1Mandaj Dioslla, ñuca mañajujta uyahuayari.
Ninanda ñuca mañajujtaca uyahuayari.
Canga, na llullaj imatapash cashcatapacha
rurajmi cangui.
Shina cashcamanda, ñuca mañajujta tigrachihuayari.
2Canda servijtaca, ama imatalla rurashcata
ricungapaj shayaripaichu.
Cambaj ñaupajpica maijan runapash,
ñucaca imatapash cashcatapachami rurani
nitaca na ushangachu.
3Ñucata fiñajca, catiriashpami
ñuca almata llaquichishca.
Ñuca causaitaca, alpapimari shitashca.
Ñucataca, ña huañushcatashnami,
yana yana tutapi causachun churashca.
4Ñuca espirituca, ñucapillatami ninanda llaquirijurca.
Ñuca shunguca, llaquihuanmi tucurijun.
5Punda punllacunatami yarijurcani.
Tucui imata can rurashcacunatami, aligutapacha yarijurcani.
Cambaj maquihuan imatalla rurashcatami,
ninanda yarijurcani.
6Ñuca maquitaca, cambaj ñaupajmanmi
vichai churarcani.
Ñuca almaca, chaquishca alpashnami
candaca shuyajurca. Selah
7Mandaj Dioslla, ñuca mañajujta ucha tigrachihuayari.
Ñuca espirituca, ñamari huañugrijunshna tucujun.
Ama cambaj ñavita shujman churapaichu.
Can na ricujpica, huañushcacuna
pambai tucugrijunshnami casha.
8Can llaquijujtaca, tutamandata
villachishpa uyachihuayari.
Ñucaca, canda yariashpami causajuni.
Ñuca imashna causanata yachachihuayari.
Ñuca almataca, canmanmi mingarcani.
9Mandaj Dioslla, ñucata fiñajcunamanda
cacharichihuayari.
Ñucaca cambillami pacajuni.
10Cambaj munaita ruranata yachachihuayari.
Canmi, ñuca Taita Dios cangui.
Cambaj ali Espirituca, aligutalla rurana
llactaman pushahuachun.
11Mandaj Dioslla, cambaj shutita
juyaimandami, causaita cuhuangui.
Canga, imatapash cashcatapacha ruraj cashpami,
ñuca almataca ninan llaquimanda llujchihuangui.
12Ñucaca, canda servijmari cani.
Canga llaquij cashpami, ñucata fiñajcunataca tucuchingui.
Ñuca almata na ricunayachij runacunataca,
tucuillatami tucuchingui.
Who We AreWhat We EelieveWhat We Do
2025 by iamachristian.org,Inc All rights reserved.
