ISAÍAS 31 - Quichua Imbabura Bible

Egiptopi causajcunaca runacunallami, na dioscunachu

1Egiptopi causajcunata, ayudahuai ningapaj urai rijcunaca, ¡aij imachari tucunga! Paicunapaj caballocunatallami, yariaj causanajun. Ashtaca carretacunata charijpi, caballopi tiarij soldadocunapash shinllicuna cajpimi, chaitalla yariaj shuyanajun. Ashtahuangarin israelcunapaj jucha illaj Diostaca, na yarinajunllu. Mandaj Diostaca, na mascanajunllu.

2Shina cajpipash Diospash, alipacha yachajushcami. Shinamandami, llaquita cachamunga. Pai llaquichisha nishcataca, na saquingachu. Jatun nalita rurajcunatapash, chai nalita rurajcunata ayudajcunatapash fiñashpami llaquichingapaj jataringa.

3Egiptopi causajcunaca runacunallami, na Taita Dioschu. Paicunapaj caballocunapash aichallami, na espirituchu. Chaimandami, Mandaj Dios paipaj maquita chutajpica, ayudajcunapash, ayudai tucujcunapash urmashpa, tucuilla paicunaca tucuringa.

4Mandaj Diosmi, cashna nihuarca: “Shuj leonga llamata japishpa, paipaj huahuacunahuan huacashpa micujushpaca, tauca michijcuna tandanajushpa, caparishpa manllachijpipash na manllarinllu. Tandanajushpa shamunajujta ricushpapash, na manllarinllu. Chashnallatami tucuita Mandaj Diospash, paipaj Sion urcupi macanajungapaj urai shamunga.

5Tucuita Mandaj Diosca, alasyu animalcuna jahuata rishpa cuidashnami, Jerusalendaca cuidashpa, llaquimanda llujchishpa, huacaichishpa quishpichinga.

6Israelcunalla, ninanda jariyashpa canguna na cazushca Diospajman tigrarichiyari.

7Chai punllapimi gentecunaca, culquimanda rurashca yanga dioscunatapash, oromanda rurashca yanga dioscunatapash shitanga. Chaicunataca, cangunapaj juchayu maquihuanmi, cangunapajllata rurarcanguichi.

8Chai punllapimi, Asiria llacta runacunaca, huañushpa urmanajunga. Runacunapaj espadahuanga, na huañuchi tucungachu. Na runacunapaj espadahuan tucuchi tucungachu. Chai espadatami, pacajushpa calpanajunga. Paicunapaj chairalla viñai huambracunapash, shujcunata servishpami causanajunga.

9Paicunaca, manllaimandami shinlli tucunapash illaj canga. Mandajcunapash ninanda manllarishpami, paicunapaj banderacunata saquishpa calpanajunga” ninmi Mandaj Diosca. Paica, Sion urcupimi ninata japichishca charijun. Jerusalenbimi, jornota rupajyachishpa shuyajun.