1 CORINTIOS 1 - Quichua Imbabura Bible

Alillachu capanguichi nishcami

1Taita Dios munashpa cayajpi, Jesucristomanda villachun cachashca Pablomi cani. Sóstenes shuti huauquindimi,

2Corinto pueblopi tandanajuj, Taita Diospajlla causanajuj crijcunaman escribimunchi. Cangunaca, Cristo Jesusmandami Diospajlla tucushcanguichi. Cangunaca, ñucanchi Apunchi Jesucristopaj shutipi*, maipi cashpapash mañajcunahuan, paipajlla causachun cayai tucushcacunami canguichi. Jesucristoca paicunatapash, ñucanchitapash Mandajmi.

3Ñucanchi Taita Diospash, Apunchi Jesucristopash ninan juyaita, casilla ali causaiguta, cangunaman carachunmi munanchi.

Dios ninanda juyashpa alicunata carashcamandami, pashi nishca

4Cangunamandaca, ñuca Taita Diostaca ima horapash pashi nijunillami. Cristo Jesusmanda Taita Diosca, cangunata ninanda juyashpa imagutapash caramujushcamandami, pashi nijuni.

5Cristomandami, tucuipi charijyachishpa, tucui juyailla shimicunatapash, tucuita yachajunatapash carashca.

6Shinallatami, Cristomanda villajuj Shimitapash, cangunapaj shungupi shinllitapacha churashca.

7Chaimandami, Dios imatapash aliguta carajpi imapash na illajpi causanguichi. Ñucanchi Apunchi Jesucristo shamunata shuyashpami causanajunguichi.

8Diosmi tucurimui punllacaman, cangunataca shinllichinga. Shina cashpami, ñucanchi Apunchi Jesucristo tigramui punllapica, na juchachi tucunguichi.

9Taita Diosca, imatapash pactachij cashpami, paipaj Churi ñucanchi Apunchi Jesucristohuan shujlla tucushpa causachun, cangunataca cayarca.

¿Cristoca chaupirishcachu?

10Huauquicuna, panicuna, ñucanchi Apunchi Jesucristopaj shutipimi*, cangunataca cashna nipani: Tucuilla shujllashnalla yarishpami parlana canguichi. Canguna purapica, na shicanyarinachu canguichi. Ashtahuangarin alipacha shujlla yuyai tucushpami, chashnatallata yarishpa causana canguichi nipanimi.

11Juyashca crijcuna, Cloé shuti huarmipaj familia villaj shamujpica, canguna purapica fiñanajushpa ninanda rimarijushcatami uyarcani.

12Caitami ningapaj munani: Canguna purapica, cashnami ninajunguichi ninga: “Ñucaca, Pablota catijmi cani. Ñucaca, Apolos shuti runata catijmi cani. Ñucaca, Cefas shuti runata catijmi cani. Ñucaca, Cristota catijmi cani” nirinajunguichi ninga.

13¿Cristoca chaupirishcachu? ¿Pablo ñucachu cangunamandaca, cruzpi chacatai tucushpa huañurcani? Na cashpaca, ¿Pablopaj shutipichu bautizai tucurcanguichi?

14Taita Diostami pashi nini. Cangunataca, maijandapash na ñuca bautizarcanichu. Crispo shuti, Gayo shuti runacunatallami ñuca bautizarcani.

15Cangunaca ama: “ñucaca, Pablopaj shutipimi bautizarircani” ninajuchunmi, pitapash na bautizarcani.

16Shinallata Estéfanas shuti runatapash, paipaj huasi ucu purandimi bautizarcani. Ashtahuanga maijandapash, shujta bautizashcataca na yarinichu.

17Cristoca, bautizachunga na cachamuhuarcachu. Ashtahuangarin ali villaita villachunmi cachamuhuarca. Alipacha yachajushca shimicunahuan villachunga, na cachamuhuarcachu. Chashna cachamujpica, Cristota chacatashpa huañuchishcami yanga canman carca.

Cristomandapash, Taita Diospaj ali yachaimandapash, ninan ushaimandapashmi villajun

18Cristota cruzpi chacatashcata villashca shimicunaca, chingaita chingangapaj rijcunapaca, juizu illaj runa parlarijunshnami uyarin. Ashtahuangarin ñucanchi quishpirishcacunapaca, chai shimicunaca Taita Dios ninan ushaita charijtami ricuchijun.

19Escribishcapica cashnami nijun:

“Alipacha yachajushcacuna yachajushcataca tucuchishami.

Shinallata ali yuyaita charijcuna,

ali yuyaita charishcatapash yangapimi churasha” nijunmi.

20¿Alipacha yachajushca runaca, maipita? ¿Escribij runaca, maipita? ¿Cai pachapi imapash tiajta rimaj runaca maipita? ¿Nachu Taita Diosca, cai pachapi ali yachaitaca, juizu illanshna ricurichun churashca?

21Cai pachapi causanajuj alipacha yachajushcacunaca, Taita Diospaj ali yachaitaca, na yachai usharcachu. Juizu illaj runa parlarijunshna villashca shimita uyashpa, crishcacunataca chai ali yachaimandami Taita Diosca cushijushpa quishpichin.

22Judea llactapi causajcunaca, imatapash juyaillata rurashpa ricuchihuai ninajunmi. Griego* nishca gentecunaca, ali yachaitami mascanajun.

23Ashtahuangarin ñucanchica, Cristota chacatashcatami villanajunchi. Chaica, Judea llacta gentecunataca, nitijachij rumishnami. Na israelcunapaca*, juizu illaj runacuna parlashcashnami.

24Ashtahuangarin Judea llactamanda cajpi, griegocuna cajpipash, Dios cayashcacunapaca, Taita Dios ninan ushaita charijta, ali yachaita charijtami Cristoca ricuchijun.

25Taita Dios juizu illajtashna rurashcami, gentecunataca ashtahuan yali alipacha yachajushca ricurin. Shinallata imatapash na rurai ushajtashna Taita Dios rurashcami, gentecunataca ashtahuan yali ushaita charin.

26Huauquicuna, panicuna, cangunata Dios cayashcataca aliguta yarichi. Canguna purapica, cai pachapi alipacha yachajushcacuna, ushaita charijcuna, ninanda alicachi tucushcacunapash, na taucacunachu canguichi.

27Ashtahuangarin alipacha yachajushcacunata pingaichingapajmi, cai pachapi imatapash na yachajcunatara, Taita Diosca agllashca. Shinallata ninan ushaita charijcunatapash pingaichingapajmi, cai pachapi na ushaita charijcunatara agllashca.

28Ashtahuan alimi canchi nijcunata pingaichingapajmi, cai pachapi yangallacunata, yangapi churai tucushcacunatara, Taita Diosca agllashca.

29Diospaj ñaupajpica pipash ama jariyanajuchunmi, chashna agllarca.

30Ashtahuangarin Diosmandami cangunaca, Cristo Jesushuan shujlla tucushcanguichi. Paillatami, Taita Diosmanda ali yachaitapash, imatapash cashcatapacha rurashcashna chasqui tucunatapash, paipajlla causachumbash, quishpirishcacuna cachumbash caramurca.

31Escribishcapi nijunshna jariyachunmi, chashna rurarca. Chaipica cashnami nijun: “Maijambash jariyangapaj munashpaca, Jatun Diosmanda jariyachun” nijunmi.