GÁLATAS 4 - Quichua Imbabura Bible

1Cashnatapashmi ningapaj munani: Taita mama imata charishcatapash, imata cashpapash huahuacunaca, tucuilla japinatami charin. Shina cashpapash, viñangacamanga gañanshnami causan.

2Taita carasha nishca punlla chayangacamanmi, huahuataca yachachishpa cuidajcuna mandashpa charinajun.

3Shinallatami ñucanchipash, huahuacunashna cashpaca, cai pachapajtalla cutin cutin yachachishcata catishpa, pundaca gañanshna causarcanchi.

4Ashtahuangarin ña huatacuna pactajpimi, Taita Diosca paipaj Churita cachamurca. Paitaca, shuj huarmigumi ungurca. Paica, mandashca shimicuna mandajpimi causajurca.

5Chai mandashca shimicuna charijushcamanda ñucanchita cacharichingapaj, chai jipaca paipaj huahuacunapacha canata chasquichunmi, paica chashna causajurca.

6Diospaj huahuacuna cajpimi, Taita Diosca paipaj Churipaj Espirituta cangunapaj shunguman cachamurca. Chai Espíritu caparishpami: “¡Ñuca Taitalla!” nichijun.

7Shina cashcamandami, na ashtahuan gañanshna causajushpa, ashtahuangarin Diospaj huahuapacha cangui. Paipaj huahua cashpami, Taita Dios carashcataca Cristomanda japigringui.

Crijcuna pandarinatami, Pabloca manllashca

8Pundaca, Taita Diosta napacha rijsishpami, napash dioscunatara servishpa causarcanguichi.

9Ashtahuangarin cunanga, Taita Diosta rijsinguichimi. Taita Diospash, cangunataca rijsinmi. Shina rijsishpapash, ¿imashpata ushaita na charij, chai imapajpash na servij, cutin cutin yachachishcata catishpa, cutinllata gañanshna causangapaj munanguichi?

10Cangunaca, agllashca punllacunatapash, quillacunatapash, ima punllapi causajushcatapash, huatacunatapashmi yarinajunguichi.

11Cangunaman ñuca imata yachachishcapash, yangallata canatami manllajuni.

12Huauquicuna, panicuna, ñucapash cangunashnallatami causangapaj tucurcani. Chaimandami cangunapash, ñucashna causapaichi nini. Cangunaca, ñucataca ima nalitapash na rurahuashcanguichica.

13Ali villaita cangunaman punda villajushpaca, huañujushpapashmi villajurcani. Chaitaca, alimi yachanguichi.

14Shina huañujushpa llaquilla cajpipash, ñucataca na millanayachishpa, na fiñashpami charihuarcanguichi. Ashtahuangarin Taita Diospaj angeltashna, Cristo Jesustashnami chasquihuarcanguichi.

15Shina causashpa cushijushcapash, ¿imata tucurca? Cangunataca, imashna cashcatami ricuchingapaj munani: Llujchi ushanalla cajpica, cangunapaj ñavitapashmi surcushpa, ñucaman caranguichiman carca.

16Na llullashpa cashna nijushpaca, ¿cangunata fiñaj runachu tucushcani?

17Caishujcunaca, nalita yarishpami cangunataca, ñucanchipaj yachajuj cashcanman yanajun. Ñucanchimanda anchurishpa, paicunatara juyashpa catichunmi munan.

18Shujcunapaj ali cachun, imatapash ninanda juyaimanda rurangapaj yarinaca alimi. Ñuca cangunahuan cajllapi na chashna yarishpami, tucui causaipi aliguta ruranataca yariashpa causana canguichi.

19Ñuca huahuacunalla, canguna Cristoshna tucushcanman yashpami, shuj huarmi ungungapaj nanachinshna, cutinllata llaqui llaqui cani.

20Cunanllata cangunahuan chaipi cashpaca, imashnallapash rimaimanllari. Cangunamandaca, imashna yaritapash na ushanichu.

Sara shuti, Agar shuti huarmicunapaj causaimanda chimbapurashpami parlashca

21Mandashca shimicunata pactachingapaj munajcuna tiashpaca, villahuaichi. Mandashca shimicuna imata nijujtapash, ¿nachu uyarcanguichi?

22Escribishcapica: “Abraham runaguca, ishcai churitami charirca” nijunmi. Shuj churitaca, na gañan causajuj quiquin huarmihuambachami charirca.

23Paita servij cuitsahuanga, paipaj munaimandallami charirca. Ashtahuangarin na servishpa tiaj paipaj huarmihuanga, Dios carashapachami nishcamandami charirca.

24Ñucanchita yarichingapajmi, chashnaca tucushca. Chai ishcai huarmicunaca, ishcaipi shican shican ari nishcacunatami ricuchijun. Shuj ari nishcataca, Sinaí shuti urcupimi Diosca cushca. Chaica, Agar shuti huarmi imashna causashcatami ricuchijun. Chai urcupi cushcata catijcunaca, gañanshna causangapajllami miranajun.

25Chai Agar huarmillatami, Arabia llactapi tiajuj Sinaí urcu imashna cashcata ricuchijun. Chai urcupash, cunambi Jerusalén imashna tiajujtami ricuchijun. Chai puebloca, chaipi causajcunandimi, gañanshna tiajun.

26Ashtahuangarin jahua pachapi tiajuj ñucanchipaj mamashna Jerusalenga, na gañanshna tiajunllu.

27Ashtahuangarin cashnami escribishca tiajun:

“Huahuata tarinata na yachaj huarmi, cushijungui.

Ungungapaj nanachinatapash na yachashcamanda,

ninanda cushijushpa caparishpa asijunguilla.

Jichuscha huarmica, cusayu huarmitapash yalimi,

huahuacunataca ashtahuan charinga” nijunmi.

28Shina cajpimi huauquicuna, panicuna, ñucanchica Dios carashapachami nishca Isaac shuti runashna canchi.

29Ashtahuangarin paipaj munaimandallata charishca churimi, Diospaj Espiritupaj munaimanda huacharishca churitaca, catiriashpa llaquichin cashca. Shinallatami cunambash tucujun.

30Ashtahuangarin Dios escribichishca Shimipica, ¿ima nijundayari? Cashnami nijun: “Servij cuitsataca, paipaj churindi llujchishpa cachangui. Chai cuitsapaj churica, huarmipajpacha churihuanga, taita imaguta charishcatapash, na chaupiringachu” nijunmi.

31Shinamandami huauquicuna, panicuna, ñucanchica chai servij cuitsapaj huahuacunashnaca, na canchi. Ashtahuangarin huarmipajpacha huahuacunashnami canchi.