Psalms 37 - Quichua Imbabura Bible

Nalicunapaj causaitami villajunDavid rurashca Salmomi.

1Nali runacunamandaca, ama fiñarichu.

Nalita rurajcuna ruranajujtaca,

na munashpa ricunachu cangui.

2Paicunaca, jihuashnami ñapash anchuchi tucunajunga.

Verde jihuashnami chaquinajunga.

3Mandaj Diosta yariashpa, alita rurajuilla.

Shina rurashpami, llactapica causangui.

Na llullaj shimita yachajushpami cushijungui.

4Shinallata Mandaj Dioshuanlla cushijui.

Paimi, cambaj shungupi imatalla

mañashcacunataca caranga.

5Cambaj causaitaca, Mandaj Diosman mingai.

Paitalla yariashpa causai.

Paica, imata cashpapash rurangallami.

6Imatapash cashcatapacha can rurajushcataca,

michashnami ricuchijunga.

Japina cashcata can japinapash,

chaupi punllashna punchallami canga.

7Mandaj Diospaj ñaupajpica, upalla cailla.

Paitaca shuyajuilla.

Nalicunata ruraj runapaj causaipi tucui ali

llujshijta ricushpapash, ama ninanda

munashpa fiñarijuichu.

8Ninanda fiñarinata saquishpa, chai fiñarinataca shitai.

Nalita ruranataca, ama ninanda munajuichu.

9Nalicunaca tucuchi tucungami.

Ashtahuangarin Mandaj Diosta shuyajcunami,

llactataca japinga.

10Cunanmanda asha punlla jipaca,

nali runaca illangami.

Pai tiajushca pushtuta can ricujpica,

chaipica illangami.

11Ashtahuangarin na jariyajcunami, llactataca japinga.

Casilla ali causaihuanmi, ninanda cushijunajunga.

12Diosta na manllaj runaca, imatapash cashcatapacha

ruraj runata llaquichinatallami yariajun.

Quirutapash canirishpami fiñan.

13Jatun Diosca, chai runataca paipaj punlla

chayamujujta ricushpaca asingami.

14Diosta na manllajcunaca, imagutapash na charij,

imagupash illaj runaguta urmachingapajmi,

espadatapash surcunajun, arcotapash chutanajun.

Imatapash aligutalla rurajcunata

huañuchingapajmi, chashna ruranajun.

15Espadaca, paipaj shungupillatami yaicunga.

Paipaj arcopash, faquishcami canga.

16Juchata rurajcuna ashtacatapacha charinshna

charinapaj randica, imatapash cashcatapacha

ruraj runapaca, ashatalla charinami ashtahuan ali.

17Diosta na manllajcunapaj rigracunaca,

faquirishcami canga.

Ashtahuangarin imatapash cashcatapacha

rurajcunata shinllichijca, Mandaj Diosmi.

18Ima nalitapash na rurajcunapaj causanajui

punllacunataca, Mandaj Diosca rijsinmi.

Paicuna japina cashcapash, causaita causaipajmi canga.

19Llaqui punllacunapipash, na pingai tucunajungachu.

Yarjai punllacunapipash, na munajtami micunajunga.

20Ashtahuangarin Diosta na manllajcunaca tucuringami.

Mandaj Diosta fiñajcunaca, jari llamacunapaj

virashnami yacuyashpa tucurinajunga.

Cushnishnami chinganga.

21Diosta na manllaj runaca,

imata mañashpapash na tigrachinllu.

Ashtahuangarin imatapash cashcatapacha ruraj runaca,

llaquishpami imagutapash caran.

22Pai bendiciashcacunami, llactataca japinga.

Pai ninanda nalicachishcacunaca, tucuchi tucungami.

23Mandaj Diosmi, runa imashna causanataca ricuchijun.

Paimi, chai causaitaca alicachishpa ricujun.

24Maijan runa urmashpapash, na chaipi quedangachu.

Paitaca, Mandaj Diosmi maquimanda charijun.

25Ñucapash huambrami carcani, ñami rucuyani.

Imatapash cashcatapacha ruraj runa

jichui tucushcataca, na ricushcanichu.

Paipaj huahuacuna micunata

mañanajujtapash, na ricushcanichu.

26Paica, ima horapash llaquishpa mañachinllami.

Paipaj miraicunapash, bendiciai tucungami.

27Nalimanda anchurishpa, alitalla rurai.

Shina rurashpaca, causaitami causangui.

28Mandaj Diosca, alita ruraj runatami juyan.

Paipajlla causajcunatapash, na jichushpa saquinllu.

Paicunataca, causaita causaicamanmi huacaichinga.

Ashtahuangarin paita na manllajcunapaj

miraicunaca tucuchi tucungami.

29Imatapash cashcatapacha rurajcunami,

llactataca japinga.

Chai llactapica, causaitami causanajunga.

30Imatapash cashcatapacha ruraj runaca,

ali yachajushca shimicunatami riman.

Paipaj jalluca, imatapash cashcatapachami riman.

31Paipaj shungupica, paipaj Taita Dios

mandashcata yariashpami causan.

Chaimandami paipaj chaquica, na lluchanga.

32Diosta na manllaj runaca, imatapash

cashcatapacha ruraj runata huañuchingapaj

munashpami, pacalla chapajun.

33Mandaj Diosca, na chai runapaj maquipi saquingachu.

Juezcuna juchachinajujpipash, ninandapacha

llaquichi tucuchunga na saquingachu.

34Mandaj Diosta shuyashpa, pai mandashcata cazui.

Paica llactata carangapajmi, candaca jatumbi churanga.

Juchata ruraj runacunata tucuchishca

jipapimi, chaitaca ricungui.

35Diosta na manllaj runataca,

ninanda jatun tucujtami ricurcani.

Verde verde laurel quiru viñajujtashnami ricurcani.

36Shina cashpapash paica chingarcallami,

paica ñapashmi chingarca.

Paitaca mascashpapash, na tarircanichu.

37Ima nalitapash na rurajtaca yaripairi.

Imatapash cashcatapacha rurajtaca ricupairi.

Casilla aliguta causaj runapaca,

jipaman cushijunami tianga.

38Ashtahuangarin na cazujcunaca tandachishpami,

tucuilla tucuchi tucunga.

Diosta na manllajcunapaj miraicunaca tucuringami.

39Ashtahuangarin imatapash cashcatapacha

rurajcunapaj quishpirinaca, Mandaj Diospimi.

Paimi, ninan llaqui huatacunapica shinlli torreshna.

40Mandaj Diosmi, paicunataca ayudashpa huacaichinga.

Paita na manllajcunapaj maquimanda

cacharichishpami quishpichinga.

Paita shuyashcamandami, chashna quishpichinga.