1Ñuca almaca, ñuca causaihuanga ñamari shaijushca. Ñuca llaquicunahuan aij nijushcataca, na manllashpa villajushallami. Ñuca almapi ninanda llaquirishpami villajusha.
2Taita Diostaca, cashnami nisha: ‘Llaquichi tucunapachami nishpa, ama saquihuaichu. Ñucahuan imamanda fiñarishcatapash ricuchihuayari.
3¿Cambaj maquihuan rurashca runatallata yangapi churashpa ninanda llaquichishpa, canda na manllajcuna yarinajushcatara alipi churanaca, alimi yanguichu?
4Canga, huañuna runapaj ñavitashnaca, napacha charinguichu. Canga, na runa ricujunshna ricunguichu.
5¿Cambaj causai punllacunaca, runapaj causai punllacunashnachu? ¿Na cashpaca cambaj huatacunaca, huañuna runacunapaj huatacunashnachu?
6Ñuca nalita rurashcataca, ¿imapajta ali yachangapaj munangui? Ñuca juchataca, ¿imapajta callarishpa mascangui?
7Ñuca, canda manllaj cajtaca, canllata yachanguimi. Cambaj maquimanda ñucata, pipash na quishpichi ushashcatapash yachanguimi.
8Cambaj maquihuan rurashpami churahuarcangui. ¿Shina rurashca jahuachu, cutin tucuchigrihuangui?
9Ñucataca, alpa turutashna rurashcata yarihuayari. ¿Ñutu alpamanllatachu tigrachigrihuangui?
10Ñucataca, ¿nachu lechetashna talishpa, quezotashna cuajarcangui?
11Ñucapica carata, aichatami churachircangui. Tullucunatapash, yahuar purina angucunahuanmi ahuashpa churarcangui.
12Llaquishpami, causaitapash cuhuarcangui. Can cuidashpami, ñuca espiritutaca aliguta charingui.
13Chaicunataca, cambaj shungupimi alichishpa charijungui. Chaicunaca, cambaj ladopi cajtami yachani.
14Juchata ñuca rurashca cajpipash, canllatami ricungui. Shinamandami ñuca ima nalita rurashcamandaca, mapa illajtashnaca na ricuhuangui.
15Ñuca chashna nali cashpaca, ¡aij imachari tucusha! Imatapash cashcatapacha ruraj cashpapash, umatallapash na alsai ushashachu. Cunanga, cashna pinganayai llaquihuanmi shaijushca cani.
16Ñuca umata alsajpica, leonshnami japihuangui. Japishpaca cutinllatami ñucataca, imapash manllarinacunata rurangui.
17Ñucataca, ashtahuan llaquichishpa ricungapajmi, cutin alichijungui. Manllanayai soldadocunashnami, ninandapacha can fiñarinataca mirachijungui.
18Ñucataca, ¿imapajta vijsa ucumanda llujchihuarcangui? Ñuca huañushca cajpica, pipash na ricunmanllu carca.
19Ñucaca, na huacharishcashnami caiman carcani. Vijsamandaca, pambana utujumanmi apai tucuiman carcani.
20Ñuca causai punllacunaca ashallamari, ama ashtahuan llaquichihuaichu. Ashatallapash cushijuchun saquihuayari.
21Cutinga na tigramungapaj nara rijpillata, huañui japinalla llandu, manllanayai yana pachaman nara rijpillata, ashatallapash cushijuchun saquihuayari.
22Chai yana yana pachapica, huañuchij llandulla tiashpa imapash nalichu. Shinallata chaipi tiaj michapash, manllanayai yana yana tutashnallatami’ nishami” nijurcami.
Who We AreWhat We EelieveWhat We Do
2025 by iamachristian.org,Inc All rights reserved.
