APOCALIPSIS 1 - Quichua Imbabura Bible

Jipaman ima tucunatapash, Jesucristomi ricuchishca

1Taita Diosca, ñalla ima tucunata, paita servijcunaman ricuchingapajmi, chai ricuchinataca Jesucristoman curca. Chaitaca, paipaj angelta cachamushpami, paita servij Juanman villachirca.

2Juanmi, Taita Diospaj Shimitapash, Jesucristo imata villashcatapash, imata ricushcatapash, aligutapacha villajun.

3Cashna villashca shimicunata leyishpa, ima tucunatapash caipi escribishca villajujta uyajcunaca, ninanda cushijuichi. Shinallata caipi escribishca shimicuna ima nijujtapash cazujcunaca, ninanda cushijuichi. Punllacunaca ñami pactamujun.

Canchis pueblopi tandanajuj crijcunatami, alillachu capanguichi nishca

4Juan ñucami, Asia llactapi tiaj canchis pueblocunapi tandanajuj crijcunaman escribimuni. Diosca ninan juyaita, casilla ali causaiguta cangunaman carachunmi munani. Paica, cunambash paillatami causajun, pundapash paillatami causajurca, paillatami shamunga. Shinallata pai mandangapaj tiarina ñaupajpi tiajuj canchis espiritucunapash, ninan juyaita, casilla ali causaiguta cangunaman carachunmi munani.

5Chaicunataca, Jesucristopash cangunaman carachunmi munani. Paica, villachun mingashcatapash aliguta pactachijmi. Paimi, huañushcacunapaj chaupimandapash punda causarirca. Shinallata, cai pachapi tiaj jatun mandajcunatapash Mandajmi. Paica, ñucanchita juyashpami, ñucanchi juchacunataca, paipaj yahuarhuan maillarca.

6Paimi ñucanchitaca, paipaj Taita Diosta servij, jatun mandajcuna, curacuna cachun rurarca. Paimanmi, causaita causaicaman tucuita mandajmi cangui, punchapambagumi cangui ni tucushca cachun. Shina cachun.

7Ricuichi, Cristoca fuyupimi shamunga. Paitaca, tucuicunami ricunga. Paita chugrichishpa huañuchijcunapash ricungami. Cai pachapi miraicunaca, tucuicunami paita ricushpa ninanda llaquirishpa huacanajunga. Ari, shinapachami canga.

8“Ñucami, A letrashna tucuita callarichijpash, Zeta letrashna tucuchimujpash cani” nijunmi Apunchi Jesusca. Tucui Ushaita Charij Dios cashpami causajunlla, pundapash paillatami causajurca, paillatami shamunga.

Juanga, Runa Aichayu Tucushcatami muscuipishna ricushca

9Ñucami, cangunapaj huauqui Juan cani. Cangunashnallatami, llaquita apajuni. Dios mandajuj llactapipash, cangunahuanmi causagrisha. Na ñapash fiñarinatapash Jesucristo carajpimi causani. Taita Diospaj Shimita, Jesucristo imata villashcatapash villajushcamandami, mama cucha chaupipi tiajuj Patmos shuti llactapi prezu tiajurcani.

10Chai llactapica, Apunchi Jesusta yarina punllapimi, Diospaj Espíritu junda carcani. Ñuca huashapica trompetata huacanshna, shinllita rimajtami uyarcani.

11Cashnami nihuarca: “Ñucami, A letrashna tucuita callarichijpash, Zeta letrashna tucuchimujpash cani. Can imata ricushcatapash, libropi escribingui. Chaitaca, Asia llactapi tianajuj Efeso, Esmirna, Pérgamo, Tiatira, Sardis, Filadelfia, Laodicea shuti canchis pueblocunapi tandanajuj tucui crijcunaman cachangui” nihuarcami.

12Shina nijpimi, pita ñucahuan rimajun yashpa, tigrarishpa ricurcani. Shina tigrarishpaca, orota rurashca canchis candelerocunatami ricurcani.

13Chai canchis candeleropaj chaupipica, Runa Aichayu tucushcaman rijchajtami ricurcani. Paica, chaqui pundacaman churajushcami, oro chumbita pechopi huatarishca shayajurca.

14Paipaj uma ajchapash yuraj milmashna, rasushna yuraj yurajmi carca. Paipaj ñavipash, nina rupajunshnami carca.

15Paipaj chaquipash, ninapi bronceta rupachishpa punchayachinshnami carca. Pai rimajujpipash, ashtaca yacu huacajunshnami uyarijurca.

16Paipaj ali lado maquipica, canchis luzerocunatami charijurca. Paipaj shimimandaca, ishcandi ladoman filo filo shuj espadami llujshijurca. Paipaj ñavipash, indi ninandapacha rupajunshnami, punchapamba shitamurca.

17Paita ricushpaca, huañushcashnami paipaj chaqui ladopi shitarircani. Shina shitarijpimi, paipaj ali lado maquita ñuca jahuapi churashpa, cashna nihuarca: “Ama manllarichu. Ñucami callarijpash, tucuchijpash cani.

18Ñucami huañushpapash, cutin causajuni. Cunanga, causaita causaicamanmi causajuni. Chashnapachami cani. Huañuipajpash, Hades nishcapajpash llavecunata charijunimi.

19Imata ricushcatapash, cunambi imashna cajtapash, caicunapaj jipa ima tucunatapash escribingui.

20Ñuca ali lado maquipi charijuj, pipash na yachashca canchis luzerocunatapash, orota rurashca canchis candelerocunatapashmi ricurcangui. Chaicunataca, pipash na yachashcatami villajuni. Chai canchis luzeroca, canchis pueblopi tandanajuj crijcunapaj angelcunami. Can ricujushca canchis candeleroca, canchis pueblopi tandanajuj crijcunami.