DEUTERONOMIO 5 - Quichua Imbabura Bible

Chunga Mandashca Shimicunami(Éx. 20:1-17)

1Moisesca, tucui israelcunata cayashpami cashna nijurca:

“Israelcuna pactachinajuchun cushca shimicunata, imata rurachun mandashcacunata, cunan canguna uyajta ñuca yachachishcata ali uyahuaichi. Cai mandashcacunata rurangapaca ali yachajushpa, pactachishpa causaichi.

2Ñucanchita Mandaj Taita Diosca, Horeb urcupimi ñucanchihuan ari nijurca.

3Mandaj Diosca, caitaca na ñucanchi ñaupa taitacunahuan ari nijurcachu. Ashtahuangarin cunan caipi causanajunchi, tucui ñucanchihuanmi ari nirca.

4Mandaj Diosca, ñavi ñavimi cangunahuanga, urcupi nina rupajuj chaupimanda rimarca.

5Ñucaca, Mandaj Dios imatalla nishca shimicunata villangapajmi Mandaj Dioshuan, cangunahuan chaupipi carcani. Cangunaca, ninata manllashpami, chai urcuman vichai ringapaca na munarcanguichi. Chaipimi cashna nirca:

6‘Ñucami, Egipto llactapi gañan causajushcamanda llujchimuj, canda Mandaj Taita Dios cani.

7Ñuca ñaupajpica, ama shuj dioscunata charinguichu.

8Can charingapaca, labrashpa rurashca diostapash, imaman rijchaj diostapash ama ruranguichu. Jahua pachapi, cai pachapi, yacu ucupi, alpa ucupi tiajcunaman rijchajcunatapash ama ruranguichu.

9Chaicunataca ama cunguringuichu, servitallapash ama servinguichu. Ñucami, canda Mandaj Taita Dios cani. Ñucaca, ninan ushaita charij ñucapajlla cachun munaj Diosmi cani. Ñucata millanayachij, nalita ruraj taitacunapaj huahuacunata ricungapaj shamushpa, quimsa miraicunacaman, chuscu miraicunacamambash llaquichij Diosmi cani.

10Ashtahuangarin ñucata juyashpa, ñuca mandashcacunata pactachijcunataca, huaranga huaranga miraicunacaman, llaquishpa juyajmi cani.

11Canda Mandaj Taita Diospaj shutitaca, ama yanga rimanguichu. Mandaj Diosca, paipaj shutita yanga rimajtaca, ima nalitapash na rurajtashnaca na yanga ricungachu.

12Samana punllataca, paipajlla cachun shicanyachingapaj, canda Mandaj Taita Dios mandashcashnallata huacaichingui.

13Sucta punllata trabajangui. Chai punllacunami, cambaj tucui ima ruranacunataca rurana cangui.

14Ashtahuangarin canchis punllapica, canda Mandaj Taita Diospaj samana punllami. Chai punllapica, ima ruranatapash ama ruranguichu. Cambaj churipash, ushipash, canda servij jaripash, huarmipash, cambaj huagracunapash, burrocunapash, shuj ima animalcunapash, shinallata shuj llactamanda shamushpa pueblo ucupi canhuan causajuj runapash chai punllapica, ima ruranatapash na rurangachu. Canda servij jaripash, huarmipash canshnallata samachunmi, imatapash na rurana cangui.

15Egipto llactapi gañan causashcataca, yarinami cangui. Chai llactamandaca, canda Mandaj Taita Diosmi, ninan ushaita charij maquihuan, paipaj rigrata chutashpa llujchimurca. Chaimandami Mandaj Taita Diosca, samana punllata huacaichijuchun mandarca.

16Can causana punllacunata ashtahuan mirachijuchunga, canda Mandaj Taita Dios mandashcashnallata, cambaj taitata, cambaj mamata ninanda alicachingui. Canda Mandaj Taita Dios carashca llactapi tucui imata can ruranapipash ali llujshichunmi, chashna rurana cangui.

17Ama huañuchinguichu.

18Cazarashca jahua, ama shujhuan causanguichu.

19Ama shuhuanguichu.

20Cambaj cumba runagutaca, ama yangata chashnapachami nishpa juchachishpa villanguichu.

21Cambaj cumba runagupaj huarmitapash ama munanguichu. Cambaj cumba runagupaj huasitapash, alpatapash, paita servij jaritapash, huarmitapash, paipaj huagratapash, burrotapash, chai cumba runagu ashtahuan imatalla charishcacunatapash ama munanguichu’ nijurcami.

Israelcunaca ninandami manllarinajushca(Éx. 20:18-26)

22Mandaj Diosca, cai shimicunatami, urcupi tucui canguna tandanajushcapi rimarca. Paica, nina chaupimanda yana fuyu ucumandami, shinllita rimarca. Shina rimashpaca, na ashtahuan imatapash nircachu. Chai jipami, ishcai tabla rumicunapi escribishpa, chaicunataca ñucaman cuhuarca.

23Chaipica, cashnami tucurca: Yana yana chaupimanda pai rimajta uyashpa, urcupash rupajujta ricushpami, ñucapajman shamurcanguichi. Aillucunata tucui mandajcunapash, mandaj rucucunapashmi, ñucapajman shamurcanguichi.

24Ñucataca, cashnami nihuarcanguichi: ‘Ricui, ñucanchita Mandaj Taita Diosmi, pai punchapamba cajtapash, jatumbacha cajtapash ñucanchiman ricuchishca. Nina chaupimanda, pai rimajujtami uyashcanchi. Mandaj Diosca, runaman rimajpipash, chai runaca causajunrami. Chaitaca cunanmi ricushcanchi.

25Cunanga, ¿imashpata huañushunyari? Cai jatun manllanayai ninaca, ñucanchitaca tucuchingamari. Ñucanchita Mandaj Taita Dios rimajta cutin uyashpaca huañuringamari.

26Ashtahuangarin causajuj Taita Dios, nina chaupimanda rimajujta ñucanchishna uyashpapash na huañungapaca, ¿runaca imatayari?

27Ñucanchita Mandaj Taita Dios, tucui imatalla nishcataca canllata quimirishpa, uyapailla. Ñucanchita Mandaj Taita Dios, tucui imatalla canman villashcataca, canllata ñucanchiman villanguillami. Ñucanchica, chaitaca uyashpa pactachipashunllami’ nircanguichimi.

28Canguna ñucata chashna nishpa rimanajujta Mandaj Dios uyashpami, pai Mandaj Diosca cashna nihuarca: ‘Cai gentecuna canda imatalla nishca shimicunata, imatalla rimashcacunataca uyarcanimi. Paicuna tucui imatalla nishcacunaca alimi.

29¡Paicuna shina ninajushcashnallata, paicunapaj tucui causaipi, ñucata manllana shungutalla charishpa, tucui ñuca mandashcacunata pactachinajushpaca alimari canga. Shina rurashpaca paicunapash, paicunapaj huahuacunapash, tucui causaipimi aliguta causanajunga.

30Cunanga: Cangunapaj carpacunaman ucha tigraichilla nigri.

31Canga, ñucahuan caipi quedailla. Canmanmi, tucui mandashcacunata, pactachinajuchun cushca shimicunata, imata rurachun mandashcacunata villagrini. Canmi chaicunataca, paicunaman yachachingui. Paicunaman ñuca carashca llactaman yaicushpa, cunan pactachishpa causanajuchunmi, chashna yachachingui’ nihuarcami.

32Cunanga, cangunata Mandaj Taita Dios mandashcashnallata pactachingapaj, aliguta cuidaringuichi. Chai mandashcamandaca, ali ladomambash, lluqui ladomambash, na anchurinachu canguichi.

33Imashna causachun cangunata Mandaj Taita Dios mandashcashnallata causanguichi. Shina causashpami, tucui imata canguna rurashcapash, ali llujshijpi aliguta causanguichi. Canguna japigrijuj llactapipash, ashtaca huatacunatami causanguichi.