1Jatun mandaj Nabucodonosor runaca, llactata ishcai huatata ña mandajushpami, muscuicunata charirca. Chaimandami, paipaj yuyaipi ninanda musparishpa, puñuitapash na ushajurca.
2Shina cashpami jatun mandajca, yachajcunata, luzerocunata ricujcunata, brujocunata, caldeo purallata yachajcunata cayachun cacharca. Paicuna shamushpaca, jatun mandajpaj ñaupajpimi shayarinajurca.
3Paicunamanmi, jatun mandajca cashna nirca:
—Ñucaca, shuj muscuitami charishcani. Chai muscuita yachangapaj munashpami, ñuca yuyaipica ninanda musparijuni— nircami.
4Shina nijpimi, chai caldeocunaca jatun mandajtaca, arameo rimaipi cashna ninajurca:
—Jatun mandajlla, cambaj causaica causaita causaicaman cachun. Can muscushcataca, canda servij ñucanchiman parlapailla. Chai muscui ima cajtapash villashunllami— ninajurcami.
5Shina nijpimi jatun mandajca, chai caldeocunataca, cashna nijurca:
—Imata muscushcatapash cungashcanimi. Imashna muscushcatapash, chai muscui ima cajtapash na villashpaca, ñutui tucunguichimi. Cangunapaj huasicunapash, mapata shitana pushtucunami tucunga.
6Ashtahuangarin imashna ñuca muscushcata, chai muscui ima cajta villajpica, ashtaca alicunatami carasha. Cangunapaj ima ali canatapash, alicachi tucunatapashmi cusha. Shina cashpaca ñuca muscushcatapash, chai muscui ima cajtapash villahuaichilla— nijurcami.
7Shina nijpica, cutinllatami cashna nishpa tigrachinajurca:
—Jatun mandajlla, can muscushcataca canda servij ñucanchiman villayari. Shina villajpica, chai muscui ima cajtapash villashunllami— ninajurcami.
8Chaimandami jatun mandajca, cashna nishpa tigrachirca:
—Cangunaca, ñuca muscushcata ña cungashcata yachashpami, imatapash juchachishpa na ucha villangapaj munanguichi. Canguna chaita yarinajujtaca, ñami ñucaca yachani.
9Ñuca muscushcata canguna na villashpaca, huañuchi tucunallami cangunapaca tianga. Cangunaca, llullashpa ñucaman villangapaj munashpami, na ucha villashpa jatun nalitapacha yarinajunguichi. Ñuca muscushca ima cajta canguna villai ushanata ñuca yachangapaca, ñuca muscushcatara villahuaichi— nijurcami.
10Shina nijpimi caldeocunaca, jatun mandajpaj ñaupajpi cashna nishpa tigrachinajurca:
—Jatun mandajlla, can tapushcataca tucui cai pachapi causaj runacunamandaca, pipash na tigrachi ushangachu. Ashtahuangarin yachajcunata, luzerocunata ricujcunata, caldeo purallata yachajcunataca, maijan jatun mandajpash, maijan mandajpash, maijan jatun amopash, can tapushcashnaca, na tapushcachu.
11Can jatun mandaj tapushcata tigrachinaca, yapa shinllimi. Can jatun mandajman chaita villaitaca, pipash na ushangachu. Dioscunallami, chaitaca tigrachi ushanga. Paicunaca, na runacunahuan causanllu— ninajurcami.
12Shina nijpi jatun mandaj ninanda fiñarishpami, Babilonia llactapi causanajuj alipacha yachajushcacunataca, tucuillata huañuchinajuchun mandarca.
13Chai alipacha yachajushcacunata huañuchinajuchun mandashcataca escribichishpami, tucuicunaman villachirca. Danieltapash, paipaj quimsa cumbacunatapashmi huañuchingapaj mascanajurca.
14Paicunata japijpimi Danielca, jatun mandajta cuidaj soldadocunata mandaj Arioc shuti runataca, ali yachaihuan aligutapacha yarishpa rimarca. Chai mandajmi, Babilonia llactapi causaj alipacha yachajushcacunataca, huañuchingapaj llujshishca carca.
15Danielca, jatun mandaj churashca chai Arioc shuti mandaj soldadotami, cashna nishpa tapurca:
—Jatun mandajca, ¿imamandata chai mandashcata escribichishpa, ñapash tucuicunaman villachishca?— nircami.
Shina nijpimi imamanda chashna rurashcatapash Arioc shuti runaca, Danielman villarca.
16Shina villajpimi Danielca, jatun mandajpajman yaicushpaca: “Huaquin punllacunata shuyapaira. Can jatun mandaj muscushcacuna ima cajtaca, ñuca villashallami” nishpa mañarca.
17Chai jipaca Danielca, paipaj huasiman rircallami. Ña chayashpaca, paipaj cumba Ananías, Misael, Azarías yachachunmi, tucuita villarca.
18Jahua pachapi causajuj Taita Dios llaquishpa, pipash na yachai ushashcata ricuchijuchun nishpa mañachunmi, chashna villarca. Danielpash, paipaj cumbacunapash, Babilonia llactapi causanajuj alipacha yachajushcacunahuan ama huañungapajmi, chashna mañachun villarca.
19Chashna mañajpimi pipash na yachashcataca, tuta muscuipi Danielman ricuchirca. Chaimandami Danielca, jahua pachapi causaj Taita Diostaca, ninanda alicachirca.
20Danielca cashnami nijurca: “Taita Diospaj shutica, causaita causaicaman alimari cangui ni tucushca cachun. Ninan ushaipash, ali yachaipash paipajmi.
21Paimi punllacunatapash, huatacunatapash, shujman tigrachin. Paimi, jatun mandajcunatapash llujchin. Paillatami, jatun mandajcunatapash churan. Paimi, alipacha yachajushcacunamambash ali yachaita cun, ali yuyaita charijcunamambash yachajunatami cun.
22Ucu ucupi ima pacalla tiajtapash, paimi ricuchin. Yana yana tutapi pacalla tiajtapash, paica yachanmi. Michaca, paihuanmi tian.
23Ñuca ñaupa taitacunapaj Taita Dioslla, candami pashi nishpa alicachijuni. Canmi ali yachaitapash, ushaitapash carahuashcangui. Cunanga, ñucanchi mañashcata uyashpami, chaita ricuchihuashcangui. Jatun mandaj tapushcatami, ñucanchiman ricuchihuashcangui” nijurcami.
24Chai jipami Danielca, Arioc shuti runapajman rirca. Chai runatami, jatun mandajca Babilonia llactapi causanajuj alipacha yachajushcacunata huañuchijuchun mandashca carca. Paitami Danielca, cashna nirca:
—Babilonia llactapi causanajuj alipacha yachajushcacunataca, ama huañuchipaichu. Ñucataca, jatun mandajpaj ñaupajmambash pushahuailla. Pai muscushcacuna ima cajtaca, ñuca villashallami— nircami.
25Shina nijpimi Arioc shuti runaca, Danieltaca jatun mandajpajman ucha pushashpa, cashna nirca:
—Judá llactamanda prezu apamushca purapimi, shuj runata tarircani. Paimi, can jatun mandaj muscushcacuna ima cajtaca villanga— nircami.
26Shina nijpimi jatun mandajca, Beltsasar nishca Danieltaca:
—Ñuca muscushcata, chai muscushcacuna ima cajtaca, ¿canllu villai ushagringui?— nishpa tapurca.
27Shina nijpimi Danielca, jatun mandajpaj ñaupajpi cashna nishpa tigrachirca:
—Jatun mandajlla, pipash na yachai ushashcata can tapushcataca, alipacha yachajushcacunapash, luzerocunata ricujcunapash, yachajcunapash, yumbucunapash, can jatun mandajman villaitaca na ushanllu.
28Shina cajpipash jahua pachapimi, pipash na yachai ushashcacunata ricuchij Taita Dios tian. Paimi, tucurimui punllacunapi ima tucunatapash, can jatun mandaj Nabucodonosor runaman ricuchishca. Ricui, cashnatami muscushcangui: Cambaj camapi cashpaca, cashnatami muscuipishna ricushcangui:
29Jatun mandajlla, canga cambaj camapi cashpami, jipa punllacuna ima tucunata yachangapaj munajurcangui. Chaimandami, pipash na yachai ushashcacunata ricuchijca, jipa punllacuna ima tucunata canman ricuchishca.
30Pipash na yachai ushashcataca, ñucamanmi ricuchihuarca. Tucui cai pachapi causajcunata ñuca yali yachajushca cashcamandaca, na ricuchihuarcachu. Ashtahuangarin can jatun mandaj muscushcacuna ima cajta canman villachun, cambaj shungupi yarijushcacunata can yachai ushachunllami ricuchihuarca.
31Can jatun mandajca, shuj jatun runaman rijchajtami, ñapash cambaj ñaupajpi shayarijta ricurcangui. Chai runaman rijchajca, manllanayai jatun, ñavipash ninanda punchayachijujmi carca.
32Chai runaman rijchajpaj umaca, alipacha oromi carca. Cungamanda vijsacamambash, rigracunapash culquimi carca. Vijsamanda uraica, broncemi carca.
33Changacunaca, jirrumi carca. Chaquipash, ashaca jirru, ashaca cusashca turuhuan chapumi carca.
34Chaita ricujujpillatami shuj rumica, maquihuan na faquijpillata faquirishpa shamujta ricurcangui. Chai rumica, runaman rijchajpaj chaquipi huactarijta shamushpami jirruhuan, cusashca turuhuan chapushpa rurashca chaquitaca faquishpa ñuturca.
35Chai rumi huactajpimi jirrupash, cusashca turupash, broncepash, culquipash, oropash ñuturirca. Tamia pascarishca punllacunapi trillashca ñutu jupashnami tucurca. Chaitaca, huaira shamushpami, imatapash na saquishpa tucuillata aparca. Ashtahuangarin chai runaman rijchajta ñutuj chai rumica, tucuilla cai pacha junda, jatun urcumi tucurca.
36Cashnatami muscurcangui. Chai muscui ima cajtaca, can jatun mandajpaj ñaupajpimi villagrinchi.
37Jatun mandajlla, canga jatun mandajcunata jatun mandajmi cangui. Llactacunata mandanata, ninan ushaita, ninan shinlli canata, mandana ushaitaca, jahua pachapi causajuj Taita Diosmi canman cushca.
38Huañuna aichayu runacuna maipilla causanajujta, sacha animalcunata, jahuata rij alasyu animalcunataca, tucuitami cambaj maquipi churarca. Tucuitami, can mandachun curca. Chai oro umaca, canllatami cangui.
39Cambaj jipaca, shuj llactami mandangapaj jataringa. Chaica, na cai llactata mandajunshna shinlli cangachu. Ishcaipaj catipashmi, shuj llacta mandangapaj jataringa. Chaica, bronceshnami canga. Chaimi, tucui cai pachata mandanga.
40Quimsapaj cati mandajuj shuj llactaca, jirrushna shinllimi canga. Imashnami jirruca faquishpa ñutushpa tucuchin, chashnallatami paica tucuillata ñutushpa tucuchinga.
41Shinallata chaquicunapi, dedocunapica, ashataca mangata rurajcuna cusashca turuhuan, ashataca jirruhuan rurashcatami ricurcangui. Chaica, ishcaipi shicanyarishca shuj llacta mandajujtami ricuchijun. Ashtahuangarin imashnami ashataca jirruhuan, ashataca cusashca turuhuan ricurcangui, chashnallatami chai llactapipash jirrushna shinlli mandaj tianga.
42Chaqui dedocunapash, ashaca jirru, ashaca cusashca turutami ricurcangui. Chashnallatami, ishcaipi shicanyarishca llactaca, chaupica shinlli, chaupica urmanalla llacta canga.
43Jirruhuan, turuhuan chapushpa rurashcata can ricushcashnallatami, runa puralla ari ninajushpa tandanajunga. Ashtahuangarin jirruca, turuhuanga na chapurinllu. Shinallatami paicunapash, caishujmanda chaishujmanda na tandanajunga.
44Chai jatun mandajcuna mandajui punllacunapimi, jahua pachapi causajuj Taita Diosca, ima horapash na tucuchi tucuna mandana llactata churanga. Chai mandana llactataca, na shuj llacta runacunaman cungachu. Chai mandajca, cai tucuilla mandana llactacunatami ñutushpa tucuchinga. Ashtahuangarin paica, causaita causaicaman mandajungallami.
45Maquihuan na faquijpita, shuj rumi faquirishpa urcumanda shamushpaca, jirruta, bronceta, turuta, culquita, orotapash ñutujtami ricurcangui. Chaitaca, jipa punllacunapi chashna tucunatami Jatun Taita Diosca, can jatun mandajman ricuchishca. Chai muscuica, napacha llullachu. Chai muscui ima cajtapash, chashnapacha tucunatami villani— nijurcami.
46Shina villajpimi, jatun mandaj Nabucodonosor runaca, Danielpaj ñaupajpi cungurishpa, ñavi alpaman chayajta urai cumurirca. Chaimandami, ima alicunata caranajuchumbash, inciensota cushnichinguichi nishpapash mandarca.
47Jatun mandajca, Danieltaca cashnami nirca:
—Cunanga yachanimi. Cangunapaj Taita Diosca, tucui dioscunapaj Taita Diosmi, jatun mandajcunatapash Mandajmi. Pipash na yachai ushashcacunatapash ricuchijmi. Chaimandami, pipash na yachai ushashcataca, ñucaman villai ushangui— nircami.
48Shina nishpami jatun mandajca, Danieltaca jatunyachirca. Ninanda alicachishpami, ashtaca alicunatapash cararca. Paitaca, tucui Babilonia llactata mandaj cachunmi churarca. Shinallata Babiloniapi causanajuj tucuilla alipacha yachajushcacunata mandaj cachumbashmi churarca.
49Jatun mandajta Daniel mañajpimi, Sadrac, Mesac, Abed-nego shuti paipaj cumbacunatapash, Babilonia llactapi imatapash ricushpa mandanajuchun churarca. Danielca, jatun mandaj tiajuj ucupimi quedarca.
Who We AreWhat We EelieveWhat We Do
2025 by iamachristian.org,Inc All rights reserved.
