ESDRAS 3 - Quichua Imbabura Bible

Altarta cutin rurashpami, Diosta mañashpa cutin callarishca

1Israelcuna punda causanajushca pueblocunamanllata, cutin tigramushpa causai callarishcapash, ña canchis quilla tucujpimi gentecunaca, shujllashna Jerusalenbi tandanajumurca.

2Shina tandanajushpami, Josadac shuti runapaj churi Jesúa shuti curapash, paipaj cumba curacunandi, Salatiel shuti runapaj churi Zorobabel shuti runapash, paipaj cumba curacunandi, israelcunapaj Taita Diospaj altarta rurangapaj callarinajurca. Chai altartaca, Taita Diosta servij Moisés mandashpa escribishcapi nijunshnallata, animalcunata Diosman cushpa tucuillata rupachingapajmi ruranajurca.

3Chai llactacunapi causaj gentecunata manllashpami, chai altartaca punda tiajushca pushtupillata shayachinajurca. Chai altarpimi, Mandaj Diosman animalcunata cushpa tucuillata rupachinajurca. Tutamandapash, chishipashmi tucuillata rupachinajurca.

4Mandashpa escribishcapi nijunshnallatami, malquicunahuan chugllacunata rurashpa, jatun fiestata ruranajurca. Shinallata imashna rurachun mandashcashnami, animalcunata Diosman cushpa, cati cati cada punlla tucuillata rupachinajurca. Imata rurana cashpapash, chai punllami ruranajurca.

5Chashna rurashca jipapashmi, punllandi animalcunata Diosman cushpa tucuillata rupachinajurca. Luna llullu punllacunapipash, Mandaj Diosta yarina jatun fiesta punllacunapipashmi, chashna ruranajurca. Quiquin munaihuan Diosman cushpa animalta huañuchinatapash, ashtahuan imatapash paicunapaj munaimi, Mandaj Diosman caranajurca.

6Canchis quillapaj callari punllamandapachami, Mandaj Diosman animalcunata cushpa tucuillata rupachi callarinajurca. Ashtahuangarin Mandaj Diospaj huasi callari rumicunataca, nara churashcachu carca.

7Huasichijcunaman, carpinterocunamanmi, culquita cunajurca. Shinallata Sidón shuti, Tiro shuti pueblocunapi causajcunamambash, Líbano shuti urcumanda cedro caspicunata, mama cuchata yalimushpa, Jope shuti puebloman apamuchunmi micunata, ufianacunata, aceiteta cunajurca. Chai caspicunata apamuchunga, Persia llactata jatun mandaj Ciro shuti runa munashcashnallatami ruranajurca.

Diospaj huasi callari rumicunatami churashca

8Jerusalenbi, Diospaj huasiman tigramushcapash, ña ishcai huatami tucurca. Chai ishcai huatapaj ishcai quillapimi, Salatiel shuti runapaj churi Zorobabel shuti runapash, Josadac shuti runapaj churi Jesúa shuti runapash, paipaj caishuj huauquicunapash, curacunapash, levitacunapash, prezu apai tucushcamanda Jerusalenman tucuilla tigramujcunapash, Mandaj Diospaj huasita shayachi callarinajurca. Chai huasita shayachijcunata ricushpa imatalla rurachinajuchunga, ishcai chunga huata yalita charij levitacunatami churanajurca.

9Jesúa shuti runatapash, paipaj churicunatapash, paipaj huauquicunatapashmi churanajurca. Shinallata Cadmiel shuti runapash, paipaj churicunapash, Judapaj miraicunapash shujllashna tandanajushpami, Taita Diospaj huasita shayachijcunata ricushpa imatalla rurachingapaj rinajurca. Paicunahuanga, Henadad shuti runapash, paipaj churicunapash, paicunapaj huauqui levitacunapashmi rinajurca.

10Mandaj Diospaj huasita shayachijcuna callari rumicunata churanajujpimi, curacunataca paicunapaj churajunata churajushcallata, trompetata huacachinajuchun churanajurca. Shinallata Asaf shuti levitapaj mirai levitacunatapash, israelcunata jatun mandaj David mandashcashnallatami, platillocunata huactashpa, Mandaj Diosta alicachinajuchun churanajurca.

11Mandaj Diosta pashi nishpa alicachishpa candajcunaca, cashnami ninajurca: “Paica alimari, paica israelcunataca tucui causaipi llaquijunllamari” nishpami candanajurca. Mandaj Diospaj huasi callari rumicunata churanajushpami, tucui gentecuna ninanda cushijushpa caparishpa, Mandaj Diosta alicachinajurca.

12Ashtaca curacuna, levitacuna, ñaupa taitacunapaj huasi ucu puracunata mandajcuna, Diospaj huasi shayajujta punda ricushca rucucunami, Diospaj huasi callari rumicunata churanajujta ricushpaca, caparishpa huacanajurca. Ashtahuangarin shujcunaca ashtacacunapachami, ninanda cushijushpa caparinajurca.

13Shinamandami ninanda cushijushpa caparinajujtapash, caparishpa huacanajujtapash, gentecunaca na yachai usharca. Gentecunaca, ninanda cushijushpami caparinajurca. Chaimandami, paicuna caparinajuica carucaman uyarijurca.