DANIEL 9 - Quichua Imbabura Bible

Danielca, israelcunamandami Diosta mañashca

1Media shuti llactamanda Asuero shuti runapaj churi Darío shuti runami, caldeocunapaj llactata jatun mandaj tucurca. Paica, ñami shuj huatata mandajurca.

2Pai mandai callarishca huatapimi, Daniel ñucaca, mashna huatacunata Jerusalén jichushca sirinata, profeta Jeremiasman Mandaj Dios escribichishca librocunata callarimanda leyijurcani. Chaicunapica, canchis chunga huatata llaquinayaita tucuchi tucushca sirinatami villajun.

3Chaimandami, Mandaj Taita Diospajman tigrarishpaca, paita ninanda mañashpa mascarcani. Na micushpa, cañamuta churajushpa, uchufatapash churarishpami mascarcani.

4Ñucata Mandaj Taita Diosta mañashpaca, cashna nishpami villajurcani:

“Mandaj Taita Dioslla, canga manllana Diosmi cangui. Canga imata ari nishpapash, pactachijmi cangui. Canda juyashpa, can mandashcacunata pactachijcunataca, llaquijmi cangui.

5Ñucanchica, juchatami rurashcanchi. Jatun nalitami rurashpa causashcanchi. Imata cashpapash mapatallami rurashcanchi. Canda na cazushpami, can mandashcacunamanda, can yachachishca shimicunamanda anchurishcanchi.

6Shinallata can ima nishcata villaj canda servijcunapash, ñucanchita jatun mandajcunaman, ñucanchita mandajcunaman, ñucanchi taitacunaman, llactapi causanajuj tucui gentecunaman cambaj shutipi villanajujpipash, ñucanchica napacha cazushpami causashcanchi.

7Jatun Dioslla, imatapash cashcatapacha ruranaca cambajmi. Pingai tucushpa, urai cumurinaca ñucanchipajmi. Judá llactamanda tucui runacunapash, Jerusalenbi causashcacunapash, tucui israelcunapashmi, cunan punllacunacaman pingai tucushpa causanajunchi. Ñucanchi taitacuna cazuitapacha canda na cazushcamanda, paicunata can llujchishpa cachajpi rishpami, ladolla llactapi cashpa, caru llactapi cashpapash, tucui llactacunapi chashnallata causanajunchi.

8Mandaj Dioslla, ñucanchipash, ñucanchita jatun mandajcunapash, ñucanchita mandajcunapash, ñucanchi taitacunapashmi, ñavita maimambash na churai ushashpa pingai tucunchi. Canda fiñashpa juchata rurashcamandami, chashna tucunchi.

9Ñucanchita Mandaj Taita Diosmi, paita na cazunajujpipash llaquishpa, ñucanchi nalita rurashcacunata cungan.

10Ñucanchita Mandaj Taita Dios rimashcatami na cazushcanchi. Ñucanchica, pai ima nishcata villashpa servijcunahuan, ñucanchiman cushca mandashcacunapi nishcashna causachun mandashcatami, na cazushcanchi.

11Tucui israelcunallatami, pai rimashpa imata mandashcatapash na cazushpa paimanda anchurishcanchi. Chaimandami llaquichishapachami nishpa juramentushcata, Taita Diosta servij Moisés mandashpa escribishca shimica, ñucanchipajllata urmarca. Ñucanchica, paita fiñashpami juchata rurashcanchi.

12Paica ñucanchitapash, ñucanchita mandajcunatapash fiñashpa llaquichishami nishcataca pactachishcapachami. Paimi, cai jatun llaquitaca, ñucanchiman cachamurca. Jahua pacha cai ucupica, Jerusalenda llaquichishcashnaca, ima horallapash na llaquichishcachu.

13Moisés mandashpa escribishcapi nijushcashnallatami, cai tucui llaquicunaca ñucanchita japirca. Ashtahuangarin ñucanchi nali causaita saquishpa, na llullaj cambaj shimita yachangapaca, ñucanchita Mandaj Taita Diostaca alita rurapai nishpallapash, na mañashpami causashcanchi.

14Chaimandami Mandaj Diosca, llaquichinata yarijushpallata, cai tucui llaquicunataca ñucanchiman cachamurca. Ñucanchita Mandaj Taita Diosca, tucui imata rurashpapash cashcatapacha ruraj cashpami, pai rimashcata ñucanchillata na cazushcamandaca llaquichirca.

15Ñucanchita Mandaj Taita Dioslla, canmi can agllashcacunataca, ninan ushaita charij cambaj maquihuan Egipto llactamanda llujchishcangui. Shina llujchishpami, cunangaman tucuicuna rijsishca cangui. Cunanga, ñucanchimi canda na manllashpa, juchata rurashcanchi.

16Jatun Dioslla, tucui imatapash cashcatapacha rurashpa pactachijlla cashcashnallata cunanga, Jerusalén pueblomandapash, cambajlla shicanyachishca urcumandapash, can ninandapacha fiñarishcataca anchuchipailla. Ñucanchica, juchata rurashcamanda, ñucanchi taitacunapash jatun nalita rurashcamandami, ñucanchi muyundipi tucui causajcunaca Jerusalendapash, can agllashca gentecunatapash nalicachishpa rimanajun.

17Ñucanchi Taita Dioslla, cunanga canda servij ñuca ninanda mañashcata uyahuayari. Can Jatun Dios juyashcamandaca, jichushca sirijuj cambajlla huasita, cambaj ñavihuan ricushpa punchayachipairi.

18Ñuca Taita Dioslla, aligutapacha uyahuayari. Llaquinayaita ñucanchi causanajujtapash, canda mañana pueblo jichushca sirijujtapash, cambaj ñavita pascashpa ricupairi. Imatapash cashcatapacha ñucanchi rurashcata yariashpa causashcamandaca, na cutin cutin mañanajunchichu. Ashtahuangarin can ninanda llaquij cashcamandami mañapanchi.

19Jatun Dioslla, uyahuayari. Jatun Dioslla, ñucanchi nalita rurashcata cungapairi. Jatun Dioslla, aligutapacha uyahuayari. Canllata juyarij cashcamanda, ucha pactachipairi. Ñuca Taita Dioslla, cambaj pueblomanda can agllashca gentecunamandami, cambaj shutipi mañanajunchi” nishpami mañarcani.

Canchis chunga semanacunamandami villashca

20Ñucaca, ñucata Mandaj Taita Diospaj ñaupajpimi, ñuca juchatapash, ñuca llactapura israelcunapaj juchatapash villashpa, tucui shunguhuan cutin cutin mañajurcanira. Ñuca Taita Diospajlla shicanyachishca urcumandapashmi, ninanda mañajurcanira.

21Shina mañashpa ñuca villajujpillatami, muscuipishna punda ñuca ricushca Gabriel shuti angelca, jahuata shamushpa ñucapajman ñapash chayamurca. Paica, animalta Diosman cushpa huañuchina horaspishnallami chishipi shamurca.

22Paimi, ñucaman entendichishpa cashna nishpa villahuarca:

“Daniel, cunanga canman ali yachaita cushpa, entendichingapajmi shamurcani.

23Can ninanda mañai callarijujpillatami cachamuhuarca. Ñucaca, canda yachachingapajmi shamurcani. Canga, ninanda juyai tucushcami cangui. Cunanga, ñuca villashcatapash, muscuipishna ricushcatapash aligutami yachana cangui.

24Cambaj llacta puracunapaj, Diospajlla shicanyachishca cambaj pueblopajllatami, chai canchis chunga semanacunataca yarishcalla charijun. Yachashpata na cazushcatapash, juchatapash tucuillata tucuchingapajmi, chashna charijun. Shinallata nalita rurashcatapash anchuchingapaj, causaita causaicaman imatapash cashcatapacha rurangapaj muscuipishna ricushcatapash, Dios villashcatapash sellangapaj, jucha illajcunata ashtahuan yali Jucha Illajtapash, aceiteta talishpa javingapajmi, chashna charijun.

25Shinallata caitapash aliguta uyashpa entendingui: Jerusalenda alichinajuchun mandashcamandapacha, Mesías ni tucushca Mandaj shamungacamanmi, canchis semanacuna, canchis chunga ishcai semanacunapash yalinga. Plazatapash, pueblo muyundi pircatapash, jatun llaqui punllacunapimi alichinajunga.

26Chai sucta chunga ishcai semana jipami, Mesiastaca huañuchinajunga. Na paimandallataca huañuchinajungachu. Shuj mandajpaj gentecuna shamushpami Jerusalendapash, Diospaj huasitapash, tucuillata urmachinga. Paica, yacu jundashpa tucuchinshnami tucuchinga. Jatun macanajui tucuringacamanmi, llaquichishpa tucuchinaca tianga.

27Shuj semanapaca, ashtacacunahuan ari ninajushcatami, ashtahuan shinllitapacha churanga. Chaupi semanapica, Diosman animalcunata cushpa huañuchinatapash, ima shuj caranacunatapashmi anchuchinga. Chai jipaca ninanda millanayachishpa, llaquinayaita tucuchijmi shamunga. Tucurimui punllacamanmi, llaquichij shamunga. Taita Dios llaquichishami nishcapash, chai llaquichijpaj jahuapi talirimunshna shamungacamanmi, chashna canga” nishpami villahuarca.