2 CRÓNICAS 13 - Quichua Imbabura Bible

Abías shuti runami mandajushca(1 Rey. 15:1-8)

1Jatun mandaj Jeroboam shuti runaca, chunga pusaj huatata israelcunata ña mandajujpimi Abías shuti runaca, Judá llactata mandai callarirca.

2Paica, quimsa huatatami Jerusalenbi mandajurca. Paipaj mamaca, Gabaa shuti pueblomanda Uriel shuti runapaj ushi Micaías shutimi carca.

Abías shuti runapash, Jeroboam runapash macanajushpallami causanajurca.

3Chaimandami Abías shuti runaca, agllai tucushca, ninan shinlli, macanajunata ali yachaj, chuscu patsaj huaranga soldadocunata tandachishpa, macanajungapaj alichirirca. Shinallata Jeroboam runapashmi, pusaj patsaj huaranga agllai tucushca, ninan shinlli, macanajunata ali yachaj soldadocunata tandachishpa, Abías shuti runahuan macanajungapaj alichirirca.

4Chaimandami Abías shuti runaca, Efraín shuti urcucunapi tiaj, Zemaraim shuti lomapi shayarishpa, cashna nijurca: “Jeroboam runapash, tucui israelcunapash, uyahuaichi.

5Israelcunata Mandaj Taita Diosca, Davidmambash, paipaj miraicunamambash israelcunata mandanataca, tucui causaipaj cungapaj ari nijushcata ricuchij cachishna cajtaca, ¿nachu yachanguichi?

6Shina cajpipash, Davidpaj churi Salomonda servij, Nabat shuti runapaj churi Jeroboam runami jatarishpa, paita mandajta na cazurca.

7Paihuanga yanga purij, jatun nalita ruraj runacunami tandanajurca. Shina tandanajushpami, Salomonbaj churi Roboam runata mishanajurca. Roboam runaca, chairalla runa cashpa ninan manllaita charishpami, paicunataca na cazuchi usharca.

8Cunanga, cangunaca ashtacacuna cashpa, cangunapaj dioscuna cachun Jeroboam runa rurachishca oro shicucunata charishpami, Davidpaj miraicuna mandachun Mandaj Dios cushcataca, na cazungapaj munanguichi.

9¿Nachu Mandaj Diospaj curacunata, Aarón curapaj miraicunata, levitacunataca, canguna llujchishpa cacharcanguichi? Chashna rurashpami, curacuna cachunga shuj llactapi causanajuj gentecunashnallata, pitapash churashcanguichi. Shuj shicuta, canchis jari llamata cushpaca, napash dioscunapaj cura tucungapaj maijambash shamuchunmi, chashna rurashcanguichi.

10Ashtahuangarin ñucanchipaca, Mandaj Diosmi ñucanchi Taita Dios. Paitaca na saquishpami catishcanchi. Mandaj Diospaj ñaupajpica, Aarón curapaj miraicunami Diospajta rurashpa causanajun. Tucui imatalla ruranacunataca, levitacunami ruranajun.

11Paicunami tutamandapash, chishipash Mandaj Diosman animalcunata cushpa tucuillata rupachinajun. Mishquillagu ashnajuj inciensotapash, paicunami cushnichinajun. Shinallata ima mapapash illaj mezapipashmi tandata churanajun. Oro candeleropi tiaj lamparacunapipash, tucui chishicuna rupachunmi, michata japichinajun. Ñucanchica, ñucanchita Mandaj Taita Dios imatalla mandashcatami pactachinajunchi. Ashtahuangarin cangunaca, paitami saquishcanguichi.

12Ricuichi, Taita Diosca ñucanchihuanmi. Paimi ñucanchita mandajun. Paipaj curacunapash, cangunahuan ñucanchi macanajugrichunmi, trompetata huacachishpa cushichingapaj ñucanchihuan shayanajun. Israelcunalla, cangunapaj ñaupa taitacunata Mandaj Taita Dioshuanga, na macanajunachu canguichi. Paitaca, maitata mishai ushanguichiyari” nijurcami.

13Ashtahuangarin Jeroboam runaca, huashata shamushpa macanajungapajmi, huaquin runacunata pacalla cacharca. Jeroboam runaca, paicunapaj ñaupajpi shayajujpimi, pacalla shamuj runacunaca, Judá llacta soldadocunapaj huashata shamunajurca.

14Judá llacta runacuna tigrarishpa ricushpaca huashatapash, ñaupatapash macanajungapaj shamunajujtami ñapash ricurca. Chaimandami paicunaca, Mandaj Diosta caparishpa mañanajurca. Curacunapashmi trompetata huacachinajurca.

15Chai jipami, Judá llacta soldadocunaca shinllita caparinajurca. Chashna ninanda caparijhuanmi Taita Diosca, Abías shuti runapaj ñaupajmandapash, Judá llacta soldadocunapaj ñaupajmandapash, Jeroboam runataca tucui israelcunandi, caita chaita cacharca.

16Israelcunaca, Judá llacta soldadocunapaj ñaupajmandaca pacajushpami calpanajurca. Taita Diosmi, paicunapaj maquipi churarca.

17Chai macanajuipica, Abías shuti runahuan paipaj soldadocunahuanga, ninandapachami huañuchinajurca. Israel puramandaca, picha patsaj huaranga agllashca soldadocunami chugrichi tucushpa urmanajurca.

18Chashnami israelcunaca, chai huatacunapica pingaichi tucunajurca. Ashtahuangarin Judá llactapi causajcunaca, paicunapaj ñaupa taitacunata Mandaj Taita Diosta mañashpa, shinlli tucushpami mishanajurca.

19Abías shuti runaca, Jeroboam runata catishpa rishpami, Bet-el, Jesana, Efraín shuti pueblocunataca, muyundi uchilla llactacunandi quichurca.

20Jeroboam runaca, Abías shuti runa mandajui punllacunapica, cutin na ashtahuan mandai usharcachu. Mandaj Dios llaquichijpimi, Jeroboam runaca huañurca.

21Ashtahuangarin Abías shuti runaca, ashtahuan shinllitapachami mandajurca. Paica, chunga chuscu huarmicunatami japirca. Paicunahuanmi, ishcai chunga ishcai churicunata, chunga sucta ushicunata charirca.

22Abías shuti runaca, ashtahuan imatalla rurashcacunapash, pai imatalla rurashpa causashcapash, Dios ima nishcata villaj Iddo shuti runagu villashpa escribishcapimi tiajun.