1Shinamandami, Judá llactapi causaj tucui gentecunaca Uzías shuti runataca, paipaj taita Amasías shuti runapaj randi jatun mandaj cachun churanajurca. Uzías shuti runaca, chunga sucta huatatami charirca.
2Jatun mandaj Amasías runa huañushpa paipaj ñaupa taitacunahuan tandanajushca jipami Uzías runaca, Elot shuti pueblota shayachishpa, Judá llactapajllata cachun tigrachirca.
3Uzías runaca, chunga sucta huatata charishpami, mandai callarirca. Paica, picha chunga ishcai huatatami, Jerusalenbi mandajurca. Paipaj mamaca, Jerusalenmanda Jecolías shutimi carca.
4Uzías runaca, Mandaj Diospaj ñaupajpica, paipaj taita Amasías runa tucui alicunata rurashpa causashcashnallatami alitalla rurajurca.
5Zacarías runa causajui punllacunaca, Taita Diostami mascashpa causajurca. Zacarías runaca, Taita Dios muscuipishna ricuchishcata ali yachajmi carca. Mandaj Diostalla mascashpa causajui chai punllacunapica, Diosca paitaca tucuipimi alipi llujchirca.
6Uzías runaca, filisteocunahuan macanajungapaj llujshishpami, Gat, Jabnia, Asdod shuti pueblo muyundi jatun pircacunata urmachirca. Chai jipaca, Asdod shuti pueblopipash, filisteocunapaj llactapipashmi pueblocunata shayachirca.
7Filisteocunahuan, Gur-baal shuti pueblopi causaj arabecunahuan, amonitacunahuan macanajuipipashmi, Taita Diosca mishachirca.
8Amonitacunaca, imapash caranacunatami Uzías shuti runaman caranajurca. Uzías runa ninan ushaita charijtaca, Egipto llacta linderocamanmi yachanajurca. Judá llactapi causajcunaca, ninan shinllicunami tucushca carca.
9Jerusalenbica, pirca tigranapi tiaj pungu ladopipash, pugru pambaman llujshina pungu ladopipash, caishuj pirca tigranacunapipashmi, Uzías shuti runaca torrecunata shayachirca. Chaicunataca shinllitapachami rurarca.
10Jichushca pambapipashmi, torrecunata shayachirca. Ashtaca animalcunata charishpami, Sefela shuti pambacunapipash, caishuj pambacunapipash, ashtaca jatun utujucunata allashpa yacuta llujchirca. Urcucunapipash, ali fucuj pambacunapipashmi, uvas chagracunata, shuj chagracunata ashtacatapacha charirca. Paica, chagracunata tarpuna munaita charishpami, chashna rurajurca.
11Uzías shuti runaca, macanajunata ali yachaj ashtaca soldadocunatapashmi charirca. Chai soldadocunaca, jatun mandajpaj escribij Jeiel shuti runapash, Maasías shuti mandajpash, jatun mandajllata churashca mandaj puramanda, Hananías shuti mandajpashmi, shuticunata escribishcashnallata shican shican llujshinajurca.
12Familiacunata mandajcunaca, ninan shinlli, imatapash na manllaj ishcai huaranga sucta patsaj mandajcunami carca.
13Chai mandajcunaca, macanajunata ali yachaj, 307.500 ninan shinlli soldadocunatami mandanajurca. Paicunami, jatun mandajta ayudashpa, paicunata fiñajcunahuan macanajurca.
14Uzías runaca, chai tucui soldadocunapajmi, jarcarina escudocunata, lanzacunata, cascocunata, jirru churajunacunata, arcocunata, rumita shitana huaracacunata rurachirca.
15Jerusalenbipash, imatalla ruranata ali yachajcuna ali yarishpa mushujta rurashca jatun macanajunacunatami rurachirca. Chaicunataca, torrecunapi, baluarte nishcacunapi churangapajmi, chashna rurachirca. Chaicunahuan flechacunata, jatun rumicunata shitangapajmi rurachirca. Paitaca, ninan ushaita charingacaman, chashna juyaillaguta Dios ayudajpimi, caru llactapi causajcunapash yachanajurca.
16Ashtahuangarin Uzías runaca, ninan ushaita ña charishpaca, paipaj shungupi jariyashpami llaquipi urmarca. Paita Mandaj Taita Diosta na cazushpami, inciensota cushnichina altarpi inciensota cushnichingapaj, Mandaj Diospaj huasi ucuman yaicurca.
17Azarías curapashmi, paita catishpa yaicurca. Paihuanga, Mandaj Diosta servij pusaj chunga curacunapashmi yaicunajurca. Paicunaca, ninan shinllicunami carca.
18Paicunami, jatun mandaj Uziasta fiñashpa, cashna ninajurca: “Uzías, Mandaj Diosman inciensota cushnichinaca, na can ruranachu. Ashtahuangarin Aaronbaj mirai curacunallami, chaita cushnichingapaj shicanyachishca cashcamanda, caita rurai ushan. Diospajlla ucumanda llujshi. Canga yachashpatami, na cazushcangui. Chashna rurashcacunaca, Mandaj Taita Diospaj ñaupajpica, can alicachi tucungapaca, na cangachu” ninajurcami.
19Shina nijpimi, paica inciensota cushnichingapaj, inciensota cushnichinata chaririaj shayajushpa, curacunahuan ninandapacha fiñarirca. Curacunahuan fiñarishpa, Mandaj Diospaj huasipi shayajujpimi, paipaj frentepica curacuna ricujta, lepra ung:ui llujshirca. Paica, inciensota cushnichina altar ladopimi shayajurca.
20Paipaj frentepi lepra ung:ui ñapash llujshishcataca, curacunata mandaj Azarías curapash, caishuj curacunapashmi ricunajurca. Chaimandami chai ucumandaca, ucha llujchinajurca. Azarías runata, Mandaj Dios llaquichijpimi, Azarías runaca ucha llujshirca.
21Chashnami jatun mandaj Uzías runaca, pai huañungacaman chai lepra ung:uihuan causajurca. Paica, lepra ung:uihuan cashpami, shuj huasipi shican causajurca. Mandaj Diospaj huasimandaca, anchuchi tucushcami causajurca. Mandashpa tiajuna huasipica, Jotam shuti paipaj churimi, Judá llactapi causanajuj gentecunata mandashpa tiajurca.
22Punda punllacuna, jipa punllacuna Uzías runa ashtahuan imatalla rurashcataca, Amoz shuti runapaj churi, Dios ima nishcata villaj Isaiasmi escribirca.
23Uzías runa huañushpa, paipaj ñaupa taitacunahuan tandanajujpica, jatun mandajcunata pambashca lado pambapimi, paipaj taitacunata pambashca ladopi pambarca. “Paica, lepra ung:uihuanmi” nishpami, chashna pambarca. Paipaj randica, Jotam shuti paipaj churimi mandajurca.
Who We AreWhat We EelieveWhat We Do
2025 by iamachristian.org,Inc All rights reserved.
