JEREMÍAS 35 - Quichua Imbabura Bible

Recab shuti runapaj miraicunaca, ali cazujcunami cashca

1Josías shuti runapaj churi jatun mandaj Joacim shuti runa, Judá llactata mandajui punllacunapimi, Mandaj Diosca cai shimicunata Jeremiasman cashna nishpa villarca:

2“Recab shuti runapaj miraicunapajman rishpa, paicunahuan parlagri. Chai jipaca, Mandaj Dios ñuca huasipi tiaj maijan ucumambash pushamushpa, vinota ufiachun carai” nircami.

3Shina nijpimi Jeremías ñucaca, shuj Jeremiaspaj churi Jaazaniasta pusharcani. Chai Jeremiaspaj taitaca, Habasinías shuti runami carca. Jaazanías shuti runataca, paipaj huauquicunandi, paipaj tucui churicunandi, recabita nishca tucui familiacunandi,

4Mandaj Diospaj huasiman pusharcani. Chaimandaca, Taita Diosta servij Hanán shuti runapaj churicunapaj jahua ucumanmi pusharcani. Hanán shuti runaca, Igdalías shuti runapaj churimi. Chai ucuca, mandajcunapaj huasi ladopimi carca. Chai ucuca, Diospaj huasi pungupi cuidaj Maasías shuti runapaj huasi jahua altibajopimi carca. Maasías shuti runaca, Salum shuti runapaj churimi.

5Chaipimi, vinota jundachishca tastacuna, vasocunataca, recabita familiacunapaj ñaupajpi churarcani. Shina churashpami: “Cai vinota ufiaichi” nircani.

6Shina nijpica, paicunaca cashnami ninajurca: “Ñucanchica, vinotaca na ufiashunllu. Recab shuti runapaj churi Jonadab shuti ñucanchi ñaupa taitami, ñucanchitaca cashna nishpa mandashca: ‘Cangunapash, cangunapaj miraicunapash, vinotaca ima horallapash na ufianachu canguichi.

7Huasicunatapash, na shayachinachu canguichi. Chagracunatapash, na tarpunachu canguichi. Uvas yuracunatapash, na tarpunachu canguichi. Imatapash na charinachu canguichi. Ashtahuangarin tucui cangunapaj causaipimi, carpacunapilla causana canguichi. Shinami, canguna causanajuj cai llactapica, unai huatacunata causanguichi’ nishcami.

8Ñucanchica, Recab shuti runapaj churi, ñucanchi ñaupa taita Jonadab shuti taita mandashcatami tucuita pactachishpa causanajunchi. Ñucanchitaca, huarmicunatapash, churicunatapash, ñucanchi ushicunapash tucui ñucanchi causaipi, vinota ufiachunga na mandarcachu.

9Shinallata ñucanchi causana huasicunata shayachichumbash, na mandarcachu. Uvas yuracunata, tarpuchumbash alpacunata charichumbash na mandarcachu.

10Ñucanchi ñaupa taita Jonadab imatalla mandashcataca, tucuitami pactachishpa causanajunchi. Shinamandami carpacunapilla causanajunchi.

11Shina cajpipash, cashnami tucurca: Babilonia llactata jatun mandaj Nabucodonosor runa, cai llactaman vichai shamujpimi ñucanchica: ‘Chai caldeo soldadocunamanda, Siria llacta soldadocunamanda, Jerusalenbi pacajungapaj shamuichi’ ningapaj shamurcanchi. Shina shamushpami, Jerusalenbi quedashca causanajunchi” ninajurcami.

12Mandaj Diosca, cai shimicunata Jeremiasman cashna nishpa villarca:

13“Tucuita Mandaj, israelcunapaj Taita Dios ñucami, cashna nini: Judá llacta runacunapajman, Jerusalenbi causajcunapajman rishpa, cashna nigri: ‘Cangunaca, ñuca mandashcacunata cazunataca, ¿nachu yachajuna canguichi?’ ninmi Mandaj Diosca nigri.

14Vinota ama ufiachun, Recab shuti runapaj churi Jonadab shuti runa mandashcataca, paipaj miraicunapash shinllitapachami pactachinajun. Paicunapaj punda taita mandashcata cazushpami, vinota cunangaman na ufiashpa causanajun. Ñucacarin cangunataca, pundamandapachami na shaijushpa rimajurcanilla. Ashtahuangarin napacha uyashpami causarcanguichi.

15Cangunaman villachunga, ñucata servij, ñuca ima nishcata tucui villajcunahuanmi, pundamandapacha na shaijushpa, cashna villachijurcanilla: ‘Cunanga, tucuicuna cangunapaj nali causaita saquishpa, ñucapajman tigrarichi. Nalita ruranataca saquishpa, alita ruraichi. Shuj dioscunatapash na servishpa catinachu canguichi. Tucui chaicunata saquishpaca, cangunamambash, cangunapaj taitacunamambash, ñuca carashca cai llactapillatami causanguichi’ nishpami villachijurcani. Ashtahuangarin cangunaca, rinrita mañachishpa uyangapaj na munashpami causarcanguichi.

16Recab shuti runapaj churi Jonadab shuti runapaj miraicunaca, paicunapaj ñaupa taita mandashcataca, shinllitapachami pactachinajurca. Ashtahuangarin cai gentecunaca, ñucataca na cazuhuarcachu ninimi” nijurcami.

17Shinamandami tucuita Mandaj Taita Dios, israelcunapaj Taita Diosca, cashna nin: “Ricuichi, ñuca rimashcataca, Judá llactapi causajcunapash, Jerusalenbi tucui causajcunapash, napacha uyarcachu. Ñuca rimajpipash na uyarcachu, cayajpipash na tigrachihuarcachu. Chaimandami paicunaman ima llaquicunata ñuca apamusha nishcataca, tucuita apamugrini” ninmi.

18Jeremiasca, Recab shuti runapaj mirai familiacunataca, cashnami nijurca: “Tucuita Mandaj Taita Dios, israelcunapaj Taita Diosca, cashnami nin: ‘Cangunaca, cangunapaj taita Jonadab shuti runa mandashcataca, tucuitami cazushcanguichi. Tucui imatalla mandashcacunata cazushpami, pai mandashcashnallata chashnatapacha rurashpa causashcanguichi’ ninmi.

19Shinamandami tucuita Mandaj, israelcunapaj Taita Diosca, cashnatapash nin: ‘Recab shuti runapaj churi Jonadab shuti runapaj mirai puramandaca, punllandi ñuca ñaupajpi servishpa causajca, shuj runallapash na illangachu’ ninmi” nijurcami.