ÉXODO 7 - Quichua Imbabura Bible

1Shina nijpimi Mandaj Diosca, Moisesta cashna nirca:

—Ricui, ñucami candaca, Dios villashcashna Faraonman villachun churarcani. Cambaj huauqui Aaronga, can ima nishcata villajmi canga.

2Canga, tucui imatalla ñuca mandashcatami villana cangui. Cambaj huauqui Aaronga, israelcunata, cambaj llactamanda richun saqui nishpami Faraonhuan parlajunga.

3Ñucami, Faraonbaj shunguta shinlliyachisha. Egipto llactapica, ima ricuchinacunatapash, ima manllarinacunatapashmi ashtahuan ashtahuan ricuchijusha.

4Shina cajpipash Faraonga, cangunataca na uyanayachingachu. Ashtahuangarin ñucami, Egiptopica, ñuca maquihuan llaquichisha. Ninan llaquicunata rurashpami, soldadocunashna shican shican tandanajushcata llujchisha.

5Ñuca maquita chutashpa, Egiptopi causajcunata llaquichishpami, israelcunataca paicunapaj chaupimanda llujchisha. Shina llujchijpimi, Egiptopi causajcunaca ñucataca, Mandaj Dios cajta yachanajunga— nircami.

6Shina nijpimi Moisespash, Aaronbash Mandaj Dios mandashcashnallata ruranajurca. Paicunaca chashnatapachami ruranajurca.

7Faraonhuan parlanajushca punllacunapica Moisesca, pusaj chunga huatatami charirca. Aaronga, pusaj chunga quimsa huatatami charirca.

Aaronbaj vara caspimandami villajun

8Mandaj Diosca, Moisesmambash, Aaronmambash, cashna nishpami villarca:

9—Faraonga cangunataca: ‘Pipash na rurai ushanallata rurashpa ricuchihuaichi’ nishpa tigrachijpica, Aarondaca cashna ningui: ‘Cambaj vara caspita japi. Chai caspitaca, culebraman tigrachun Faraonbaj ñaupajpi shitai’ ningui— nircami.

10Shina nijpimi Moisespash, Aaronbash Faraonbajman shamushpa, Mandaj Dios mandashcashnallata ruranajurca. Aaronga, paipaj vara caspitaca Faraonbaj, paita servijcunapaj ñaupajpimi shitarca. Shina shitajpimi chai caspica, culebraman tigrarca.

11Shinamandami Faraonbash, ali yachajcunata, brujocunata cayarca. Shina cayajpimi, Egiptopi causaj brujocunapash, muspachinata paicuna yachashcahuan chashnallata ruranajurca.

12Paicunapaj vara caspicunatapash, tucuicuna shitajpimi chai caspicunaca, culebraman tigrarca. Ashtahuangarin Aaronbaj vara caspimi, paicunapaj caspicunataca langarca.

13Chashnata ricushpami, Faraonbaj shunguca ashtahuan shinlliyarca. Shinamandami, Mandaj Dios imashna nishcashnallata, paicunataca na uyanayachirca.

Yacutaca, yahuarman tigrachishpami llaquichishca

14Shina cajpimi Mandaj Diosca, Moisestaca cashna nijurca:

—Faraonbaj shunguca shinlliyashcapachami. Shinamandami israelcuna richunga, na saquinga.

15Canga, tutamandata Faraonbajman ringui. Paica, jatun yacumanmi llujshijunga. Culebraman tigrashca cambaj caspitallata apashpa, pai chayamuna yacu manñapi shuyangui.

16Paitaca cashna ningui: ‘Hebreocunata Mandaj Taita Diosmi, cashna nichun cambajman cachamuhuan: Ñuca agllashcacunataca, jichushca pambapi ñucata servingapaj richun saqui. Ricui canga, cunangaman na uyangapaj munashcanguichu.

17Chaimandami Mandaj Diosca, cashna nin: Caita rurajpimi ñucataca, Mandaj Dios cajta yachangui. Ricui cunanga, ñucami cai jatun yacupi ñuca maquipi charijuj caspihuan huactasha. Chashna huactajpimi, yacuca yahuarman tigranga.

18Shina rurajpimi, jatun yacupi tiaj pijicunapash huañujpi, yacupash ashnayanga. Shina tucujpimi Egiptopi causajcunaca, jatun yacumanda yacuta ufiangapaca millanayachinga’ ninmi ningui— nijurcami.

19Mandaj Diosca, Moisestaca cashnami nirca:

—Aarondaca cashna ningui: ‘Cambaj vara caspita japishpa, yacucuna yahuarman tigrachun cambaj maquitaca, Egiptopi tiaj yacucunapi, paicunapaj jatun yacucunapi, paicunapaj jatun larca yacucunapi, paicunapaj yacu cuchayashcacunapi, tucui maipilla yacuta alichishca tiajcunapi chutangui. Tucui Egipto llactapica, caspita rurashca, rumita rurashca jarracunapi tianajuj yacucunapash, yahuarman tigrachun chashna rurangui’ ningui— nircami.

20Moisespash, Aaronbash, Mandaj Dios mandashcashnallatami ruranajurca. Faraonbash, paipaj servijcunapash ricujtami Aaronga, vara caspita alsashpa jatun yacucunata huactarca. Shina huactajpimi, tucuilla jatun yacucunaca yahuarman tigrarca.

21Shinallata jatun yacupi tiashca pijicunapashmi huañurca. Yacupash, Egipto llactapi causajcuna na ufiai ushangacamanmi, huaglishpa ashnajurca. Tucuilla Egipto llactapimi, yahuar tiarca.

22Shinallata Egiptomanda yumbucunapash, muspachinata paicuna yachajushcahuanmi, chashnallata ruranajurca. Ashtahuangarin Mandaj Dios imashna nishcashnallatami, Faraonbaj shunguca shinlliyarca. Shinamandami, paicunataca na uyanayachirca.

23Faraonga, chaitapash na uyanayachishpallatami, paipaj huasiman tigrarca.

24Jatun yacupi tiaj yacucunata na ufiai ushanajushpami, tucuilla Egipto llacta jatun yacu manñacunapica, yacuta ufiangapaj pugyucunata allanajurca.

25Mandaj Dios, jatun yacuta yahuarman tigrachishca jipamandaca, canchis punllacunami yalirca.