1Diosta na manllaj runa nalita rurashcami,
ñuca shungupica cashna nijuhuan:
“Cai runaca, Diospaj ñaupajpica napacha
Taita Diosta manllashpa causanllu” nijuhuanmi.
2Chaimandami paipaj ricuipica, pai nalita
rurashcataca na taringachu, na
millanayachingachu yashpa, uyanayaita parlarijun.
3Paipaj shimihuanga nalitalla,
umachishpa quichunatallami parlajun.
Paica ali yuyaitapash, alita
ruranatapash saquishcami.
4Paica, camapi sirijushpapash,
nalita ruranatallami yarijun.
Nalitallami rurashpa causan.
Nalita ruranataca, na millanayachinllu.
5Mandaj Dioslla, can llaquinaca,
jahua pachacamanmi chayajun.
Can tucuita pactachij cashcapash, fuyucamanmi chayajun.
6Imatapash cashcatapacha can rurashcapash,
can Taita Diospaj urcucunashnami.
Can llaquichinacunaca, manllanayai
ucu ucu yacucunashnami.
Mandaj Dioslla, gentecunatapash,
animalcunatapash, canmi cuidashpa charijungui.
7¡Taita Dioslla, can llaquij canaca juyaillagumari!
Chaimandami, huañuna aichayu gentecunaca,
llandujuj cambaj alas ucupi pacajunajun.
8Cambaj huasipi juyailla micunatami,
na munajta micunajunga.
Canga, cambaj juyailla ashtaca
yacutapashmi ufiachingui.
9Causaita cuj yacu llujshijujca, canhuanmi.
Cambaj micha punchayachijpimi, michata ricushun.
10Can llaquishcataca, canda rijsijcunaman mirachipairi.
Imatapash cashcatapacha can rurashcatapash,
alitalla shungupi yarijcunaman mirachipairi.
11Jariyashcacuna ñucata llaquichij
shamuchunga, ama saquihuanguichu.
Canda na manllajcunapaj maquihuan ñucata
llaquichinajuchunga, ama saquihuanguichu.
12Chaipimi, nalita ruraj runacunaca urmarca.
Paicunaca, ñami urmachi tucushca,
cutinga na jatari ushangachu.
Who We AreWhat We EelieveWhat We Do
2025 by iamachristian.org,Inc All rights reserved.
