MARCOS 8 - Quichua Imbabura Bible

Chuscu huaranga runacuna micuchunmi, Jesusca carashca(Mat. 15:32-39)

1Chai punllacunapimi, ashtaca gentecunaca ima micunatapash na apashpa, Jesuspajman shamushca carca. Chaimandami Jesusca, paipaj yachajujcunata cayashpa cashna nirca:

2—Cai tucui gentecunatami, ninanda llaquini. Ña quimsa punllatami, paicunaca ñucahuan caipi. Paicunaca, ima micunagutapash na charinllu.

3Ashtacacunami, caru llactacunamanda shamushca. Paicunata na micuchishpa, yarjaita huasiman tigrachijpica, chaupi ñambillami na ri ushashpa urmanga— nircami.

4Shina nijpimi, paipaj yachajujcunaca:

—Cai jichushca pambapica, ¿maimandata micunata carashun nipangui?— nishpa tapunajurca.

5Shina tapujpimi:

—Cangunaca, ¿mashna tandatata charinguichi?— nishpa, Jesusca tapurca.

Shina tapujpimi, paipaj yachajujcunaca:

—Canchis tandagullami tian— ninajurca.

6Shina nijpimi Jesusca, chai tucui gentecunata: “Alpagupi tiaripaichi” nirca.

Ña tiarijpica, chai canchis tandaguta japishpami Jesusca, Diosta pashi nirca. Chai tandaguta asha asha chaupishpaca, tucuicunapaj ñaupajpi churachunmi, paipaj yachajujcunaman curca. Paicunaca, tucuilla gentecunamanmi caranajurca.

7Shinallata paipaj yachajujcunaca, uchilla pijicunatapash huaquingutallami charishca carca. Chai pijimandapash, Diosta pashi nishpa mañashpami:

—Caigutapash carapaichi— nishpa Jesusca, paipaj yachajujcunaman curca.

8Shina carajpimi chai gentecunaca, na munangacaman micunajurca. Paicuna na micui ushashcataca, canchis canasta jundatami, paipaj yachajujcunaca tandachirca.

9Chai micushpa tianajuj gentecunaca, chuscu huarangashnami carca. Paicunataca tucuillata cayacaman nishpami, Jesusca cacharca.

10Chai jipaca Jesusca, paipaj yachajujcunandi canoapi tiarishpami, Dalmanuta shuti llactaman rirca.

Imatapash rurashpa ricuchi nishcami(Mat. 16:1-4; Luc. 12:54-56)

11Chai jipami fariseocunaca, Jesuspajman shamushpa ninanda nalicachishpa rimai callarirca. Imata tigrachijpipash juchachingapaj munashpami, jahua pachamanda imatapash rurashpa ricuchijuchun mañanajurca.

12Shina nijpimi Jesusca, paipaj espiritupi ninanda llaquirishpa, cashna nirca:

—Cunan viñaicunaca, ¿imashpata imatapash rurashpa ricuchijuchun mañan? Na llullashpami, cangunataca cashna nini: Cunan miraicunamanga, imatapash na rurashpa ricuchishcachu canga— nircami.

13Shina nishpallami fariseocunataca saquishpa, cutinllata Jesusca canoapi tiarishpa, cucha caishuj manñaman chimbarca.

Fariseocuna yachachishcacunaca levadurashnami(Mat. 16:5-12)

14Jesuspaj yachajujcunaca, tandacunata apanata cungashpami, shujlla tandagutalla apashpa canoapi rinajushca carca.

15Ña cuchata rijushpami Jesusca, paipaj yachajujcunata cashna nishpa mandarca:

—Aliguta uyahuaichi. Pactarallapash fariseocunapaj, Herodespaj levaduratara chasquinguichiman— nircami.

16Shina nijpi paicunapura parlarishpaca:

—Tandata na apamushcata yachashpami, shina nijun— ninajurca.

17Paipaj yachajujcuna chashna parlanajujta yachashpami, Jesusca cashna nirca:

—¿Imashpata tandaca illanchimari ninajunguichi? Ñuca imata rurashcatapash, ¿narachu entendi ushanguichi, narachu yachai ushanguichi? ¿Cunangaman shinlli shungurachu canguichi?

18Ñavita charishpapash, ¿nachu ricunguichi? Rinrita charishpapash, ¿nachu uyanguichi? ¿Nachu yaringuichi?

19Picha tandata chaupishpaca, picha huaranga runacuna micuchunmi cararcani. Chai puchushcataca, ¿mashna canasta jundatata tandachircanguichi?— nijurcami.

Shina nijpica:

—Chunga ishcai canasta jundatami tandachircanchi— ninajurcami.

20Jesusca cashnatapashmi nirca:

—Canchis tandata chaupishpami, chuscu huaranga gentecuna micuchun cararcani. Chai puchushcataca, ¿mashna canasta jundatata tandachircanguichi?— nircami.

Shina nijpimi:

—Canchis canasta jundatami tandachircanchi— ninajurca.

21Shina nijpimi:

—¿Chashna cajpitachu nara ali yachai ushanguichi?— nishpami Jesusca, paipaj yachajujcunataca tapurca.

Betsaida pueblopimi, shuj ñausa runaguta alichishca

22Chai jipami, Betsaida shuti puebloman Jesusca chayagrirca. Chaipica, shuj ñausa runaguta apamushpami, maquihuan tacarichun Jesustaca mañanajurca.

23Shina mañajpimi, chai ñausa runagutaca, maquimanda aisashpa, chai uchilla llactamanda shuj ladoman pusharca. Shina pushashpami Jesusca, chai ñausa runagupaj ishcandi ñavipi t'ucata churashpa, umapi maquita churashpa:

—¿Imagutapash ricui ushanguichu?— nishpa tapurca.

24Shina nijpimi, chai ñausa runagu ricushpaca:

—Quirucunashna purinajujtami, gentecunataca ricuni— nijurca.

25Shina nijpimi Jesusca, chai runapaj ñavi jahuapi cutin maquita churarca. Shina churajpi ali tucushpaca, ñavi pactashcacaman aligutapacha tucuita ricurcallami.

26Shina alichishpaca:

—Cai uchilla llactapica, ama yaicunguichu. Pimambash, ama chaipica villanguichu— nishpami Jesusca, chai runataca huasiman cacharca.

Pedroca, Quishpichij Cristomi cangui nishcami(Mat. 16:13-20; Luc. 9:18-21)

27Chai jipami, Cesarea Filipo shuti pueblo ladolla uchilla llactacunaman Jesusca, paipaj yachajujcunandi rijurca. Ña chaupi ñanda rijushpami:

—Gentecunaca ñucataca, ¿maijan yashpashi ricuhuan?— nishpa, paipaj yachajujcunataca tapurca.

28Shina nijpimi paicunaca, cashna nishpa tigrachinajurca:

—Huaquingunaca, Bautizaj Juanmi canga ninajunmi. Huaquingunaca, Profeta Eliasmi canga ninajunmi. Shujcunaca, Profeta puramanda maijambashmi canga ninajunmi— ninajurcami.

29Shina ninajujpimi:

—¿Cangunaca, cutin maijan nihuanguichita?— nishpa, Jesusca tapurca.

Shina tapujpimi:

—Canga, Quishpichij Cristomi cangui— nishpa, Pedroca tigrachirca.

30Shina nijpimi, Jesusca:

—Ñuca maijan cajtapash, pimambash na villanachu canguichi— nijurca.

Jesusca, pai huañunatami villashca(Mat. 16:21-28; Luc. 9:22-27)

31Shina nishpallami Jesusca, paipaj yachajujcunaman cashna nishpa yachachi callarirca:

—Runa Aichayu tucushca ñucaca, ninanda llaquichi tucunapachami cani. Mandaj rucucunapash, curacunata mandajcunapash, mandashca shimita yachachijcunapash, ñucataca na ricunayachishpa huañuchijpi huañunapachami cani. Shina huañushpapash, quimsa punllahuanga causarishallami— nijurcami.

32Chaitaca, paipaj yachajujcuna aligutapacha yachachunmi villajurca. Shina nijpimi Jesustaca, paitalla shujman pushashpa, Pedroca ninanda jarcashpa rimajurca.

33Ashtahuangarin Jesusca, paipaj yachajujcunata tigrarishpa ricushpami, Pedrotaca ninanda jarcashpa rimashpa cashna nirca:

—¡Ñuca ñaupajmanda anchuri, Satanás! Canga, Taita Dios imata pactachigrijujtaca na yachanguichu. Ashtahuangarin gentecuna imata yarijujtallami nijuhuangui— nircami.

34Shina nishpallami Jesusca, paipaj yachajujcunatapash, caishuj gentecunatapash cayashpa cashna nijurca:

—Maijan cashpapash ñucata catingapaj munashpaca, paipaj causaita na llaquishpa, paipaj cruzta aparinshna ñucata catihuachun.

35Maijan cashpapash paipaj causaitalla quishpichingapaj munashpaca, chingaitami chinganga. Ashtahuangarin ñucata catijushcamanda, ali villaita villajushcamanda huañuchi tucushpaca, quishpiringapachami.

36Shuj runa cai pachapi ima tiajta tucuita japishpapash, paipaj alma chingaita chingagrishpaca, ¿ima alita canga?

37Chashna chingashpaca, paipaj almamandaca runaca, ¿imatashi cui ushanga?

38Cazarashca jahua shujcunahuan causanshna juchayu cai gentecunapi ñucamandapash, ñuca villashca shimicunatapash villanata pinganayachijpica, Runa Aichayu tucushca ñucapashmi, jucha illaj angelcunahuan, ñuca Taita punchapamba tiajunshna shamushpa, paitaca pingaichisha— nijurcami.