Psalms 9 - Quichua Imbabura Bible

Taita Diostaca, imatapash cashcatapacha rurashcamandami, pashi nishcaMut-labén nishca tonopi, candajcunata mandaj candachijuchun, David rurashca Salmomi.

1Mandaj Dioslla, tucui

shunguhuanmi candaca alicachisha.

Can tucui ima juyailla rurashcacunataca villashami.

2Ñucaca cushijushami, ñucaca

ninandami canhuanga cushijujusha.

Jahua pachapi causajuj Dioslla,

cambaj shutitaca candajushallami.

3Ñucata fiñajcunaca huashaman tigrashpami,

cambaj ñaupajpi urmashpa tucurinajurca.

4Ñuca japinatallata japinatapash, imamanda

japina cashcatapash ricushpami charishcangui.

Canmi, mandangapaj tiarinapi tiarishpa,

imatapash cashcatapacha rurashpa mandajungui.

5Llactacunapi causajcunataca, canmi

jarcashpa rimaparcangui.

Nalicunataca, canmi tucuchircangui.

Paicunapaj shutitaca, na tucurina causaita

causaicamanmi chingachircangui.

6Fiñajcunaca huañushcamari.

Causaita causaicamanmi, llaquinayaita tucuchi tucushca.

Paicunapaj pueblocunatapashmi tucuchircangui.

Paicunata yarinapash, chaipimi tucurirca.

7Ashtahuangarin Mandaj Diosca, causaita

causaicaman causajungallami.

Paica, llaquichingapajpash mandangapaj

tiarinata ñami alichishcalla.

8Paimi cai pachataca, imatapash

cashcatapacha rurashpa mandajunga.

Llactacunapi causajcunatapash,

alipacha ricushpami mandajunga.

9Imagutapash na charij runapaj pacajunaca,

Mandaj Diosmi canga.

Paica, llaquichijui punllacunapi pacajunami canga.

10Cambaj shutita rijsijcunaca,

candami yariashpa causanajunga.

Mandaj Dioslla, shinamandami canda

mascajcunataca, napacha jichurcangui.

11Sionbi causajuj Mandaj Diosta candaichiyari.

Pai imatalla rurashcacunatapash,

gente purapi villaichiyari.

12Huañuchishpa yahuarta jichashcamanda llaquichij

Diosca, paicunatapash yarishpa llaquichircami.

Llaquihuan cashpa caparishpa

mañajcunataca, na cungarcachu.

13Mandaj Dioslla, ñucataca llaquihuayari.

Ñucata na ricunayachijcuna llaquichijpi

llaquita apajujtaca ricuhuayari.

Huañuica ña pungupishna cajpipash,

canmi jatarichihuangui.

14Canda tucui alicachinacunata, Sion pueblo

pungucunapi villajuchun can quishpichishcamanda,

ninanda cushijuchunmi chashna jatarichihuangui.

15Llactacunapi causajcunaca, paicunallata

rurashca utujupimi huashajunajurca.

Paicuna pacashpa churashca linllipillatami,

paicunapaj chaquica tsagnarinajurca.

16Mandaj Diosca, chashna llaquicunata

cachamushpami, rijsishca tucurca.

Nali runaca, paipaj maquihuan

rurashcapillatami lazuri tucurca.

17Taita Diosta cungashpa causaj tucui nali

gentecunaca, Seolmanmi apai tucunajunga.

18Ashtahuangarin imagupash illaj runataca,

na causaita causaicaman cungangachu.

Imagutapash na charijcuna shuyanajushcapash,

na tucui causaicaman chingangachu.

19Mandaj Dioslla, shayaripairi.

Gentecuna shinlliyachunga, ama saquipaichu.

Ashtahuangarin llactacunapi causajcunaca,

cambaj ñaupajpillata llaquichi tucuchunlla.

20Mandaj Dioslla, paicunapica manllana

yuyaita churapairi.

Llactacunapi causajcunaca, imapash na cashpa,

runacunalla cashcata yachanajuchun yuyaita cupairi.