Psalms 103 - Quichua Imbabura Bible

Taita Dios bendiciashcamanda alicachishcamiDavid rurashca Salmomi.

1Ñuca almalla, Mandaj Diosta alicachiyari.

Paipaj jucha illaj shutitaca,

ñuca tucui yuyaipash alicachiyari.

2Ñuca almalla, Mandaj Diosta alicachiyari.

Ima alicunata pai rurashcataca,

shujllatapash ama cungaichu.

3Tucui ima nalicunata can

rurashcataca, paimi cungan.

Paimi, cambaj tucui nanaicunatapash jambin.

4Paimi, can pambai tucuna

utujuman rinamandapash quishpichin.

Paimi ashtaca alicunatapash, juyanatapash,

coronata churachinshna canman caran.

5Paimi, na munangacaman can micuchumbash alicunata caran.

Jatun angashna mushujyachunmi, chashna caran.

6Mandaj Diosmi, imatapash cashcatapacha ruran.

Ninandapacha llaquichi tucushpa tucui causajcunamambash,

pai japina cashcatallata cun.

7Pai imata rurangapaj munashcataca,

Moisesmanmi villajurca.

Pai imatalla rurashcacunataca,

israelcunamanmi villajurca.

8Mandaj Diosca ninanda llaquij, ali shungu,

na ñapash fiñarij, ninanda juyajmi.

9Fiñarishpapash, na unaicaman fiñangachu.

Fiñarishcataca, na causaita

causaicaman charijungallachu.

10Ñucanchi nalita rurashcamandaca,

na chashnallata llaquichishcachu.

Ñucanchi juchacunata rurashcashnallatapash

na cushcachu.

11Imashnami, cai pachamanda jahua pachacaman

jatun, chashnallatami paita manllajcunataca,

jatunyachishpa ninanda llaquin.

12Indi llujshimuj ladoca,

indi huashajuj ladomandaca carupimi.

Chashnallatami ñucanchi na cazushcacunatapash,

ñucanchimanda caruyachirca.

13Huahuacunata taita llaquinshnallatami,

Mandaj Diosca paita manllajcunataca llaquin.

14Paica, ñucanchi imashna cajtami rijsin.

Ñucanchitaca, ñutu alpa cajtami yarin.

15Runapaj causai punllacunaca, jihuashnami.

Pambapi viñashca sisashnami sisan.

16Jihua jahuata huaira yalijpica,

chaquishpa tucurinllami.

Chai jihua maipi tiashca pushtutaca,

pipash na yachangachu.

17Ashtahuangarin Diosta manllajcunapaca,

Mandaj Dios llaquinaca, causaita causaicaman

na tucurinami.

Imatapash cashcatapacha pai ruranapash,

mirai miraicamanmi.

18Chaitaca, paihuan ari ninajushcata

pactachijcunaman pai mandashcacunata

yariashpa pactachijcunamanmi rurajun.

19Mandaj Diosmi, jahua pachapica pai

mandashpa tiarinata churarca.

Paica, tucuicunatami mandajun.

20Paipaj ángel cangunapash, Mandaj

Diostaca, aligumari cangui nichiyari.

Cangunaca, ninan jatun ushaita charijcunami canguichi.

Pai ima nishcata rurajcunami canguichi.

Imata rurachun nishca shimita cazujcunami canguichi.

21Tucui paipaj soldadocuna,

Mandaj Diostaca alicachinguichiyari.

Cangunaca, paipajta rurajcuna pai munashcata

rurajcunami canguichi.

22Mandaj Dios rurashcacuna, cangunapash

tucuicuna paita alicachinguichiyari.

Pai mandajuj tucui pushtucunapi,

paita alicachinguichiyari.

Ñuca almalla, Mandaj Diosta alicachiyari.