JEREMÍAS 4 - Quichua Imbabura Bible

1Mandaj Diosca, cashnami nin: “Israelcunalla, ñucapajman tigrarimushpaca, tucui shunguhuambacha tigrarimuichi. Ñuca ñaupajmandaca, cangunallata rurashca millanayai dioscunataca anchuchinami canguichi. Chai dioscunataca, na ashtahuan caiman chaiman apashpa purinachu canguichi.

2Shinallata na llullashpalla, ali yuyaihuan imatapash cashnatapacha rurashpa: ‘Mandaj Diosca causajumbachami’ nishpa juramentuichi. Chashna rurajpica, shuj llactacunapi causajcunapash, ñucamandami bendiciai tucunajunga. Ñucahuanmi cushijunajunga” ninmi.

3Mandaj Diosca, Judá llactapi tucui causajcunatapash, Jerusalenbi causajcunatapash cashnami nin: “Alpataca cangunapajllata yapuichi. Casha chaupicunapica, na tarpunachu canguichi.

4Judá llactapi, Jerusalenbi causanajuj runacunalla. Canguna charishca asha aicha carata fitinshna, Mandaj Diospaj ñaupajpi cangunapaj shungutaca circuncisión nishcata ruraichi. Canguna nalita rurashcamanda, nina japirinshna ñuca ama fiñarichunmi, chashna rurana canguichi. Chai ninataca, pipash na huañuchi ushangachu.

Judá llactataca, shuj llactamanda shamushpami llaquichinga nishcami

5Judá llactapipash, Jerusalenbipash caparishpa cashna nishpa villaichi: ‘Trompetata huacachishpa, tucui llactapi tandachishpa shinllitapacha caparishpa cashna nichi: Tucuicuna tandanajushpa, jatun pircacunata charij pueblocunaman yaicushunchi nigrichiyari’ nishpa villaichi.

6Sion shuti pueblopica, banderata alsaichiyari. Pacajungapaca na shayarishpa calpaichiyari. Jahua lado llactamandami, ninan llaquita cachamugrini. Chaica, jatun llaquimi canga.

7Ninanda sachayashca ucumandaca, leonmari vichai shamujun. Llactacunata tucuchijmari, caiman shamungapaj ñanman llujshishca. Cangunapaj llactata tucuchingapajmi, pai tiajushcamandaca ña llujshimushca. Cangunapaj pueblocunaca, shuj gentellapash illaj, llaquinayaita tucuchi tucushcami canga” ninmi.

8Shina cashcamanda cañamuta churajushpa, aij nishpa yarishpa yarishpa huacaichiyari. Mandaj Dios ñucanchihuan fiñarishcamandaca, nara ali tucunllu.

9Mandaj Diosca, cashnatapashmi nin: “Chai llaqui punllacunapica, jatun mandajpaj shungupash, pai churashca mandajcunapaj shungupash, ña huañugrijunshnami tucunga. Curacunapash, manllarishpami musparinajunga. Villajcunapash, manllarishpami ricunajunga” ninmi.

10Shina nijpimi, cashna nircani: “¡Aij, aij, Mandaj Taita Dioslla! Judá llactapi, Jerusalenbi causanajuj cai gentecunataca: ‘Casilla ali causaita charinguichimi’ nishpaca, umachitamari ninanda umachishcangui. Cunanga ñucanchitaca, espadahuan ña huañuchinallamari shuyanajun” nircanimi.

11Chai huatacunapica, Judá llacta cai gentecunatapash, Jerusalenbi causajcunatapash, cashnami ninga: “Ñuca agllashca llactapi causanajuj gentecunapaca, jichushca pamba lomacunata purij, chaquichij huairami shamurca. Chai huaira shamushpaca, huairachishpa mapa illaj granotalla saquingapaca, na shamurcachu.

12Chai huairatapash yali ashtahuan shinlli huairami ñucapajman shamunga. Cunanga, ñucami paicunataca shinllita llaquichigrini” ningami.

13Ricui fiñaj runacunaca, acapanashna calpaj carretacunapimi, fuyu yanayashpa shamunshna, vichai chayamunajunga. Paicunapaj caballocunapash, jatun angatapash yalimi ninanda calpanajun. ¡Aij ñucanchilla, macanajuipi mishai tucushpa, ima charishcatapash quichui tucuchunmi ñucanchitaca, paicunapaj maquipi churashca!

14Jerusalenbi causajcunalla, quishpirishca cangapaca, cangunapaj shungu mapayashcata maillarichiyari. Cangunaca, ¿ima horascamanda jatun nalita ruranata yariashpa causagringuichi?

15Dan shuti llactamandapachami llaqui tiashcataca caparishpa villangapaj shamujun. Shinallata ninan llaqui tiashcataca, Efraín urcumandapachami uyarimujta caparinajun.

16Shuj llactacunapipash, cashna villaichi: “Ricuichi, caita uyachunga, Jerusalenbipash villaichi: ‘Chapaj soldadocunami, caru llactamanda shamunajun. Judá llacta pueblocunapi causajcunata, ninanda caparishpa rimangapajmi shamunajun’ ninmi” nichiyari.

17Mandaj Diosca, cashnatapashmi nin: “Chai soldadocunaca, cangunallata ñucata na cazushcamandami, chagrata cuidaj runacunashna, pueblo muyundipi chapanajun.

18Canguna nalita rurashpa causashcallatami, cangunataca cai llaquipi churarca. Jatun nalita rurashca chai jayajllatami, shunguman chayanga” ninmi.

19¡Aij ñuca shungulla, ñuca shungulla! Ñuca shungu angucunaca, nanaihuan fitirigrinmari. Ñuca shunguca, manllanayaitami fahuajun. Jatun macanajuipaj trompetata huacachishcapash, ninanda caparishcapash uyarijpica, ñuca almaca imashnamanda upalla cangayari.

20Chai jahuan, chai jahuan ninan llaquicuna shamunatamari villanajun. Tucui llactacunamari, tucuchi tucushca. Ñuca carpacunataca, telacunatapash ñapash liquishpami urmachinajun.

21¿Ima horascamanda banderata alsashcata ricushayari, trompeta huacachishcatapash uyashayari?

22“Ñuca agllashcacunaca, ñucata na rijsij shinlli shungucunami. Ñuca huahuacunaca, na imatapash yachaj ali yuyaitapash na charijcunami. Nalita rurangapaca, alipacha yachajushcacunami. Ashtahuangarin alita ruranataca, na yachanachu” ningami.

23Cai pachata ricujpica, llaquinayaita tucuchishca imapash illajmi ricurirca. Jahua pachata ricujpipash, ima punchayachijpash illajmi ricurirca.

24Urcucunata ricujpipash, chujchunajujllami ricurirca. Lomacunapash, tucuillami tucuchi tucushca carca.

25Tucui muyundita ricujpipash, shuj runallapash na ricurircachu. Jahuata rij alasyu animalcunapash, tucuicunami rishca carca.

26Ali fucuj pambacunata ricujpipash, jichushca pambacunallami ricurirca. Mandaj Diosca, ninandapacha fiñashpami, tucuilla pueblocunatapash paipaj ñaupajpica llaquinayaita tucuchishca carca.

27Mandaj Diosca, cashnami nirca: “Tucui llactacunami, llaquinayaita tucuchi tucunga. Shina cashpapash tucuillataca, na tucuchishachu.

28Chai llaqui shamujpimi, cai pachaca yana churajunata churajushcashna tucunga. Jahua pachapashmi yanayanga. Chaitaca, ñucallatami chashna rurashapacha nishpa yarijurcani. Chaita ruranataca, napacha llaquirishpa saquishachu” nircami.

29Caballopi tiarishca soldadocunapash, flechata shitaj soldadocunapash manllanayaita culun nishpami shamunajurca. Chaita uyashpami, pueblopi causajcunaca tucuicuna llujshishpa jatun sachacunapi, jaca rumi huashacunapi pacajugrinajurca. Tucui pueblocunatami, jichushpa saquinajurca. Shinamandami chaicunapica, shujllapash na causanajurca.

30Canga, chashna tucuchi tucushpaca, ¿imatashi rurangui? Juyailla pucalla churajunata churajushca cashpapash, juyailla orocunata huatarishca cashpapash, cambaj ñavi milmacunata yanallaguta rurashca cashpapash, imatapash na rurai ushanguichu. Yangallatami juyaillaguta alichiringui. Canda juyajcunaca canda fiñashpami, huañuchingapaj mascanajunga.

31Punda huahuata ungugrijuj huarmishna, ninan llaquinayaita caparinajujtami uyarcani. Sion shuti pueblopi causajcunami ninanda caparishpa huacanajun. Maquita chutashpami, cashna ninajun: “¡Aij ñucalla, cunanga imachari tucusha! Ñuca almaguca shaijunmari. Cai huañuchij runacunami huañuchigrin” nishpami caparinajun.