1Juyashca crijcuna, cai cartahuanga ña ishcai viajetami, cangunaman escribini. Cai ishcandi cartapimi, mapa illaj cangunapaj yuyaita rijchachinshna aliguta yarichijuni.
2Diospajlla causanajuj, Profetacuna imata villashcatapash, Quishpichij Apunchi Jesús villachun cachashcacuna, pai mandajpi villashcatapash cangunapaj yuyaipi charichunmi yarichijuni.
3Caitara pundaca yachaichi: Tucurimui punllacunapica, paicunapaj munai nalita rurajcuna, asishpa ricuj runacunami shamunga.
4Chaicunaca, cashnami ninga: “Cristo tigramushami nishcapash, ¿maita pactanyari? Taitacuna huañushca punllamandapacha imapash chashnallata tiajunllami. Shinallata tucui ima tiachumbash Dios churashca punllamandapacha cunangaman chashnallatami” ninajungami.
5Pundallatami jahua pachatapash, cai pachatapash Taita Diosca, shimihuan rimashpalla rurashca. Chaitaca, paicunapaj munaillatami na imatapash yachan. Alpaca, yacumandami llujshimushca, chaicunaca yacumandallami tian.
6Shinamandami ñaupa punllacunapica, cai pachapi ima tiashcapash, yacupi huashajushpa tucurishca.
7Ashtahuangarin cunambi tiajuj cai pachapash, jahua pachapash, Dios tiachun nishca punllacamanllami tianajun. Chaicunataca, pai rimashpalla ninahuan tucuchingapajmi, paita na manllaj runacunandi, Dios ricuchishpa llaquichina punllacaman alichishca tianajun.
8Juyashca crijcuna, caitaca yachanapachami canguichi: Jatun Diospaca, shuj punllallami huaranga huatashnalla, huaranga huataca shuj punllashnallami.
9Huaquingunaca: “Apunchi Jesusca, na ucha shamunllu” ninajunmi. Shina cajpipash pai tigramushami nishcataca, uchami pactachinga. Ashtahuangarin shujllapash ama chingaita chingagrichunmi, na ñapash fiñarishpa, ñucanchita llaquimandalla nara shamun. Ninanda llaquirishpa, tucuicuna Diospajman tigrarichunmi shuyajun.
10Ashtahuangarin tuta shuhua shamunshnami, Apunchi Jesusca cungashcapi shamunga. Chai punllapimi jahua pachaca, ninanda culunlla cuyushpa, tucui ima tiashcapash rupashpa tucuringa. Cai pachapash, chaipi tucui tiashcacunandimi rupachi tucunga.
11Chashna tucui ima tiashcatapash tucuchina cajpimi, ¡Taita Diostalla tucui shunguhuan yariashpa, paipajlla causana canguichi!
12¡Taita Dios shamuna punlla ucha chayamuchun yashpami, chapariana canguichi! Chai punllapimi, jahua pachatapash ninahuan rupachishpa tucuchinga. Shinallata tucui ima tiashcacunapash, rupashpami yacuyanga.
13Ashtahuangarin ñucanchica, jahua pachatapash, cai pachatapash mushujtami rurasha nishcatami shuyanajunchi. Chaipimi, imatapash cashcatapacha ruranaca causajun.
14Juyashca crijcuna, shinamandami cangunaca chashna tucunacunata shuyashpa, imata cashpapash ucha rurana canguichi. Na mapayashca, na juchachi tucushpa, casilla ali causaita charijta Dios japij shamunatami yariana canguichi.
15Pitapash quishpichingapaj munashpami, ñucanchi Apunchi Jesusca, nara shamushpa shuyajun. Chaitaca yachanami canguichi. Shina cajpimi, ñucanchi juyashca huauqui Pablopash, Dios imashna paiman alipacha yachachishcashnallata, cangunaman escribishca.
16Pabloca, pai escribishca cartacunapica, caicunamandaca ashamandallami na tucuilla cartacunapi yachachishca. Chai carta puracunapi huaquingunataca, na yachai ushanallami tian. Chaicunatapash, Dios escribichishca shuj Shimicunatapash, chaira yachajuj na ali crijcunaca, pandatami yachachinajun. Shina cashpami, chingaita chingagringa.
17Juyashca crijcuna, shinamandami canguna pundata ña yachashcamandaca, aligutapacha cuidarina canguichi. Nalita rurajcuna pandata yachachijpira canguna shinllita catinajushcataca saquinguichiman.
18Ashtahuangarin viñanshnami Diospaj ninan juyaimanda, ñucanchita Quishpichij, Apunchi Jesucristomanda ashtahuan yachashpa catina canguichi. Paitaca cunambash, causaita causaicamambash punchapambami cangui ninami canchi. Shina cachun.
Who We AreWhat We EelieveWhat We Do
2025 by iamachristian.org,Inc All rights reserved.
