shinlli tucurca.
7Jotam shuti runa imatalla ashtahuan rurashcacunapash, tucui macanajuicunata rurashcapash, pai imashna causashcapash, Israel llactata, Judá llactata jatun mandajcuna imatalla rurashcacunata escribishca libropimi tiajun.
8Jotam shuti runaca, ishcai chunga picha huatata charishpami mandai callarirca. Paica, chunga sucta huatatami, Jerusalenbi mandajurca.
9Pai huañushpa, paipaj ñaupa taitacunahuan tandanajujpica, Davidpaj pueblopimi pambarca. Paipaj randica, Acaz shuti paipaj churimi mandajurca.
Who We AreWhat We EelieveWhat We Do
2025 by iamachristian.org,Inc All rights reserved.
