1Ñucami, Dios fiñashpa astinshna llaquichijpi, llaquita ricushca runa cani.
2Ñucataca, yana yana tutapimi pushahuarca, michapica na pushahuarcachu.
3Ñucataca fiñashpapachami, cutin cutin tigrashpa, paipaj maquihuan cada punlla macahuarca.
4Shinami, ñuca cuerpotapash, ñuca caratapash rucuyachirca.
Ñuca tullucunatapashmi faquirca.
5Ñuca muyundipipash, baluarte nishcacunata shayachijpimari, jatun llaquicunalla shinlli ruranacunalla muyuhuarca.
6Ña unai huatacunata huañushcacunatashnami, yana yanapi saquihuarca.
7Ñuca tucui muyundita jarcajpimari, llujshitapash na ushani.
Ashtahuan llashachij cadenacunahuanmi huatahuarca.
8Ninanda caparishpa ñuca mañajujpipash, ñuca mañashcata ama uyangapaca, rinritami quilparirca.
9Ñuca rina ñangunatapash, labrashca rumicunahuan jarcashpami, quingu ñandara pushahuarca.
10Paica ososhnami chapariajuhuarca.
León pacalla chaparianshnami carca.
11Shuj ñanda pushashpami, asha asha ñutushpa, llaquinayaita tucuchirca.
12Paipaj arcota chutashpa cacharingapajmi, ñucataca flechata cacharina yuraj señaltashna churahuarca.
13Alichina carapi charijushca flechacunataca, ñuca vijsa ucucaman yalijtami shitarca.
14Ñuca llactapi causajcunapaca, na cazushpa asi tucuna, punllandi asishpa ricui tucunami carcani.
15Jatun llaquicunataca, ñucapi jundachishpami, jayaj ajenjohuan machachinshna saquihuarca.
16Cascajo rumicunahuanmi, ñuca quirucunaca faquirirca.
Ñucataca, uchufahuanmi quilpahuarca.
17Ñuca almapash, casilla ali causaimandaca caruyashcami.
Ima ali tiashcatapash, ña cungashcanimi.
18Chashna cashpami, ñucaca:
“Ñuca ushaipash tucurircami.
Mandaj Diosta shuyashpa causanapash tucurircami” yajurcani.
19Llaquita ñuca apajushcatapash, ñavita urai cumuchi tucushcatapash, ajenjota, jayaj hielta ufiachinshna llaquichishcatapash yaripairi.
20Ñuca almapi ninan llaquita apajushcamandami, chaitaca yarijushalla.
21Caita ñuca shungupi yariajushpallami, ñucaca Diosta shuyashpa causasha.
22Mandaj Dios llaquijpillami, na tucuchi tucushcanchi.
Paica, ñucanchita llaquinataca, ima horaspash na saquishcachu.
23Chai llaquinaca, cada tutamanda mushujmi.
Can imata pactachinapash jatunmari.
24Ñuca tucui almahuanmi:
“Tucui imata ñuca charinapash, Mandaj Diosmari” nircani.
Chaimandami, paitalla shuyasha.
25Mandaj Diosca, paitalla shuyashpa, tucui almahuan paita mascajcunapaca alimari.
26Mandaj Dios quishpichinata upalla shuyanaca aligumari.
27Huambramandapacha yugota apanaca, pipajpash alimari.
28Runaca, pailla upalla tiajuchunlla, Taita Diosllatami, chashna tucuchun churarca.
29Quishpirinata shuyana tiaipajpash, ñutu alpapi shimihuan chayajta cumurichunlla.
30Chugrichij runamambash, lado ñavita ricuchijuchunlla, ninanda pingaichi tucujuchunlla.
31Jatun Diosca, causaita causaicaman shitashpaca na saquinllu.
32Llaquichishpapash, ashtahuangarin pai ninanda juyan cashcashnallatami llaquin.
33Paica, huañuna aichayu runacunataca, na paipaj munai llaquichinllu.
34Llactapi tucui prezu tianajujcunata sarushpa ñutuchun,
35jahua pachapi causajuj Diospaj ñaupajpi, nalicunatara alipi churachun,
36napash llaquichina runata llaquichijuchunga, napacha Jatun Diosca munanllu.
37¿Pita: “Jatun Dios na mandajpillatami imapash tucurca” nitaca ushangayari?
38¿Nachu jahua pachapi causajuj Diospaj shimihuan rimajpi, alipash, llaquipash shamun?
39Causaj quedashca runaca, ¿imamandata huacan?
Runaca, pai juchata rurashcamandami huacanata charin.
40Ñucanchi imashna causanajushcata aliguta yarishunchi.
Mascashpa, Mandaj Diospajman tigrarishunchi.
41Jahua pachapi tiajuj Taita Diostaca, ñucanchi shungutapash, maquitapash, vichai churashpa mañashunchi.
42Ñucanchimari, candaca na cazuparcanchi.
Ñucanchimari, canmandaca anchurircanchi.
Chaimandamari ñucanchi juchataca, na cungarcangui.
43Ninanda fiñarishpami, ñucanchitaca catiriashpa llaquichircangui.
Na llaquishpami huañuchircangui.
44Ñucanchi mañanajushca ama uyarichunga, fuyuhuanmi quilparircangui.
45Ñucanchitaca, shuj gentecunapaj chaupipi nalicachishpa, rimai tucushpa, na ricunayachi tucushpa causachunmi saquircangui.
46Ñucanchita tucui fiñajcunamari, nalicachishpa rimangapaj shimita pascanajurca.
47Ñucanchitaca ninan manllaipash, lazui tucunapash, llaquinayaita tucuchi tucunapash, jatun llaquipashmi japirca.
48Ñuca llactapi causajcuna ninan llaquita apanajushcamandami, ñuca ñavicunamandaca jatun yacushna, viquica jicharijun.
49Ashatallapash cushijuica na tiajpimi, na upallayashpa huacajunilla.
50Mandaj Dios jahua pachamanda ricungacamanmi huacajushalla.
51Ñuca pueblopi causanajuj tucui huarmicunamandami, ñuca ñavipash, ñuca almapash, shaijujta huacarcani.
52Ñucata fiñajcunaca, yanga yangamandami alasyu animaltashna huañuchingapaj catiriahuarca.
53Ñuca causaitaca, yacuta tandachingapaj rurashca jatun utujupi churashpami, rumihuan quilpanajuhuarca.
54Yacupash ñuca umacaman quilpajpimi:
“Cunanga huañunimi” yajurcani.
55Mandaj Dioslla, prezuna utuju ucumandapachami, cambaj shutipi mañarcani.
56Ñuca mañashcataca uyaparcanguimi.
Jatunda llaquirishpa ñuca caparijujta, ama uyangapaca cambaj rinrita ama quilparipaichu.
57Canda ñuca mañajui punllapi, ñucapajman quimirimushpami:
“Ama manllaichu” nihuarcangui.
58Jatun Dioslla, ñuca alma llaquipi cajpica, canmari shayarircangui.
Canmari, ñuca causaitaca quishpichircangui.
59Mandaj Dioslla, ñuca llaquitaca canllata ricushcanguimi, ñucataca mitsahuayari.
60Ñucata ninanda llaquichinajujtapash, ñucata fiñashpa imatalla yarinajujtapash, tucuitami ricuparcangui.
61Mandaj Dioslla, ñucata nalicachishpa rimanajujtapash, ñucata fiñashpa tucui nalita yarinajujtapash uyarcanguimi.
62Paicuna ñucata fiñashpa parlanajujtapash, ñucata llaquichingapaj punllandi yarinajujtapash uyarcanguimi.
63Paicuna tiarijta, jatarijtapash ricupairi.
Ñucataca, nalicachishpami candanajun.
64Mandaj Dioslla, paicunapaj maquihuan rurashcashnallata, paicuna japinataca cupairi.
65Paicunapaj shungu shinlliyachumbash saquipailla.
Can ninanda nalicachinaca, paicunapaj jahuapillata urmachun.
66Mandaj Dioslla, ñapash fiñarishpa catiriashpa, cai pachamanda anchuchipairi.
Who We AreWhat We EelieveWhat We Do
2025 by iamachristian.org,Inc All rights reserved.
