JUECES 14 - Quichua Imbabura Bible

1Sansón shuti runaca, Timnat shuti pueblomanmi urai rirca. Chai pueblopimi, filisteocunapaj ushi puracunamanda shuj huarmita ricurca.

2Huasiman vichai tigrashpaca paipaj taitaman, paipaj mamamanmi cashna nishpa villarca: —Timnat shuti pueblopimi, filisteocunapaj ushi puracunamanda, shuj huarmita ricurcani. Chai huarmihuan cazarachihuaichi nipanimi— nircami.

3Shina nijpimi paipaj taitapash, mamapash cashna ninajurca: —Circuncisión nishcata na rurashca filisteo huarmicunahuan cazarangapaj ringapaca, ¿nachu cambaj familia purapillata, na cashpaca tucui cai ñucanchi purapillata huarmicuna tian?— ninajurcami. Shina nijpimi Sansón runaca, paipaj taitataca: —Chai huarmihuan cazarachihuailla, paitami alicachini— nirca.

4Ashtahuangarin Sansón runapaj taitapash mamapash, Mandaj Diosllata chashna rurajujtaca na yacharcachu. Paica, filisteocunahuan macanajuchingapajmi chashna rurajurca. Chai huatacunapica, filisteocunami israelcunataca llaquichishpa charirca.

5Sansón runaca, paipaj taitandi mamandimi, Timnat shuti puebloman urai rirca. Chai pueblo ladollapi tiaj uvas chagracunaman chayajpica, shuj maltun leonmi huacashpa, Sansón runata ñapash tuparimurca.

6Mandaj Diospaj Espíritu Sansón runapajman shamujpimi chai leondaca, maltun chivota fitishpa tucuchinshna, maquihuanlla fitishpa huañuchirca. Paipaj maquipica, imatallapash na charijurcachu. Chashna rurashcataca, paipaj taitamambash, mamamambash na villarcachu.

7Shina rurashca jipa urai rishpami, chai huarmihuan parlajurca. Shina parlajpimi, chai huarmipash Sansón runata alicachirca.

8Huaquin punllacuna yalishca jipami, chai huarmihuan cazarangapaj Sansón runaca tigrajushpami, ñanmanda anchurishpa, pai huañuchishca leonda ricungapaj rirca. Chai leonbaj cuerpopica, balun chuspicuna jundashcatapash, balun mishqui shinlliyashcatapashmi ricurca.

9Chai mishquita japishpami, micushpandi ñanda rijurca. Paipaj taita mamata japigrishpaca, paicunapash micuchunmi cararca. Shina carashpapash, huañuchishca leonbaj cuerpomanda chai balun mishquita japishcataca, na villarcachu.

10Chai huarmipaj huasiman paipaj taitahuan chayashpami, chairalla viñaicuna cazarangapaj jatun micuita ruran cashcashnallata, Sansón runapash chashna rurarca.

11Chai filisteocuna Sansón runata ricushpami, cashna ruranajurca: Sansón runahuan cumba tucushpa tianajuchunmi, quimsa chunga runacunata agllarca.

12Paicunatami Sansón runaca, cashna nirca: —Cunanga, na yachai ushanalla yachanatami, cangunaman villagrini. Ñuca cangunaman yachachun nishcata, cai jatun micui canchis punllacaman ñucaman tigrachishpa ali villajpica, linota rurashca quimsa chunga churajunatami, cangunaman carasha. Shinallata fiestapi churajuna quimsa chunga churajunatapashmi carasha.

13Ashtahuangarin ñuca cangunaman yachachun nishcata ñucaman na tigrachi ushashpaca, linota rurashca quimsa chunga churajunatapash, fiestapi churajuna quimsa chunga churajunatapash, cangunami ñucaman cunguichi— nircami. Shina nijpimi paicunaca, cashna nishpa tigrachirca: —Chai na yachai ushanalla yachanataca villailla. Ñucanchica, tucuicuna uyashunllami— ninajurcami.

14Shina nijpimi paicunataca, cashna nirca: “Huañuchishpa micujmandaca, micunami llujshirca. Ushaita charijmandaca, mishquimi llujshirca” nircami. Paicunaca, na yachai ushanalla yachanataca, quimsa punllacamambash na tigrachi usharcachu.

15Ña canchis punlla tucujpimi, Sansón runapaj huarmitaca cashna ninajurca: —Cambaj cusa ñucanchita tapushca chai na yachai ushanalla yachanataca, ima cajtapash ñucanchiman villachun mandai. Na chashna rurajpica candaca, cambaj taitapaj huasi ucu purandimi rupachishun. Cangunaca, ñucanchi imatalla charishcacunata quichungapajllami, caiman cayashcanguichi yarin— ninajurcami.

16Chai jipami Sansón runapaj huarmica, paipaj ñaupajpi huacashpa cashna nirca: —Canga, ñucataca millanayachishpami, na juyahuangui. Shinamandami, na yachai ushanalla chai yachanata, ñuca llactapi causajcunata tapushcataca na villahuangui— nircami. Shina nijpimi Sansón runaca, cashna nishpa tigrachirca: —Ricui, chaitaca ñuca taitamambash, ñuca mamamambash na villashcanichu. ¿Canmanrachu villana cani?— nircami.

17Shina nijpipash, chai huarmica villahuailla nishpami, jatun micui canchis punllataca, Sansón runapaj ñaupajpi huacajurcalla. Sansón runaca, paipaj huarmi huacashpa ninanda tapujujpillatami, ña canchis punlla tucujpica paiman villarca. Shina villajpimi chai huarmica, paipaj llactapi causajcunaman villagrirca.

18Jatun micui tucuri canchis punllapi indi nara huashajujpillatami, chai pueblopi causajcunaca cashna ninajurca: “Balun mishquita yali mishquica, imapash na tianllu. Leonda yali ushaita charijca, imapash na tianllu” ninajurcami. Shina nijpimi Sansón runaca, cashna nirca: “Ñuca malta shicuhuan na yapushpaca, na yachai ushanallata ñuca tapushcataca, ima horapash na yachai ushanguichimanllu carca” nircami.

19Chai jipaca, Mandaj Diospaj Espíritu Sansón runapajman shamujpimi, Ascalón shuti puebloman urai rishpa, filisteo puracunamanda, quimsa chunga runacunata huañuchirca. Chai runacuna churajushcata llujchishpami, chai na yachai ushanalla tapushcata tigrachijcunaman curca. Sansón runaca, nina japirinshna fiñarishpami, paipaj taitapaj huasiman tigrarca.

20Pai rijpimi Sansón runapaj huarmitaca, Sansón runapaj cumbahuanllata cazarachirca. Chai runataca, Sansón runapaj paipaj ali cumbatashnami ricun carca.