1Mandaj Dioslla, canda alicachinaca juyaillagumari.
Jahua pachapi causajuj Dioslla, cambaj shutiguta
Salmocunahuan candanapash juyaillagumari.
2Can llaquijujta tutamandata villanapash, tucuita
can pactachijujta, tutandi villanapash juyaillagumari.
3Chunga cuerdayu tocanata, salteriota
tocashpami candajuni.
Arpatapash juyailla tonoguta
tocashpami candajuni.
4Mandaj Dioslla, can tucuita rurashpa
ñucata cushichishcamandami, cambaj maquihuan
rurashcata ricushpa ninanda cushijuni.
5¡Mandaj Dioslla, can rurashcacunaca
ninan jatun alicunamari!
Cambaj yuyaicunaca, pipash
na yachai ushanallacunamari.
6Shinlli shungu runaca, na yachanllu.
Juizu illaj runapash, chaitaca na yuyaipi japinllu.
7Diosta na manllajcunaca, jihuagushna viñashca
cashpapash, nalita tucui rurajcunaca sisajunshna
cashpapash, causaita causaicaman chingachi
tucungapajllami shina tucunajun.
8Ashtahuangarin Mandaj Dioslla,
canga causaita causaicaman
jahua pachapi causajuj Diosmi capangui.
9Mandaj Dioslla, canda fiñajcunataca ricupailla.
Ricui, canda fiñajcunaca tucuringapachami.
Nalita rurajcunaca, tucuicunami
caiman chaiman cachai tucunga.
10Ashtahuangarin canga, búfalo nishca
huagratashnami ashtahuan shinllitapacha rurahuangui.
Mushuj aceiteta talishpami javi tucusha.
11Ñucata fiñajcunataca, ñuca ñavihuanmi ricujusha.
Nalita rurajcuna ñucata fiñashpa
jatarijtaca, ñuca rinrihuanmi uyasha.
12Imatapash cashcatapacha ruraj runaca,
palmera quirushnami sisajunga.
Líbano urcupi tiaj cedro quirushnami viñanga.
13Paicunaca, Mandaj Diospaj huasipi tarpushcashnami canga.
Ñucanchi Taita Diospaj huasi patiocunapi
sisanshnami canga.
14Ña rucugu cashpapash, fucujlla yuracunashnami canga.
Paicunaca shinllicunapacha, verdella
yuracunashnami canga.
15Chashna cashpami paicunaca, cashna nishpa villanajunga:
“Ñucanchi shinlli torreshna
Mandaj Diosca, aligutalla rurajmi.
Paipica, ima juchachinapash na tianllu” ninajungami.
Who We AreWhat We EelieveWhat We Do
2025 by iamachristian.org,Inc All rights reserved.
