JUECES 19 - Quichua Imbabura Bible

1Chai punllacunapica, Israel llactapica, jatun mandaj na tiajpimi, shuj levita runaca, shuj llactamanda shamushca runashna, Efraín urcu carupipacha causajurca. Chai runami, Judá llacta Belén pueblomanda caishuj huarmihuan cazarashca carca.

2Chai huarmica, paitaca na cazunllu carca. Chaimandami levita runataca saquishpa, Judá llactapi tiaj Belén pueblopi causajuj paipaj taitapaj huasiman tigrarca. Chaipimi, chuscu quillata ña causajurca.

3Chaimandami paipaj cusaca, juyana shimicunahuan rimashpa, cutin tigrachimungapaj jatarishpa catirca. Paica, paita servij shuj runata, ishcai burrocunata apashpami rirca. Ña chayajpimi chai huarmica, paipaj taitapaj huasi ucuman pusharca.

4Chaita ricushpami, chairalla huarmipaj taitaca cushijushpa tuparingapaj llujshirca. Chai huarmipaj taita, chai levita runapaj suedro quimsa punllacaman paipaj huasipi quedachijpimi, paica micushpa, ufiashpa pacarijurca.

5Paicunaca, ña chuscu punlla tucujpi tutamandata jatarishpami, levita runaca ringapaj tucurca. Chairalla huarmipaj taitaca, paipaj mashataca cashnami nirca: —Cambaj shungupi shinlli tucungapaj, asha tandatallapash micuyari. Chai jipaca ringuillami— nircami.

6Shina nijpimi micungapaj, ufiangapaj ishcandi tiarirca. Chai jipami, chairalla huarmipaj taitaca, chai runataca cashna nirca: “Ñucami cunan tutagulla, caipi pacaripai nipani. Shina pacarishpaca, cambaj shungupi cushijunguimi” nircami.

7Shina nijpipash chai runaca, ucha ringapajmi jatarijurca. Ashtahuangarin paipaj suedro, caipi pacaripai nijujpillatami, chai tutaca chaipi pacarirca.

8Picha punlla tucujpi, ña ringapaj tutamandata jatarijpimi, chai huarmipaj taitaca cashna nirca: —Cunanga micushpa, cambaj shungupi cushijungapaj, chishangacaman shuyapairi— nijpimi, ishcandi micunajurca.

9Chai jipami chai levita runaca, paipaj caishuj huarmindi, paita servij runandi ringapaj jatarirca. Chaimandami, chai huarmipaj taita, chai levita runapaj suedroca, cashna nirca: —Ricui, punllapash chishashpa ñami amsayagrin. Cunan tutagulla caipi pacaripairi nipanimi. Ricui, punllapash ña tucurinmi. Cambaj shungu cushijuchun, caipi puñupailla. Caya tutamandata jatarishpa, ñanda japishpa cambaj huasiman ringuillami— nircami.

10Ashtahuangarin levita runaca, chaipi pacaringapaj na munashpami, jatarishpa rirca. Paica, tiarinata churashca ishcai burrocunandi, paipaj caishuj huarmindimi, Jebús nishca Jerusalén pueblo chimba puraman chayagrirca.

11Chai Jebús nishca pueblo ladollapi cajpimi, punllapash ashtahuan chishajurca. Chaimandami paita servij runaca, paita mandaj runataca cashna nirca: —Cunanga, jebuseocunapaj cai puebloman jacu. Cai tutaca, chaipimi pacarishun— nircami.

12Shina nijpimi paita mandaj runaca, cashna nishpa tigrachirca: —Na rijsishca, na israelcunapaj pueblomanga, maijan pueblomambash na rishunllu. Ashtahuangarin Gabaa shuti puebloman chayangacaman chimbashunlla— nishpami, paita servij runataca cashnatapash nirca:

13—Cunan tutaca Gabaa shuti pueblopi, na cashpaca Ramá shuti pueblopi pacaringapaj, chai pueblocunaman maijanman cashpapash, ucha jaculla— nircami.

14Chaimanda rishpa Benjamín llacta Gabaa shuti pueblo ladoman ña chayanajujpimi, indi huashajurca.

15Chai tutaca, Gabaa shuti pueblopi pacaringapajmi, paicuna rinajushca ñandaca saquishpa, chai puebloman yaicugrirca. Chaiman yaicushpaca chaipi pacarichunga pipash na mingachijpimi, paicunaca chai pueblo plazapilla tiarinajurca.

16Ña tutayajujpimi shuj rucu runaguca, pambapi imagutapash rurashpa tigramujushca carca. Chai runaca, Efraín urcumandami carca. Paica, Gabaa shuti pueblopica, shuj llactamanda purij runashnami causajurca. Ashtahuangarin chai pueblopi causajcunaca, Benjamín aillu purami carca.

17Chai rucu runagu vichai ricushpami, ñanda purij runa chai pueblo plazapi tiajujta ricurca. Shina ricushpami: —¿Maimanda ringui, maimandata shamungui?— nishpa tapurca.

18Shina tapujpimi chai levita runaca, cashna nishpa tigrachirca: —Judá llactapi tiaj Belén pueblota yalimushpami, Efraín shuti caru urcuman rinajunchi. Ñucaca, chai urcumandami cani. Ñucaca, Judá llactapi tiaj Belén pueblomanmi rircani. Ashtahuangarin cunanga, Mandaj Diospaj huasimanmi rijuni. Shina cajpipash huasipi mingachingapaca, pipash na tianllu.

19Ñucanchica, ñucanchi burrocunaman carangapajpash, siririchumbash ujshata charinchimi. Ñucapash, canda servij huarmipash, canda servij ñucata servishpa purij runapash tandata, vinota charinchimi. Imagupash na illapanllu— nircami.

20Shina nijpimi chai rucu runaguca, cashna nirca: —Imatapash na manllanachu cangui. Cangunapaj ima illajpipash ñucami ricunata charini. Maitata cai plazapica pacaringuichiyari— nircami.

21Shina nishpa, paipaj huasiman pushashpami, chai runapaj burrocunamambash micuchun cararca. Shinallata paicunapash, chaquita maillashca jipami micurca, ufiarca.

22Shina cushijushpa tianajujpimi, chai pueblopi causanajuj nali runacuna ñapash shamushpaca, chai rucu runagupaj huasi muyundipi shayarinajurca. Chai huasi punguta huactachishpami, chai huasi dueño rucu runagutaca, cashna nishpa rimanajurca: —Cambaj huasiman shamushca runata paihuan ñucanchi siriringapaj llujchimui— ninajurcami.

23Shina nijpimi chai huasi dueño runaguca, paicunapajman llujshishpa cashna nirca: —Ñuca huauquicunalla, cai jatun nalitaca na ruranachu canguichi nipanimi. Cai runaca, ñuca huasipi samangapajllami shamurca, cai nalitaca na ruranachu canguichi.

24Ricuichi, jarihuan nara tacarishca ñuca ushitapash, chai runapaj caishuj huarmitapashmi, cunanga canllaman llujchimusha. Paicunataca, imata cashpapash canguna munashcata rurashpa pingaichi ushanguichimi. Cai runahuanga, chai jatun nalitaca, na ruranachu canguichi— nircami.

25Ashtahuangarin chai runacunaca, na uyangapaj munarcachu. Shinamandami chai levita runaca, paipaj caishuj huarmita canllaman llujchirca. Chai huarmita llujchijpi chai huarmipajman chayashpami, tucui tuta nalita ruranajurca. Ña pacarijujpimi, saquishpa rinajurca.

26Ña punllayajujpimi chai huarmica, paipaj cusa tiajuj chai rucu runagupaj huasiman tigrarca. Chai huasi punguman chayamushpami urmarca. Chaipimi, punllayangacaman sirijurca.

27Paipaj cusaca, tutamanda jatarishpa pungucunata pascashpami, ñanda japishpa ringapaj llujshirca. Shina llujshishpaca, paipaj caishuj huarmitaca, pungupi quinraiman churashca caspi jahuapi, maquita churashca sirijujtami ñapash ricurca.

28Chaita ricushpami paica: —Jatari, jacu— nirca. Ashtahuangarin chai huarmica, na rimarcachu. Chaimandami chai runaca alpamanda jatarichishpa, paipaj burropi churashpa, huasiman apashpa rirca.

29Huasiman chayashpaca, shuj cuchillota japishpami, chai huañushca huarmitaca, chunga ishcaicaman mucu tullucunapi fitirca. Shina fitishpami, Israel llactapi causanajuj tucui chunga ishcai aillucunapajman cacharca.

30Chaita tucui ricujcunami, cashna ninajurca: —Israelcuna Egipto llactamanda llujshimushca punllamanda cunangamambash, cashna nalitaca ima horallapash na rurashcachu. Chaitaca, uyaitallapash na uyashpami causashcanchi. Cashna rurashcamandaca, imatallapash rurangapaj aliguta yarishpa parlanajunami canguichi— ninajurcami. Benjamín ailluhuanmi macanajushca