ESDRAS 10 - Quichua Imbabura Bible

Shuj llactamanda huarmicunataca, llujchishpami cachashca

1Esdrasca, Taita Diospaj huasi ñaupajpi cungurishpa huacashpa, juchacunata villashpa Diosta mañajujpillatami, ashtaca ashtaca israelcuna Esdraspaj ladoman quimirimunajurca. Jaricuna, huarmicuna, huahuacuna quimirimushpami, tucui gentecuna ninanda llaquirishpa huacanajurca.

2Shina huacanajujpimi, Elam shuti runapaj mirai Jehiel shuti runapaj churi Secanías shuti runaca, Esdrastaca cashna nirca: “Ñucanchimi, ñucanchi Taita Diostaca na cazushpa juchata rurashcanchi. Llactapi causanajuj puracunamandami, shuj llacta huarmicunahuan cazarashcanchi. Chashna cajpipash israelcunapaca, ali tucunata shuyana tianrami.

3Shina cashcamanda cunanga, tucui huarmicunatapash, paicunahuan charishca huahuacunatapash llujchishpa cachangapaj, ñucanchi Taita Dioshuan ari nishunchi. Chaitaca, ñuca jatun Diospash, ñucanchi Taita Diosta manllajcunapash yarichishcashnallatami rurangapaj munanchi. Shinallata mandashcapi nijunshnallatami rurangapaj munanchi.

4Jatari, canmi caitaca ruranapacha cangui, ñucanchipash canhuanmi canchi. Shina cashcamandaca shinlli tucushpa, chaita ucha rurailla” nircami.

5Shina nijpimi Esdrasca, shayarishpa curacunata, levitacunata mandajcunatapash, tucuilla israelcunatapash, Dios mandashcapi nishcashnallata paicuna pactachinajuchun juramentuchirca. Chaimandami paicunaca juramentunajurca.

6Chai jipami Esdrasca, Taita Diospaj huasi ñaupajmanda anchurishpa, Eliasib shuti curapaj churi Johanán shuti cura tiajuj ucuman yaicurca. Chaipica, prezu apai tucushcamanda tigramushcacuna juchata rurashcamandami, micunatapash na micushpa, yacutapash na ufiashpa, ninanda llaquirishca tiajurca.

7Chaimandami, prezu apai tucushcamanda tucuilla tigramushcacunataca, Jerusalenman tandanajuchun nishpa Jerusalenbipash, Judá llactapipash villachirca.

8Shinallata israelcunata mandajcuna, mandaj rucucuna, Jerusalenman tandanajumuchun nishcashnallata, quimsa punllacaman maijambash na shamujpica, paipaj tucuilla alpacunatapash quichunami. Shinallata prezu apai tucushca puracunapaj tandanajuimandapash llujchishpa cachai tucunami nishpami villachirca.

9Chaimandami, nara quimsa punlla chayajpillata Judá aillu, Benjamín aillu runacunaca, iscun quillapaj ishcai chunga punllapi, Jerusalenman tandanajumurca. Tucui gentecunami, Taita Diospaj huasi canlla plazapica, chai huarmicunata cachashcamandapash, tamianamandapash manllashpa chujchushpa tianajurca.

10Shina tianajujpimi cura Esdrasca, shayarishpa cashna nijurca:

—Cangunaca, shuj llactamanda huarmicunahuan cazarashpami, juchata rurashcanguichi. Shinami israelcunapaj jahuapica, ashtahuan juchata mirachishcanguichi.

11Cunanga, cangunapaj ñaupa taitacunata Mandaj Taita Diostami jatunyachina canguichi. Chai jipaca, cai llactapi causanajuj gentecunamanda, shuj llactamanda huarmicunamanda anchurishpa, Diospaj munaita ruraichi— nijurcami.

12Shina nijujpimi, tucuilla tandanajushcacunaca shinllita caparishpa cashna nishpa tigrachinajurca:

—Can nishcashnallatami rurashun.

13Ashtahuangarin gentecunaca ashtacamari, punllacunapash tamia punllacunamari. Chaimandami ñambilla tianajuitaca, na ushanchi. Ashtacacunami cai juchata rurashcanchi. Chaimandami chai ruranataca, shuj punllapi, ishcai punllapica na tucuchi ushashun.

14Tucuilla caipi tandanajungapaj randica, ñucanchita mandajcunalla caipi quedashpachari ali capanman. Ñucanchi pueblocunapi causajcuna, shuj llactamanda huarmicunahuan cazarashcacunapash, ñucanchi pueblocunapi mandaj rucucunapash, chai huarmicunapaj juezcunapash, canguna cayashca punllapi shamushpachari ali capanman. Ñucanchi nalita rurashcamanda, Taita Dios ñucanchihuan ninanda fiñarishcata yalichingacamanmi, chashna rurana— ninajurcami.

15Shina nishcataca, Asael shuti runapaj churi Jonatán runahuan, Ticva shuti runapaj churi Jahazías shuti runahuanllami, nalichu ninajurca. Paicuna shina ninajujpimi, Mesulam shuti, Sabetai shuti levitacunapash, paicunapura tucushpa ayudanajurca.

16Prezu apai tucushcacunapaj miraicunaca, imashna nishcashnallatami ruranajurca. Chaimandami Esdras curapash, ñaupa taitacunapaj huasi ucu puracunata mandajcunapash, paicunapaj ñaupa taitacunapaj huasi ucu puracuna imashna cashcashnallata agllai tucurca. Paicunaca, shutipi cayajpimi, chunga quilla callari punllapica, chai huarmicunata llujchishpa cachashcamanda parlangapaj tiarinajurca.

17Shuj llactamanda huarmicunahuan cazarashca chai tucui israelcunata imashna cashcata callarishpa ricushpaca, caishuj huata callari quillapaj punda punllapimi tucuchirca.

18Shuj llactamanda huarmicunahuan cazarashca curacunapaj churicunaca, caicunami tiarca:

Josadac shuti runapaj churi Jesúa shuti runapaj churicunapash, paipaj huauqui Maasías, Eliezer, Jarib, Gedalías shuti curacunapashmi carca.

19Paicunaca, paicunapaj huarmicunata llujchishpa cachashumbacha nishpami, maquita cunajurca. Paicuna chashna nalita rurashca juchamandaca, llamacunamanda shuj jari llamatami Diosman cunajurca.

20Imer shuti runapaj mirai puramandaca: Hanani shuti, Zebadías shuti curacunami, chashna cazarashca carca.

21Harim shuti runapaj mirai puramandaca: Maasías, Elías, Semaías, Jehiel, Uzías shuti curacunami carca.

22Pasur shuti shuti runapaj mirai puramandaca: Elioenai, Maasías, Ismael, Natanael, Jozabad, Elasa shuti curacunami carca.

23Levita puracunamandaca: Jozabad, Simei, Kelita nishca Kelaía, Petaías, Judá, Eliezer shuti levitacunapashmi carca.

24Diospaj huasipi candaj puracunamandaca: Eliasib shuti runapashmi carca. Diospaj huasi pungupi cuidaj puracunamandaca: Salum, Telem, Uri shuti runacunami carca.

25Shinallata caishuj israelcunaca, caicunami: Paros shuti runapaj mirai puramandaca: Ramía, Jezías, Malquías, Mijamín, Eleazar, Malquías, Benaía shuti runacunami carca.

26Elam shuti runapaj mirai puramandaca: Matanías, Zacarías, Jehiel, Abdi, Jeremot, Elías shuti runacunami carca.

27Zatu shuti runapaj mirai puramandaca: Elioenai, Eliasib, Matanías, Jeremot, Zabad, Aziza shuti runacunami carca.

28Bebai shuti runapaj mirai puramandaca: Johanán, Hananías, Zabai, Atlai shuti runacunami carca.

29Bani shuti runapaj mirai puramandaca: Mesulam, Maluc, Adaía, Jasub, Seal, Ramot shuti runacunami carca.

30Pahat-moab shuti runapaj mirai puramandaca: Adna, Quelal, Benaía, Maasías, Matanías, Bezaleel, Binúi, Manasés shuti runacunami carca.

31Harim shuti runapaj mirai puramandaca: Eliezer, Isías, Malquías, Semaías, Simeón,

32Benjamín, Maluc, Semarías shuti runacunami carca.

33Hasum shuti runapaj mirai puramandaca: Matenai, Matata, Zabad, Elifelet, Jeremai, Manasés, Simei shuti runacunami carca.

34Bani shuti runapaj mirai puramandaca: Madai, Amram, Uel,

35Benaía, Bedías, Quelúhi,

36Vanías, Meremot, Eliasib,

37Matanías, Matenai, Jaasai,

38Bani, Binúi, Simei,

39Selemías, Natán, Adaía,

40Macnadebai, Sasai, Sarai,

41Azareel, Selemías, Semarías,

42Salum, Amarías, José shuti runacunami carca.

43Nebo shuti runapaj mirai puramandaca: Jeiel, Matatías, Zabad, Zebina, Jadau, Joel, Benaía shuti runacunami carca.

44Tucui cai runacunami, shuj llactamanda huarmicunahuan cazarashca carca. Cai runacunapaj huaquin huarmicunaca, ñami huahuacunata charishca carca.