1 SAMUEL 4 - Quichua Imbabura Bible

1Samuelca, tucuitami israelcunaman villajurca. Chai punllacunapillatami israelcunaca, filisteocunahuan macanajungapaj rishpa, Eben-ezer ladopi carpacunata shayachishpa tianajurca. Shinallata filisteocunapash, Afec shuti pueblopimi, carpacunata shayachishpa tianajurca.

2Filisteocunaca, israelcunahuan macanajungapajmi alichirishpa shayarinajurca. Chai ninan macanajuipimi israelcunaca, filisteocunapaj ñaupajpi mishai tucunajurca. Chai macanajushca pambapica, filisteocunaca chuscu huarangashna israelcunatami, chugrichishpa huañuchirca.

3Carpacunata shayachishca pambaman gentecuna ña tigrajpimi, israelcunata mandaj rucucunaca, cashna ninajurca: “¿Imashpashi Mandaj Diosca, ñucanchitaca filisteocunapaj ñaupajpi mishai tucuchun cunanga saquirca? Cunanga, Mandaj Dioshuan ari ninajushpa escribishcata alichina arcata, Silo shuti puebloman ñucanchipajman apamugrishunchi. Chaita apamujpica, paica ñucanchi chaupipi causajushcamandaca, ñucanchita fiñajcunapaj maquimanda quishpichingami” ninajurcami.

4Shina nijpimi israelcunaca, shuj runacunata Silo shuti puebloman cacharca. Chaiman chayashpami, querubín nishcacunapaj chaupipi tiaj tucuita Mandaj Dioshuan ari ninajushpa escribishcata alichina arcata apamunajurca. Taita Dioshuan ari ninajushpa escribishcata alichina arcata apamujcunahuanga, Ofni shuti, Finees shuti, Elipaj ishcandi churicunapashmi shamunajurca.

5Carpacunata shayachishca tianajuj pambaman, Mandaj Dioshuan ari ninajushpa escribishcata alichina arcahuan chayajpica, cashnami tucurca: Tucui israelcunaca, ninanda cushijushpami, alpapash chujchujta caparinajurca.

6Chashna ninanda cushijushpa caparinajujta filisteocuna uyashpami, cashna ninajurca: “Hebreocuna carpacunata shayachishca pambapica, ¿ima nishpashi chashna ninanda cushijushpa caparinajun?” ninajurcami. Paicunaca, israelcuna shayachishca carpacunaman Mandaj Diospaj arcata apamushcatami yachanajurca.

7Chaimandami filisteocunaca, ninanda manllarishpa cashna ninajurca: “Taita Diosmari, carpacunata shayachishca pambaman chayamushca” ninajurcami. Ashtahuan cashnatapashmi ninajurca: “¡Aij ñucanchilla! Cunangamanga, nara chashna tucushcachu carca.

8¡Aij ñucanchilla! Chai ninan ushaita charij dioscunapaj maquimandaca, ¿pita cacharichingayari? Chai dioscunami Egiptopi causajcunataca, jatun llaquicunahuan jichushca pambapi llaquichirca.

9Cunanga filisteocunalla, shinlli tucuichi. Hebreocunata ama servingapaca, shinlli shayarishpa macanajuichi. Paicuna cangunata servishpa causashcashna, cangunapash ama servingapaca, shinlli shayarishpa macanajuichi” ninajurcami.

10Filisteocuna shinllita macanajujpimi, israelcunaca mishai tucurca. Chaimandami, tucuicuna paicunapaj carpacunaman pacajushpa calpanajurca. Chaipica, manllanayaita huañuchijpimi, chaquilla purij israelcunaca, quimsa chunga huaranga soldadocuna huañushpa urmanajurca.

11Shinallata Ofni shuti, Finees shuti, Elipaj ishcandi churitapash huañuchishpami filisteocunaca, Taita Diospaj arcataca quichushpa apanajurca.

12Shina apajpimi, Benjamín aillu puramanda shuj runa chai macanajuimanda calpashpaca, chai punllallata Silo shuti puebloman chayarca. Paica, churajunapash liquirishca, paipaj umapash alpallami chayarca.

13Pai chayashpaca, Eli curagutaca ñan ladopi chapashpa, shuj tiarinapi tiajujtami ñapash ricurca. Paica, Taita Diospaj arcata yarishpami, paipaj shungupica ninanda chujchujurca. Chai macanajuimanda pacajushpa shamuj runa chayashpami, Silo shuti pueblopi causajcunaman tucuita villajurca. Chaita uyashpami, tucui gentecuna ninanda caparinajurca.

14Chashna ninandapacha caparinajujta Elí uyashpami: —¿Imashpata chashna caparinajun?— nishpa tapurca. Villangapaj shamuj runaca, Elipajman calpashpa shamushpami, tucuita villajurca.

15Elí runaca, ña iscun chunga pusaj huatatami charirca. Chaimandami, paipaj ñavipash amsayajpi, na ricui ushajurca.

16Chai runaca, Elitaca cashnami nirca: —Ñucaca, macanajuimandami shamuni. Chai jatun macanajuimanda pacajushpami, cunanga chayamuni— nijpimi Elí runaca: —Ñuca huahualla, ¿imata tucurcayari?— nirca.

17Shina nijpimi chai villaj runaca, cashna nishpa tigrachirca: —Israelcunaca, filisteocunapaj ñaupajmandami pacajushpa calpanajurca. Shinallata gentecunatapash, ashtacatami huañuchirca. Ofni shuti, Finees shuti, cambaj ishcandi churicunatapash huañuchishpami filisteocunaca, Taita Diospaj arcatapash quichushpa aparca— nircami.

18“Taita Diospaj arcata apashcami” nishpa villajpimi, cashna tucurca: Elí runaca, pai tiajushcamandaca, huashaman pungu ladoman urmashpa cunga tullu faquirijpimi huañurca. Paica, ña rucugu cashcamandami, llasha llasha carca. Paica israelcunataca, chuscu chunga huatatami mandajurca.

19Chai punllacunapillatami, Finees shuti runapaj huarmi paipaj jachunga, vijsayu cashpa ña ungunalla carca. Taita Diospaj arcata quichushpa apashcata, paipaj suedropash, paipaj cusapash huañushcata yachashpami, ñapash nanai japirca. Chai nanai japijpimi, cungurishpa ungurca.

20Nanaihuan ña huañunalla sirijujpimi, paipaj ladopi paita ricunajuj huarmicunaca: “Ama manllaichu, jari huahuagutami ungushcangui” ninajurca. Shina nijpipash paica, imatallapash na tigrachishpa, upalla uyajurcallami.

21Paica: “Taita Diospaj arcata quichushpa apashcamandami, punchapamba Diospash, israelcunamanda anchurishca” nishpami chai huahuataca, Icabod shutita shutichirca. Shinallata paipaj suedropash, paipaj cusapash huañushcamandami, chashna shutichirca.

22Cashnami nishca carca: “Taita Diospaj arcata quichushpa apashcamandaca, punchapamba Diosca, israelcunamanda anchurishcami” nishcami carca. Diospaj arcapash, filisteocunapaj llactapimi cashca