1 JUAN 3 - Quichua Imbabura Bible

Diospaj huahuacunami canguichi

1Ricuichi, Taita Diosca ñucanchita ninandapacha juyashpami ñucanchitaca: “Ñuca huahuacunami canguichi” nirca. Shina cajpimi, cai pachapajtalla rurashpa causajcunaca, Diosta na rijsimanda, ñucanchi paipajlla cajtapash na rijsin.

2Juyashca crijcuna, cunanga ñami Taita Diospaj huahuacuna canchi. Tucurimui punllapi ñucanchi imashna canatapash, nara ricuchimunllu. Ashtahuangarin Cristo ricurimujpimi, paishnallapacha cashun. Paitapash imashnapacha cajtami ricushun.

3Cristoca, jucha illajmi. Shina cajpimi, paita ricungapaj shuyajcunapash, tucuilla paishnalla jucha illaj causangapaj aliguta yariashpa causanajun.

4Juchata rurashpa tucui causajcunaca, Dios mandashca shimitami na cazunajun. Pai mandashcata na cazushpaca, juchatami ruranajun.

5Cristoca, ñucanchipaj juchacunata anchuchingapajmi shamurca. Paica, jucha illaj cajtaca yachanguichimi.

6Maijambash paihuan shujlla tucushpaca, na ashtahuan juchata rurashpa causanllu. Juchata rurashpa maijambash causashpaca, Diostaca nara ricushcachu, nara rijsishcachu.

7Juyashca huahuacuna, cangunataca pactara pipash pandachinman. Imatapash cashcatapacha rurashpa causajca, Cristoshnallata imatapash cashcatapacha rurajmi.

8Juchata rurashpa causajcunaca, tucuillami diablopaj. Cai pacha callarimandapachami diabloca, juchata rurajun. Taita Diospaj Churica, diablo imata rurajujta tucuchingapajmi shamurca.

9Maijan cashpapash Taita Diospajlla huacharishca huahua tucushpaca, Taita Diosllata carashca causaita charishpami, na ashtahuan juchata rurashpa causan. Taita Diospajlla huacharishca huahuapacha tucushca cashpami, juchata rurashpa causaitaca na ushan.

10Maijanlla Taita Diospaj huahuacuna cajtapash, shinallata diablopaj huahuacuna cajtapash rijsinallami: Maijambash imatapash cashcatapacha na rurajcunapash, crijcunata na juyashpa causajcunapash, napacha Taita Diospaj huahuacunachu.

11“Caishujhuan chaishujhuan juyarishpami causana canchi” nishpa villashcataca, cri callarishca punllallatami uyarcanguichi.

12Ñucanchica, Caín shuti runashnaca, na causanachu canchi. Paica, diablopaj cashpami, paipaj huauquitaca huañuchishca. ¿Imamandata paipaj huauquitaca huañuchishcanga? Caín shuti runaca, imatapash nalitalla ruraj cashpami, paipaj huauqui imatapash cashcatapacha rurajujta ricushpaca huañuchishca.

13Ñuca juyashca huauquicuna, panicuna, cai pachapajtalla rurashpa causajcuna, cangunata millanayachijpica, na manllarinachu canguichi.

14Ñucanchica, huañushcashna causanata saquishpami, causaita causagrinaman yalishcanchi. Chaitaca, crij puracuna juyarishpa causashpami yachanchi. Crijcunata maijambash na juyashpaca, huañushcashnami causajun.

15Shuj crijta millanayachijcunaca, maijan cashpapash genteta huañuchij runashnami. Maijan huañuchijpash, causaita causagrinataca napacha paipaj shungupi charinllu. Chaitaca yachanguichimi.

16Cristoca, ñucanchimanda huañushpami, imashna juyarinatapash ricuchimurca. Shinallatami ñucanchipash crijcunata juyashpaca, ñucanchi causaita cuna canchi.

17Maijan cashpapash ninan charij cashpa, imagupash illaj crijta ricuita ricushpaca, paipaj shungupimi ninanda mitsajun. Chashna causajushpaca, ¿imashnata Taita Diospaj juyaitaca charingayari?

18Ñuca juyashca huahuacuna, ñucanchica na shimillahuan, na rimashcallahuan juyanimi ninachu canchi. Ashtahuangarin imagutapash rurashpami, juyajpacha cashcataca ricuchina canchi.

19Shina causashpami ñucanchica, na llullaj Diospaj cajta yachanchi. Shina cashpami, paipaj ñaupajpica tucui shunguhuan cushijushpa causanchi.

20Ñucanchi shungullata nalimari cangui nijujpica, Taita Dioscarin ñucanchi shungutaca yalitami yachan. Paica, imatapash tucuitami yachan.

21Juyashca crijcuna, ñucanchi shungullata na juchachijpica, Taita Diosta yariajlla cushijushpami causanchi.

22Dios mandashca shimicunata cazushpami, pai munashcataca rurashpa causanchi. Pai imata munashcatapash rurashpami, paita imaguta mañashpapash, japishpa causanchi.

23Diosca cashnatami mandarca: Paipaj Churi Jesucristota crichun, caishujhuan chaishujhuan juyarishpa causachunmi mandarca. Pai mandashcashna, juyarishpa causashunchi.

24Taita Dios mandashca shimicunata cazujllami, paihuanga causajun. Shinallata Taita Diospash, paipaj shungupimi causajun. Paillata paipaj Espirituta ñucanchiman carajpimi, ñucanchipaj shungupi Dios causajujta yachanchi.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help