ISAÍAS 5 - Quichua Imbabura Bible

Uvas chagrahuan chimbapurashpami parlashca

1Cunanga, ñuca juyashca cumbagumandami candagrini. Ñuca juyashca cumbagu tarpushca uvas chagragumandapashmi candagrini: Ñuca juyashca cumbaguca, urcu vichai ali alpapimi, uvas chagrata charirca.

2Chai alpataca, jatun pircahuan jarcashpami, muyundi rumicunata tucuillata anchuchishpa, ashtahuan ali fucuj uvascunata agllashpa tarpushca carca. Chai chagra chaupipica, jatun torretapashmi shayachishca carca. Uvasta cutana pushtupipashmi rurashca carca. Chai chagramandaca, ali uvasta japisha yashpa shuyajujpica, sacha uvascunarami fucushca carca.

3Shina cashcamanda cunanga, Jerusalén ladollapi causajcuna, Judá llactapi causaj runacuna ñucatapash, ñuca uvas chagratapash, cangunallata ricushpa aliguta yarichi.

4¿Ñuca uvas chagrapica, imata ashtahuan rurana carcani? ¿Imatata na rurashpa saquishcani? Ñucaca, ali uvas fucushcanman yashpami shuyajurcani. ¿Imashpata sacha uvascunara fucushca?

5Cunanga, ñuca uvas chagrata imatalla ruranatami ricuchigrini: Muyundi pircata urmachishpami, tucuchi tucuchun saquigrini. Pipash yaicushpa saruchunmi, pircatapash t'unigrini.

6Jichushca pamba cachunmi saquigrini. Na fucuj yurapaj malquicunatapash, pipash na fitingachu, pipash na jalmangachu. Ashtahuangarin cashacuna, nali jihuacunami jundanga. Fuyutapash, cai chagra jahuapica, ama tamiachijuchunmi mandagrini.

7Israelcunaca, tucuita Mandaj Diospaj uvas chagragupachami. Judá llactapi causaj runacunaca, cushijushpa pai tarpushca juyailla yuracunami. Diosca, aliguta ricushpa mandachunmi munarca, ashtahuangarin yangacunami tucushca. Imatapash cashcatapacha ruranajuchunmi munarca, ashtahuangarin ninanda caparinajuillami tian.

Nalicunataca llaquichingami

8Huasicunatapash shujta shujta huasichijcuna, alpacunatapash, tucuita cangunalla japishpa mirachijcuna, ¡aij imachari tucunguichi! ¿Tucui llactapichu, cangunalla causagringuichi?

9Tucuita Mandaj Diosca, ñuca rinripimi cashna nihuarca: “Chai ashtaca, juyailla jatun huasicunapica, pipash na causangachu. Chaicunaca, llaquinayaitami tucuchi tucunga.

10Quimsa hectaria uvas chagramandaca, quimsa chunga canchis litro vinollami llujshinga. Chunga quintal chaupi muyumandaca, chaupi quintal granollami fucunga” nihuarcami.

11Machangapaj tutamandata jatarijcunalla, ¡aij imachari tucunguichi! Paicunaca, nina japirinshna machangacamanmi, amsayangacaman ufianajun.

12Jatun micuicunata rurashpa, vinota ufiashpami arpacunata, salteriocunata, tamborcunata, gaitacunata tocashpa, Mandaj Dios imatalla rurashcataca, ricuitallapash na ricushpa, yaritapash napacha yarishpa cushijunajun.

13Chashna causashpa, ñucata na rijsishcamandami, ñuca agllashcacunaca prezu apai tucurca. Chaipimi, paicuna juyailla cashca cashpapash, yarjaimanda huañurca. Shinallata ashtacacunami, yacunayaimanda chaquishpa huañurca.

14Seolpash, chai ucupi tiajta langangapaca, ninandami shimita pascashca. Chaimanmi, paicuna juyailla cashcapash, ashtaca gentecunapash paicunahuan ninanda cushijushpa causashcacunapash, urai rinajunga.

15Chaipimi runacunaca, pingai tucushpa urai cumurinajunga, ñavita urai cumuchi tucunajunga. Ñavi alsashca purijcunapaj ñavitapashmi, urai cumuchinga.

16Ashtahuangarin tucuita Mandaj Diosca, aliguta ricushpa mandashpami, jatunyachi tucunga. Jucha illaj Taita Diosca, imatapash cashcatapacha rurashpami, jucha illaj Diosmi cangui ni tucujunga.

17Maltun llamagucunataca, paicuna michin cashcashnallatami michinajunga. Charijcuna jichushpa saquishca pambacunapi fucushcataca, na rijsishca runacuna shamushpami, micushpa tucuchinga.

18Nalita ruranataca, huascahuan aisamunshna yangata rurajcunapash, juchata ruranataca carretata aisachina angucunahuan aisamunshna rurashpa causajcunapash, ¡aij imachari tucunga!

19Paicunaca, cashnami ninajun: “Ñucanchi ricuchun, Taita Dios rurangapaj munashcataca, ucha rurashpachari ali canman. Israelcunapaj jucha illaj Diosca, ñucanchi yachachun pai yarijushcataca, ña rurashpachari ali canman” ninajunmi.

20Nalitara alimi nishpa, alitara nalichu nijcunaca, ¡aij imachari tucunga! Paicunaca, michataca yana yana nishpami, yana yana tutatara michami ninajun. Jayajtaca mishquimi nishpami, mishquitaca jayajmi ninajun.

21Paicunallata, alipacha yachajushcami canchi, aligutapacha yarishpa purijcunami canchi yashpa causajcunaca, ¡aij imachari tucunga!

22Vinota ufiangapajpash jariyashcacuna, ufianacunata chapushpa alichingapajpash, alipacha tucushcacunaca, ¡aij imachari tucunga!

23Paicunaca, imatapash pacalla cujpi japishpami, Diosta na manllaj runatara alipi llujchinajun. Chashna rurashpami, imatapash cashcatapacha ruraj runa japinataca quichunajun.

24Shinamandami paicunaca, nina rupashpa ujshata tucuchijpishna, jupata ninapi rupachijpishna tucurinajunga. Sapi ismushca yurashnami canga. Juyailla sisacunashna cashpapash, ñutu alpata huaira apashcashnami canga. Paicunallatami, tucuita Mandaj Dios mandashcata fiñashpa, israelcunapaj jucha illaj Diospaj Shimitaca, millanayachishpa saquinajurca.

25Shinamandami Mandaj Diosca, pai agllashcacunahuanga nina japirinshna ninandapacha fiñarirca. Chashna fiñarishpami, paipaj maquita chutashpa paicunata chugrichirca. Urcucunapash chujchujpimi, huañushcacunapash chaupi ñangunapi shitai tucunajurca. Chashna rurashpapash, ninandapacha pai fiñarishcamandaca, nara ali tucunllu. Ashtahuangarin llaquichingapaj, paipaj maquita chutashcarami shuyajun.

26Caru llactapi causajcunataca, banderata alsashpami Diosca cayanga. Cai pacha tucuri manñacunapi causajcunataca, silbashpami cayanga. Ricuichi, pai cayajta uyashpami, ucha shamushpa ñapash chayamunajunga.

27Paicuna purapica, pipash na shaijungachu. Nitijaitallapash, pipash na nitijangachu. Pipash na puñungachu, puñuillapash na japingachu. Paicuna chumbilirishcatapash, pitapash na pascachi ushangachu. Chaquipi churajushcata huatarishcallapash, na fitiringachu.

28Paicunapaj flechacunapash, filo filota rurashcami canga. Tucui arcocunatapash, ña chutashcallami charinajunga. Caballocunapaj sillucunapash, yacu rumishna shinllipachami canga. Carretacunapaj ruedacunapash, acapanashnami calpanga.

29Paicuna caparishcapash, león huacajunshnami canga. Huahua león huacanshna caparishpa, quiruta canirishpami, imatapash japishpa apanajunga. Chashna apanajujpica, pipash na quichui ushangachu.

30Chai punllapica, mama cucha huacashpa jatarinshnami, ninanda caparinajunga. Shina caparinajujpimi, chai llactata ricujpica, yana yana tutapi jatun llaqui ricuringa. Jahua pachapi punchayachijujpash yanayangami.