ISAÍAS 52 - Quichua Imbabura Bible

Sion shuti pueblotaca, Taita Diosmi prezumanda llujchinga

1Sion shuti pueblolla rijchariyari, rijchariyari. Jatun ushaita japiyari. Diospajlla pueblo Jerusalenlla, juyailla churajunata churajuyari. Circuncisión nishcata na rurashca runapash, mapa runapash, napacha chaiman cutin yaicungachu.

2Jerusalén pueblolla, jatarishpa alpata chaspirishpa tiariyari. Sion shuti pueblomanda prezu japi tucushpa causajcunalla, cangunapaj cungapi huatashcataca pascarichiyari.

3Mandaj Diosca, cashnami nin: “Cangunaca, ima culquitapash na cujpitami, na jatui tucushcashna causanguichi. Chaimandami ñucapash, ima culquitapash na cushpa, cangunataca quishpichigrini” ninmi.

4Mandaj Jatun Diosca, cashnatapashmi nin: “Ñuca agllashcacunaca, yalishca huatacunapica, Egiptopi causangapajmi urai rinajurca. Chaimanda rinajujpica, asiriocunapash yangamandami prezu aparca.

5Ñuca agllashcacunata yangamanda prezu apashca cajpica cunanga, ¿imatata caipica rurajuni? ninmi Mandaj Diosca. Paicunata apajcunaca, llaquinayaita mandashpami, huacachishpa charinajun. Ñuca shutitapash, punllandimi ninanda nalicachishpa, yangapi churanajun ninmi Mandaj Diosca.

6Shinamandami ñuca agllashcacunaca, chai punllapica ñuca shutita rijsinajunga. Ñuca shimihuanmi, caitaca nini: Ricuichi, ñucallatami chaita rurangapaca, chaipi casha” ninmi.

7¡Cushijuna ali villaita villangapaj, jahua urcuta calpashpa shamuj runaca, juyaillamari! Paica, casilla ali causaimandapash, quishpirinamandapash, imapash shuj alicunatallami villan. Sionbi causajcunamambash: “¡Cangunapaj Taita Diosmi mandagrin!” nishpami villan.

8¡Uyaichiyari, cangunata cuidashpa chapaj runacunaca, ninanda cushijushpami, tandanajushpa caparinajunga! Sion puebloman, Mandaj Dios cutin pushamujtaca, tucuicunami ñavi ñavi ricunajunga.

9Chulunlla sirij Jerusalén pueblolla, Diostaca tandanajushpa cushijuihuan candashpa alicachichiyari. Mandaj Diosca, pai agllashcacunaman cushijuita cushcamari. Jerusalenmanda apai tucushcacunataca quishpichishcamari.

10Mandaj Diosca, tucui llactacunapi causajcunapaj ñaupajpimi, paipaj jucha illaj rigrata llujchishpa ricuchirca. Ñucanchi Taita Dios quishpichijtaca, tucui cai pacha manñacunapi tiaj llactacunapi causajcunami ricunga.

11Babilonia llactamanda anchurichi, anchurichi. Chaimanda llujshichi. Imapash mapataca, na tacarinachu canguichi. Chai llacta chaupimanda llujshichi. Mandaj Diospaj imatalla charishcacunata apajcunapash, mapa illaj tucuichi.

12Chai llactamandaca, na calpashpa llujshinachu canguichi, na pacalla rinachu canguichi. Mandaj Diosmi, cangunata ñaupashpa ringa. Can israelcunapaj Taita Diosmi, cangunataca tandachinga.

Mandaj Diosta Servij Runagumi, llaquicunata apashca

13“Ricuichi, ñucata servij runaguca, tucuipimari ali llujshinga. Jatunyachi tucushca, jatumbi churai tucushcami canga. Tucuita yali ashtahuan alipimi churai tucunga.

14Shuj runacunahuan ricujpica, paitaca shujpacha cajtami ricunajurca. Shinamandami, tucuicuna ninanda manllarinajurca. Huañuna aichayu runacunata ashtahuan yali juyaillagumi carca.

15Chashnallatami, jipaman paita ricushpaca, ashtaca llactacunapi causajcuna ninanda manllarinajunga. Jatun mandajcunapash paipaj ñaupajpica, shimita vichashpa na imatapash ni ushanajungachu. Paicunaca, ima horallapash pipash na villashcatami ricunajunga. Ima horallapash na uyashcatami yachanajunga”.