MARCOS 6 - Quichua Imbabura Bible

Nazaret pueblomanmi, Jesusca rishca(Mat. 13:53-58; Luc. 4:16-30)

1Chaimanda llujshishpaca Jesusca, paipaj llactamanmi rirca. Paipaj yachajujcunapash catishpami rirca.

2Chai pueblopimi, samana punlla chayamujpica, tandanajuna huasipi yachachijurca. Jesús yachachijujta uyajcunaca, tucuilla manllarishpami, paicunapura cashna ninajurca:

—¿Maipita chai runaca, cashnapacha yachajurca? Cashna yachachi ushachunga, ¿pita ushaita carashca canga? Pipash na rurai ushanallata cashna rurangapaca, ¿maipita yachajushcanga?

3¿Nachu cai runaca, Mariapaj churi? Paica carpinteromari. ¿Nachu paica Jacobopaj, Josepaj, Judaspaj, Simonbaj huauqui? Paipaj panicunapash, ¿nachu cai llactapillata causanajun?— ninajurcami.

Shina nishpami, Jesusta na crishpa pandarinajurca.

4Shina nijpimi Jesusca, cashna nirca:

—Profeta runataca, shuj llactacunapirami alicachishpa chasquinajun. Ashtahuangarin paipaj llactapillata causajcuna, paipaj familiacuna, paipaj huasi ucu purallatami, ninanda na ricunayachin— nircami.

5Shinamandami chai pueblopica, pipash na rurai ushanallataca na rurarca. Huañunajuj gentecunatallami, huaquingunatalla paicunapaj uma jahuapi maquita churashpa, Jesusca alichirca.

6Jesusca, chai gentecuna na crijpimi, chashnachu cana carca nishpa ninanda llaquirishpa, chai uchilla llactacunapilla yachachishpa purijurca.

Chunga ishcai yachajujcunatami, villachun cachashca(Mat. 10:5-15; Luc. 9:1-6)

7Chai jipami Jesusca, paipaj chunga ishcai yachajujcunata cayarca. Paicunamanmi, mapata rurachij ayacuna jundashca causanajuj gentecunamanda ayacunata llujchi ushachun ushaita cararca. Shina carashpami, ishcai ishcai richun Jesusca cacharca.

8Paicunataca, ñanda ringapaca, imatallapash ama apachun, ashtahuangarin tauna caspigutalla apachunmi mandarca. Cucavi muchilatapash, culquitapash na huatarishpa richun mandarcachu.

9Ashtahuangarin chaquipi churajunatalla churajushpa, túnica nishca churajunatapash na ishcaita churajuchun mandarcachu.

10Jesusca cashnatapashmi nijurca: “Cangunaca, maijan huasiman chayashpapash, shuj llactaman yalingacaman, chai huasipilla mingaringuichi.

11Maijan llactapi cashpapash, cangunata na chasquishpa, canguna villajujta na uyangapaj munajpica, llujshishpa ringuichilla. Chai llactapi causajcuna napacha ali cajta ricuchingapajmi, cangunapaj chaquipi churajushcapi catijuj alpatapash chafsishpa rina canguichi. Na llullashpami, cangunataca cashna nini: Imatalla rurashcata Dios ricuchijui punllapica, Sodoma shuti, Gomorra shuti pueblocunapi causashca gentecunata llaquichishcatapash ashtahuan yalitami, chai pueblopi causajcunataca ninanda llaquichijunga” nijurcami.

12Paicuna llujshishpa rishpaca, gentecuna ninanda llaquirishpa Diospajman tigrarichunmi villajunajurca.

13Shinallata aya jundashca causanajuj gentecunamandapash, ashtacacunamandami ayacunataca llujchinajurca. Shinallata huañujujcunatapash, ashtacacunatami aceiteta talishpa javishpa alichinajurca.

Bautizaj Juandami huañuchishca(Mat. 14:1-12; Luc. 9:7-9)

14Jesús imata rurashpa purijujtaca, tucui gentecunami maipipash parlanajurca. Shina parlanajujta jatun mandaj Herodes uyashpami, cashna nirca:

—Bautizaj Juanmi, huañushcacunapaj chaupimanda causarimushcanga. Shina cashpami paica, imata ruraitapash ushajunga— nijurcami.

15Huaquingunaca:

—Profeta Eliasmi canga— ninajurcami.

Shujcunaca:

—Profeta puracunamanda, maijan runapashmi canga— ninajurcami.

16Shina parlanajujta Herodes uyashpaca, cashnami nirca:

—Chai runaca, Juanmi canga. Paitaca, ñucami umata muchushpa huañuchigrichun mandarcani. Chai runami, huañushcacunapaj chaupimanda causarimushcanga— nircami.

17Juanda cadenahuan huatashpa, prezuna huasipi churachunga, Herodesmi mandashpa cachashca carca. Chashna rurachunga, Herodespaj huauqui Felipepaj Herodías shuti huarmimi munarca. Herodesca, paipaj huauquita quichushpami, paipaj huarmi cachun japishpa, chai huarmihuan causajurca.

18Shina causajujpimi: “Mandashca shimipi nishcashna, cambaj huauquipaj huarmihuan causanaca, napacha alichu” nishpa, Herodestaca nishca carca.

19Shina nishcamandami Juandaca, chai Herodías huarmica, llaquichingapaj pacalla chaparca. Shina huañuchingapaj munajushpapash, na usharcachu.

20Juandaca, imatapash cashcatapacha rurashpa causajuj, jucha illaj cajtami Herodesca yacharca. Chaimandami Juandaca manllashpa, na imatapash rurashpa aliguta charirca. Juan villajujpi uyajushpaca, imata ruraita na ushajushpapash Herodesca, cutin cutin aliguta uyajllami carca.

21Herodesca, pai huacharishca huata chayajpimi, fiestata rurajurca. Chai fiestaman shamuchunmi mandajcunatapash, soldadocunata mandajcunatapash, Galilea llactapi causanajuj ninan charijcunatapash cayachun cacharca. Chai fiestaca, Herodías shuti huarmipaj alipajmi chayashca carca.

22Tucuicuna micushpa tianajujpimi, Herodías huarmipaj ushi cuitsaca, ucuman yaicushpa danzajurca. Chaitaca Herodespash, paita cumbangapaj shamujcunapashmi, ninanda alicachishpa ricunajurca. Shinamandami jatun mandaj Herodesca, chai cuitsata cashna nirca:

—Can imata munashcata mañahuailla. Imata mañajpipash, ñucaca carashallami.

23Ñuca mandajujtapash, chaupicaman carashallami. Imata mañajpipash, tucuitami carasha— nishpami juramenturca.

24Shina nijpimi:

—¿Imagutata mañasha?— nishpa, paipaj mamataca tapungapaj calparca.

Shina tapujpimi:

—Bautizaj Juanbaj umata mañagri— nishpa, chai cuitsata paipaj mamaca yachachirca.

25Shina nijpi jatun mandaj Herodespajman, chai cuitsa calpashpaca:

—Cunanllata, Bautizaj Juanbaj umata shuj platopi carahuai— nirca.

26Shina nishpa mañajpimi, jatun mandaj Herodesca, ninanda llaquirirca. Ashtahuangarin: “Imata mañajpipash, carashallami” nishpa juramentujujta, paihuan micunajujcuna uyashca cajpimi, na yangapi churai usharca.

27Shina mañajpimi, chai jatun mandaj Herodesca, cuidaj soldado puramanda shuj soldadotaca, Juanbaj umata muchushpa apamuchun ucha cacharca.

28Shina nijpi prezuna huasiman rishpami soldadoca, Juanbaj umata mucharca. Chai umataca, platopi apamushpami, chai cuitsaman curca. Chai cuitsaca, paipaj mamamanmi curca.

29Juanda huañuchishcata yachashpami, cuerpogutaca paipaj yachajujcuna apagrishpa pambarca.

Jesusca, picha huaranga gentecunamanmi micuchun carashca(Mat. 14:13-21; Luc. 9:10-17; Juan 6:1-14)

30Chai jipaca, villachun Jesús cachashcacunaca, cutinmi paipajman tigramurca. Shina tigramushpami, imashna rurashcatapash, imashna yachachishcatapash tucuita villajunajurca.

31Ashtaca gentecuna shamushpa, tigrashpa purinajujpimi, imashna micuitapash na ushanajurca. Chaimandami:

—Jichushca pambapi ashaguta samangapaj, ñucanchilla jacuchi— nishpa Jesusca, paipaj yachajujcunata nijurca.

32Shina nishpami, paicunalla canoapi tiarishpa, jichushca pambaman cuchata chimbashpa rinajurca.

33Ashtahuangarin ashtaca gentecuna ricushpami, Jesús rijujtaca rijsinajurca. Shina rijsishpami, pueblocunamanda chaquilla calpashpa, paicunataca mishashpa chayashca shuyanajurca.

34Canoamanda Jesús llujshishpaca, ashtaca ashtaca gentecuna paita shuyanajujtami ricurca. Michij illaj llamagucunatashna ricushpami, paicunataca ninanda llaquishpa, imagutapash tucuillaman yachachi callarirca.

35Ña tutayajujpimi Jesuspaj yachajujcunaca, paipajman quimirishpa, cashna ninajurca:

—Ñamari tutayan. Cai pushtuca, jichushca pambamari.

36Cai gentecunaca, cucavitapash na charinllu. Paicunataca, chai pambacunapi, chai uchilla llactacunapi tandata randishpa micugrichun cachailla— ninajurcami.

37Shina nijpimi, Jesusca:

—Cangunallata, micunataca caraichilla— nishpa tigrachirca.

Shina nijpimi paipaj yachajujcunaca cashna ninajurca:

—¿Ishcai patsaj denario culquihuanllu, tandata randigrichilla ningui?— ninajurcami.

38Shina tapujpimi:

—Cangunaca, ¿mashna tandagutata charinguichi? Richi, ricunguichi— nishpa Jesusca, paicunata cacharca.

Paicuna tigramushpaca:

—Picha tandagu, ishcai pijigullami tiashca— ninajurcami.

39Shina nijpimi:

—Chai gentecunataca, chai jihua pambagupi asha asha tandanajushpa, tiaripaichi nigrichi— nishpa Jesusca, paipaj yachajujcunataca mandarca.

40Paicuna tiaripaichi nijpica, patsaj patsaj chaupirishpa, shinallata picha chunga, picha chunga chaupirishpami tiarinajurca.

41Shina tiarijpimi picha tandagutapash, ishcai pijigutapash, Jesusca japirca. Chaita japishpami, jahua pachata ricushpa, Diosta pashi nirca. Chai tandacunataca, asha asha chaupishpami, chai gentecunaman carachun, paipaj yachajujcunaman curca. Shinallata ishcai pijigutapashmi, paicuna purapica tucuicunaman chaupishpa curca.

42Shina carajpimi gentecunaca, na munangacaman micunajurca.

43Paicuna na micui ushashcataca, chunga ishcai canasta jundatami tandatapash, pijitapash paipaj yachajujcunaca tandachinajurca.

44Chai micushpa tianajuj purapica, jaricunallami picha huaranga carca.

Yacu jahuatami, Jesusca purijushca(Mat. 14:22-27; Juan 6:16-21)

45Chai jipallami Jesusca, paipaj yachajujcunataca, chai yacu manñamandaca canoapi tiarishpa, Betsaida shuti puebloman ñaupashpa chimbachun cacharca. Shina cachashpallami Jesusca, chai tucui gentecunata cayacaman nirca.

46Cayacaman nishca jipaca, Diosta mañangapajmi Jesusca urcuman rirca.

47Ña tutayashcapimi, paipaj yachajujcunaca chaupi cuchata, canoapi rinajurca. Jesusca, paillami urcupi carca.

48Paipaj yachajujcunaca, ninan huaira tuparimushpa jarcajpimi, na ri ushashpa, ninanda shaijunajurca. Chaitaca, urcumandami Jesusca ricurca. Ña punllayanalla tucujujpimi Jesusca, paicunata ñaupashpa yalishpa ringapaj, yacu jahuata shamujurca.

49Yacu jahuata Jesús shamujujta ricushpaca:

—Ayamari shamujun— yashpami, ninanda caparinajurca.

50Paipaj yachajujcunaca, tucuilla ricunajushpami ninanda musparinajurca. Ashtahuangarin Jesusca, paicunata uchalla rimashpami:

—Ñucami shamujuni. ¡Ama manllarishpa, shinlli tucuichi!— nirca.

51Paipaj yachajujcuna rijuj canoapi Jesús tiarijhuanmi, huairapash chulunlla tucurca. Huaira chulunyajpicarin, ashtahuan manllarishpami ricunajurca.

52Paicunaca, tandata mirachishpa Jesús carashcata nara entendishpami, chashna manllarirca. Paicunapaj shungumi, shinlliyashca carca.

Genesaret llactapimi Jesusca, huañujujcunata alichishca(Mat. 14:34-36)

53Chai cuchata chimbaita tucuchishpaca, Genesaret shuti llactamanmi paicunaca chayamurca. Chai cucha manñapimi, canoataca huatarca.

54Chai canoamanda llujshijhuanmi gentecunaca, Jesús cajta rijsinajurca.

55Shina rijsishpami, chai muyundi llactacunapi villangapaj calpanajurca. Paicunami, Jesús maipi cajtapash villanajurca. Shina villajpimi huañunajuj gentecunataca, mandashpa sirijushcacunandi maimandapash apamui callarinajurca.

56Maijan puebloman yaicujpipash, uchilla llactaman cashpa, pambapi tiaj huasicunaman cashpa Jesús chayajpipash, pai yalina ñangunapimi, huañujujcunataca churamunajurca. Shina churamujpimi huañujujcunaca:

—Can churajushca pundagupillapash tacarichun, saquihuai— nishpa mañanajurcami.

Jesús churajushcapi tacarijcunaca, tucuilla ali tucurcallami.