1Ñucaca cashnami yajurcani:
“Ñuca jalluhuan ama juchata rurangapaca,
ñuca causaipica aligutami yarisha.
Diosta na manllaj runa ñuca ñaupajpi cajpica,
ñuca shimitaca frenohuanshnami jarcasha” yajurcanimi.
2Upaman tigrashpami, chulunlla tucurcani.
Alita rimana tiajpipash, na rimarcanichu.
Ñuca nanaipash, ashtahuanmi mirarca.
3Ñuca shungu ucutapashmi ruparihuarca.
Ñuca ninanda yarijujpimi, nina japirinshna rupahuarca.
Chaimandami ñuca jalluhuanga, cashna nishpa caparircani:
4“Mandaj Dioslla, ñuca causai tucurinata villahuayari.
Ima punllacunacamanlla causanatapash villahuayari.
Ñuca imashna tucurinalla cajtami yachangapaj munani.
5Ricui, ñuca causana punllacunatapash,
ashatallami cushcangui.
Ñuca causajui huatacunaca, cambaj
ñaupajpica imapash na canllu.
Causanajuj tucui gentecunaca, yangapachami. Selah
6Runaca shuj llandushnallapachami.
Imatapash ninandapacha rurajushcapash, yangapachami.
Ima charinacunata jahuan jahuan mirachinajushpapash,
chaicunata pi japinatapash na yachanllu.
7Jatun Dioslla, ¿cunanga imatashi shuyasha?
Ñucaca candallami shuyajuni.
8Ñucata tucui na cazuj runacunamandaca
cacharichihuayari.
Juizu illaj runa asishpa ricuchunga,
ama saquihuaichu.
9Upaman quedashpami, na rimarcani.
Canllatami chashna rurahuarcangui.
10Can cushca ung:uitaca, ñucamanda anchuchihuayari.
Cambaj maquihuan huactajujpimi, tucurishca cani.
11Runataca, juchamandaca llaquichishpami yachachingui.
Imatapash pai ashtahuan alicachishpa
charishcatami, polilla jurushna tucuchingui.
Tucui gentecunaca yangapachami. Selah
12Mandaj Dioslla, ñuca mañajujtaca uyahuayari.
Ñuca caparishpa mañajujtaca uyahuayari.
Ñuca huacajujpica, ama upalla capaichu.
Cambaj ñaupajpica, shuj llactamanda
purij runashnami cani.
Ñuca ñaupa taitacunashnallata, shuj
llactamanda yalijuj runashnallami cani.
13Nara huañushpa rijpillata, cutin shinlli
tucuchun saquihuailla” nishpami caparircani.
Who We AreWhat We EelieveWhat We Do
2025 by iamachristian.org,Inc All rights reserved.
