PROVERBIOS 8 - Quichua Imbabura Bible

Ali Yachaica, causaita causaicaman juyaillagupachami

1¿Nachu ali yachaica caparijun?

¿Nachu ali yuyaipash, shinllita caparijun?

2Ñan lado pata jahuacunapi, purina

ñan cruzarijuj esquinacunapimi shayarin.

3Pungu ladocunapi, puebloman yaicunacunapi

pungu yaicunacunapimi, cashna nishpa shinllita caparijun:

4“Gentecuna, cangunatami caparijuni.

Huañuna aichayu runacunamanmi, shinllitapacha villajuni.

5Nara yachajushcacuna, aliguta yarishpa

purinata yachajuichi.

Shinlli shungucuna cangunapash,

aliguta yarishpa causaichi.

6Uyahuaichi, juyailla ali shimicunatami rimagrini.

Ñuca shimihuanga, aligutallami yachachigrini.

7Ñuca shimihuanga, na llullashpami yachachigrini.

Diosta na manllashpa, ñuca shimihuan

rimanataca millanayachinimi.

8Ñuca shimihuan yachachishca tucui

yuyaicunaca chashnapachami.

Cai shimicunapica, ima nalipash,

ima pandapash na tianllu.

9Tucui cai shimicunaca, entendij

runapaca, aligutalla ruranami.

Ali yachaita tarishcacunapaca,

yuyaita japinalla shimicunami.

10Culquipaj randica, ñuca yachachishcata chasquichi.

Ashtahuan ali oropaj randica, yachajunata japichi.

11Ali yachaica, ninan valishca

juyailla rumicunatapash yalimi.

Chaitaca, tucui imatalla munashcahuambash,

na chimbapurai ushanallachu.

12Ali yachai ñucaca, aliguta

yarishpa purijcunahuanmi causajuni.

Chaimandami, ali yuyaicunata cushca

ali yachaita tarini.

13Mandaj Diosta manllanaca,

nalita ruranata millanayachinami.

Jariyashpa jatun tucunapash, ninanda jariyanapash,

nalita ruranaman apajuj ñanmi.

Jatun nalita rimanajujtaca millanayachinimi.

14Aliguta yarichinapash, aligutapacha

ricushpa mandanapash ñucahuanmi.

Ñucami ali yachai cani.

Ninan ushaipash ñucapajmi.

15Ñucamandami, jatun mandajcunapash mandanajun.

Ñucamandami mandajcunapash, imatapash

cashcatapacha rurachun mandanajun.

16Ñucamandami, mandajcunaca mandashpa charin.

Tucui mandajcunapashmi, aliguta

ricushpa llactata mandanajun.

17Ñucata juyajcunataca, ñucapash juyanimi.

Tutamandata ñucata mascajcunaca tarihuanmi.

18Charijyanapash, alicachi tucunapash ñucahuanmi.

Na tucurinalla charinacunapash, imatapash

cashcatapacha ruranapash ñucahuanmi.

19Ñuca yachachishcapash, orota yali ashtahuan alimi.

Mapata anchuchishpa punchayachishca orotapash yali alimi.

Ñuca caranacunaca, ashtahuan ali culquitapash yalimi.

20Imatapash cashcatapacha rurana ñandami pushasha.

Aligutapacha ricushpa mandanamanmi,

chaqui ñan chaupita pushasha.

21Ñucata juyajcunataca, paicuna japinatallata

japinajuchunmi, chashna pushasha.

Juyailla alicunatapashmi, alichinacunapi jundachisha.

22Mandaj Diosca callarimandapachami,

imata ruraitapash nara callarishpallata, punda

huatacunamandapacha ña charihuarca.

23Callarimandapacha causaita causaicamanmi,

cai pacha nara tiajpillata, mandanataca ña charircani.

24Manllanayai ucu ucu yacucunapash

nara tiajpillatami, ña churahuarca.

Ashtaca yacucuna tugyajuj pugyucunapash

nara tiajpillatami, ña churahuarca.

25Urcucunatapash, lomacunatapash nara

rurashpallatami, ñucataca ña churahuarca.

26Cai pachatapash, pambacunatapash

nara rurashcachu carca.

Cai pachapi ñutu alpatapash nara rurai

callarishcachu carca.

27Jahua pachata rurajujpica,

ñucapash chaipimi carcani.

Manllanayai ucu ucu yacucunata, jahua

muyundita señalajujpipash, chaipimi carcani.

28Jahuapi, jahua pachata shinllita churajujpipash,

manllanayai ucu ucumanda yacu tugyajuj pugyucunata

shinllita churajpipash, chaipimi carcani.

29Pai mandashpa saquishcamanda, mama cucha yacu

maimambash ama llujshichun mandajujpi,

cai pacha callari rumicunata churajujpi chaipimi carcani.

30Tucui chaicunatami, Dioshuan alichijurcani.

Maimambash na anchurishpami, paitaca

punllandi cushichijurcani.

Paipaj ñaupajpimi, cushijushca causajurcani.

31Gentecuna causana cai pachata rurashcamandami cushijuni.

Huañuna aichayu runacunahuanmi cushijuni.

32Cunanga huahuacuna, uyahuaichi.

Ñuca yachachishcacunata catijcunaca, ninandami cushijun.

33Ali yuyaita ñuca cushcata

ali uyashpa, yachajushcacuna caichi.

Chaitaca, na yangapi churanachu canguichi.

34Ñuca yachachishcata uyangapaj, ñuca huasi

pungupi punllandi shuyajuj runaca, ninandami cushijun.

Paica, ñuca huasi pilar ladocunapimi shuyajun.

35Ñucata tarijca, causaita taringami.

Mandaj Diospaj juyaitapashmi taringa.

36Ashtahuangarin juchata rurashpa ñucata

fiñachijca, paipaj almatami llaquipi churan.

Ñucata tucui fiñajcunaca, huañuitami

juyanajun” nishpami caparijun.