ZACARÍAS 12 - Quichua Imbabura Bible

Jerusalenbi causajcunaca, jipa punllacunami cacharichi tucunga

1Mandaj Dios villashca cai shimicunaca, israelcuna imalla tucunatami villajun. Jahua pachatapash, cai pachatapash ruraj, runacunamambash espirituta cuj Mandaj Diosca, cashnami nijurca:

2“Ricui, ñucami Jerusalenbi causajcunataca, copatashna churasha. Paicunami, Judá llacta muyundipi causanajuj, paicunata fiñaj tucui gentecunataca chujchuchinga. Jerusalenda fiñashpa chaupipi churai punllami, chashna canga.

3Chai punllapica, Jerusalendaca ladolla llactacunapi causaj tucui gentecunapaj llasha rumishna cachunmi rurasha. Chai rumita aparijcunaca, tucuillami ñutui tucunga. Cai pachapi tiaj tucui llactacunamandami, paita llaquichingapaj tandanajunga.

4Chai punllapica, tucui caballocunatami ninanda manllachishpa chugrichisha. Caballocunapi tiarij soldadocunatapash lococunatashnami rurasha. Ashtahuangarin Judá llactapi causajcunataca, ñucami aliguta ricuriasha. Shuj llactacunapi tiaj tucui caballocunatapash ñausayachishpami llaquichisha.

5Chaita ricushpami, Judá llacta soldadocunata mandajcunaca, paicunapaj shungupica cashna yarinajunga: ‘Jerusalenbi causajcunaca, tucuita Mandaj paicunapaj Taita Diosmandami ushaita charin’ yashpami causanajunga.

6Chai punllapica, Judá llacta soldadocunata mandajcunataca, ninayashca carbonda churana jirrutashnami, yamda jahuapi churasha. Nina michun japichishcata, parvacunapi churanshnami churasha. Chaimandami, paicunapaj muyundi llactacunapi causajcunataca, ali ladomambash, lluqui ladomambash tucuchinajunga. Ashtahuangarin Jerusalenbi causajcunaca, paicuna causashca pushtupillatami, Jerusalenbi cutin causanajunga.

7Davidpaj juyailla huasi ucu purapash, Jerusalenbi causajcunapash, Judá shuti runapaj miraicunata yalishpa ama jatun tucunajuchunmi Mandaj Diosca, Judá llacta carpacunapi causajcunatara, punda quishpichinga.

8Chai punllapica, Jerusalenbi causajcunamandaca, Mandaj Diosmi shayaringa. Paicuna purapi ushaita maijan na charishpapash, chai huatacunapica jatun mandaj Davidshnami shinllipacha canga. Davidpaj huasi ucu puracunaca, paicunapaj ñaupajpica, Taita Diosmambash, Mandaj Diospaj angelmambash rijchajmi canga.

9Chai punllapica, Jerusalenda llaquichingapaj shamuj llactacunataca, tucuillatami tucuchingapaj yarisha.

10Chaipimi, Davidpaj huasi ucu puramambash, Jerusalenbi causajcunamambash juyaita charij, ñucata mañana yuyaita charij Espirituta talinshna cachamusha. Chaipimi paicunaca, yalijta tujsishpa ñucata chugrichishcata ricunajunga. Shinamandami ninandapacha llaquirishpa, shujlla churi huañushcamandashna huacanajunga. Paicunaca, punda churimanda ninanda llaquirinshnami llaquirinajunga.

11Chai punllapica, Meguido shuti pambapi Hadad-rimón shuti diosmanda llaquirishpa huacashcashnami, Jerusalenbica jatun huacai tianga.

12Cai llactapi causajcunaca, ailluca aillu purami, shican shican tandanajushpa huacanajunga. Davidpaj huasi ucupura miraicunaca, pai puralla, paicunapaj huarmicunapash pai purallami huacanajunga. Natán runapaj huasi ucupura miraicunapash pai puralla, paicunapaj huarmicunapash pai purallami huacanajunga.

13Levipaj huasi ucupura miraicunapash pai puralla, paicunapaj huarmicunapash pai purallami huacanajunga. Simei shuti runapaj miraicunapash, pai puralla, paicunapaj huarmicunapash pai purallami huacanajunga.

14Tucuilla caishuj miraicunapash pai puralla, paicunapaj huarmicunapash pai purallami huacanajunga.