JEREMÍAS 18 - Quichua Imbabura Bible

Mangata rurajmanda, mangata rurana turumandapashmi villajun

1Mandaj Diosca, cai shimicunatami Jeremiasman cashna nishpa villarca:

2“Alpa mangata ruraj runapaj huasiman, jatarishpa ri. Chaipimi, ñuca imata canman villana cashcatapash villasha” nircami.

3Shina nijpimi, ñucaca alpa mangata ruraj runapaj huasiman urai rircani. Chaiman chayajpica, chai runaca shuj rueda jahuapi churashpami, mangata rurajushca carca.

4Pai rurajushca alpa mangaca, paipaj maquipillatami huaglirca. Chaimandami paica, pai munashcashna shuj mangata cutin rurajurca.

5Shinamandami Mandaj Diosca, cai shimicunata cashna nishpa villahuarca:

6“Israel aillucunalla, ¿nachu cangunatapash, alpa mangata ruraj cai runashna rurai ushani? Ricuichi, mangata ruraj runajpaj maquipi turushnami, can israelcunapash ñuca maquipi canguichi. Mandaj Dios ñucallatami, chashna nini.

7Ñucaca cungashcapimi, gentecunatapash, llactacunatapash fiñashpa, sapimanda llujchishpa urmachinata, tucuchillata tucuchinata villagrini.

8Ashtahuangarin tucuchishami nishpa villashca chai gentecuna nalita ruranata saquishpa ñucapajman tigrarijpica, paicunata llaquichingapaj munajushcamandaca llaquirishami.

9Ashtahuangarin maijan gentecunatapash, maijan llactapi mandajcunatapash tarpunshna, ñapash shayachinatami villachisha.

10Shinallata ñuca rimashcata na cazushpa, ñuca ñaupajpi nalita rurajpica, paicunaman alita ruranata yarijushcamandaca llaquirishami.

11Shina cashcamanda cunanga, Judá llactamanda tucui runacunatapash, Jerusalenbi causajcunatapash cashna ni: Mandaj Diosca, cashnami nin: ‘Ricuichi, cangunata fiñashpa llaquichinatami yarijuni. Jatun nali llaquihuan imashna llaquichinatapash, ñami yarishcalla charini. Ama chai llaquita apangapaca, cunanga tucuicuna nali causaita saquishpa tigrarimuichi. Cangunapaj causaipipash, canguna imatalla ruranapipash, alita rurai callarichi’ nishpa villagri” nihuarcami.

12Ashtahuangarin paicunaca, cashnami ninajurca: “Yangallatami chashna nijungui. Ñucanchica, ñucanchipaj yanga dioscunatami catishun. Tucuillami, jatun nalita ñucanchi shungupi yarichishcatallata ruranajushun” ninajurcami.

13Shinamandami Mandaj Diosca, cashna nirca: “Cunanga, shuj llactapi causajcunata tapuichiyari. ¿Maipipash chashna nalicuna tiajta pipash uyashcachu? Israelcunaca, jarihuan nara tacarishca cuitsashna cashpapash, manllanayai jatun nalitallami rurarca.

14Líbano shuti urcu jatun rumi jahuacunamandaca, ¿ima horapash rasu anchuringachu? Caru llactamanda shamujuj chirilla yacucunaca, ¿ima horapash chaquingachu?

15Ñuca agllashcacunaca, yanga dioscunaman inciensota carashpa cushnichishpami, ñucataca cunganajurca. Punda ñangunaman yaicushpami, chai ñangunapi nitijashpa pandarinajurca. Chaimandami, chaqui ñangunatalla purishpa, ancho ñangunataca na purinajun.

16Chashnamandami, paicunapaj llactaca llaquinayaita tucuchi tucunga. Tucui causaipi ninanda asishpa ricuna llactami tucunga. Maijambash cai llactata yalijushpaca, ninanda manllarishpa umata cuyuchishpami yalinga.

17Paicunataca, indi llujshimuj ladomanda huairashnami, paicunata fiñajcunapaj ñaupamandaca, caita chaita cachasha. Jatun llaqui chayamui punllapica, paicunaman ñavita ricuchingapaj randica, huashatami ricuchisha” ninmi.

Huañuchingapaj pacalla parlanajujpimi, Jeremiasca Diosta mañashca

18Jeremías villashcata uyashpaca, cashnami ninajurca: “Shamuichi, Jeremiasta imashna llaquichinata yarishunchi. Mandashca shimita yachachij curapash, yuyaita cuj, alipacha yachajushca runapash, profetapash, na illangachu. Pai villajushcata juchachishpa llaquichingapaj shamuichi. Pai villashcataca, imatallapash na uyanachi canchi” ninajurcami.

19Mandaj Dioslla, ñucata ricuhuayari. Ñucata fiñashpa imatalla rimanajujta uyapairi.

20Alita rurashcamanda nalita tigrachina cajpica, ¿imapajta ñucata pambana utujuta allashca? Cambaj ñaupajpi shayarishpa, paicunapaj alipaj ñuca mañajujtaca, canllata yaripairi. Paicunahuan ama ashtahuan can fiña cachunmi mañajurcani.

21Chaimanda cunanga, paicunapaj huahuacunataca, yarjaimanda huañuchun saquipailla. Shinallata espadahuan manllachishpa, caita chaita cachapailla. Huarmicunatapash huahua illajta, cusa illajta saquipailla. Paicunapaj cusacunapash, espadahuan huañuchi tucunajuchun saquipalla. Chairalla viñai, paicunapaj churicunatapash, jatun macanajuipi espadahuan chugrichi tucuchun saquipailla.

22Paicunata fiñaj soldadocunata cungashcapi can cachamujpica, paicunapaj huasicunapi ninanda caparinajujpash uyarijuchunlla. Paicunaca, ñucata japingapajmi, utujuta allanajushca. Ñuca chaqui sarunapimi, tsagnarina lazuta pacalla churanajushca.

23Mandaj Dioslla, paicuna ñucata fiñashpa huañuchingapaj imashna yarinajujtaca yachapanguimi. Paicunapaj juchataca, ama cungapaichu. Cambaj ñaupajpi chashna nalita rurashcataca, ama anchuchipaichu. Paicunaca cambaj ñaupajpi nitijanshna urmachunlla. Paicunataca, can fiñai punllacunapica chashnatapacha rurapanguilla.