2 REYES 2 - Quichua Imbabura Bible

Eliseoca, Eliaspaj randimi villajushca

1Eliastaca, jahua pachaman jatun acapanapi Mandaj Dios apangapaj munajujpimi, cashna tucurca: Eliasca, Eliseondimi Gilgal shuti pueblomanda shamunajurca.

2Chaipimi Eliasca, Eliseotaca cashna nirca:

—Cunanga, canga caipi quedailla. Ñucataca Mandaj Diosmi, Bet-el shuti puebloman cachajuhuan— nircami.

Shina nijpimi Eliseoca, cashna nirca:

—Mandaj Diosca causajumbachami, cambash causajunguimi. Candaca na saquishachu— nircami.

Chaimandami, Bet-el shuti puebloman ishcandi urai rinajurca.

3Chaiaman ña chayajpimi, Dios ima nishcata villangapaj yachajujcunaca, Eliseota tuparingapaj, Bet-el pueblomanda llujshishpa cashna ninajurca:

—¿Mandaj Diosca, canda mandajta cunan quichushpa apanataca yachanguichu?— ninajujpimi, Eliseoca:

—Ari, yachanimi. Upalla caichilla— nirca.

4Eliasca, cutinmi Eliseotaca cashna nirca:

—Cunanga, canga caipi shuyailla. Ñucataca, Mandaj Diosmi Jericó puebloman cachajuhuan— nircami.

Shina nijpimi, Eliseoca:

—Mandaj Diosca causajumbachami, cambash causajunguimi, candaca na saquishachu— nirca.

Chaimandami, Jericó puebloman ishcandi shamunajurca.

5Ña chayajpimi, Dios ima nishcata villangapaj yachajujcunaca, Jericó pueblomanda llujshishpa Eliseopajman quimirishpaca, cashna ninajurca:

—¿Mandaj Diosca, canda mandajta cunan quichushpa apanataca yachanguichu?— ninajujpimi, Eliseoca:

—Ari, yachanimi. Upalla caichilla— nirca.

6Chai jipami Eliasca, Eliseotaca cashna nirca:

—Candaca, caipi quedapailla nipanimi. Ñucataca Mandaj Diosmi, Jordán yacuman cachajuhuan— nircami.

Shina nijpimi Eliseoca, cashna nirca:

—Mandaj Diosca causajumbachami. Cambash causajunguimi, candaca na saquishachu— nircami.

Chaimandami ishcandillata rinajurca.

7Chaiman chayashpaca, Jordán yacu ladopimi ishcandi shayarirca. Chaipi shayanajujpimi, Dios ima nishcata villangapaj picha chunga yachajujcuna shamushpaca, paicunapaj chimba purapi carupi shayarinajurca.

8Chaipimi Eliasca, paipaj jahualla churajunata llujchishpa patarishpaca, yacuta astirca. Shina astijpimi, yacuca caiman chaiman anchurijpi, paicunaca chaquishca alpata ishcandi yalinajurca.

9Ña yacuta yalishca jipami Eliasca, Eliseotaca cashna nirca:

—Ñucata cambaj ñaupajmanda nara anchuchijpillata, imata canmanda rurachun munashpapash mañahuailla— nircami.

Shina nijpimi Eliseoca, cashna nirca:

—Can charishca espiritumandaca, chaupi yalita cuhuai nipanimi— nircami.

10Shina nijpimi Eliasca, cashna nirca:

—Na cui ushanallatami mañahuangui. Shina cajpipash, cambaj ladomanda quichushpa ñucata apajta ricushpaca, japinguimi. Ashtahuangarin na ricushpaca, na japinguichu— nircami.

11Paicuna chashna parlashpa rinajujpillatami, cashna tucurca: Nina carreta, nina caballocunahuan ñapash shamushpami, ishcandita shicanyachirca. Shina shicanyachijpimi Eliasca, jatun acapanapi jahua pachaman vichai rirca.

12Chaita ricushpami Eliseoca, cashna nishpa caparirca: “¡Ñuca taitalla, ñuca taitalla, canga israelcunapaca macanajuna carretacunashna, caballopi tiarishca soldadocunashnami cangui!” nircami. Chai jipaca, Eliastaca na ashtahuan ricurcachu. Chaipimi, paipaj churajunata llujchishpa ishcaipi liquirca.

13Chai jipaca, Eliaspaj jahualla churajuna urmashpa quedashcata japishpa tigrashpami, Jordán yacu manñapi shayarirca.

14Chaipi shayajushpami, Eliaspaj jahualla churajuna urmashcata japishpaca: “¿Eliasta Mandaj Taita Diosca, maipita?” nishpa, chai churajunahuan yacuta astirca.

Elías astishcashnallata astijpimi yacuca, caiman chaiman anchurirca. Chashna anchurijpimi, Eliseoca chimbarca.

15Dios ima nishcata villangapaj yachajujcunaca, Jordán yacu chimba ladoman Jericó pueblopi shayanajushpa, chaita ricushpami cashna ninajurca: “Eliaspaj espiritumi, Eliseopajpi causajun” ninajurcami. Shina nishpami, Eliasta tuparingapaj rishpa, paipaj ñaupajpi cungurinajurca.

16Paitaca cashnami ninajurca:

—Ricui, caipimi canda servij purapica, picha chunga shinlli runacuna shayanajun. Paicunataca, canda mandaj Eliasta mascachun cachapailla. Paitaca, Mandaj Diospaj Espiritura maijan urcumambash, na cashpaca maijan pugru pambamambash apashpa shitashcanman— ninajurcami.

Shina ninajujpimi, Eliseoca:

—Na pitapash cachanachu canguichi— nirca.

17Ashtahuangarin paicunaca, cachapaillayari ninajujpillatami Eliseoca, pingai tucushpa:

—Shina cashpaca cachaichilla— nirca.

Shina nijpimi paicunaca, chai picha chunga runacunata cacharca. Paicunaca, quimsa punllacaman mascashpapash, Eliastaca na tarircachu.

18Jericó pueblopi quedashca Eliseopajman paicuna tigramujpimi, Eliseoca:

—¿Nachu na rinachu canguichi nircani?— nirca.

19Jericó pueblopi causanajuj runacunami, Eliseotaca cashna ninajurca:

—Ricui, cai puebloca ñucata mandaj ricujunshnallata, ali pushtugumi. Chashna cashpapash, yacuca nalichu. Shinallata pambapipash, imallapash na fucunllu— ninajurcami.

20Shina ninajujpimi, Eliseoca:

—Shuj mushuj mangapi cachita churashpa apamuichi— nijpimi, paicunaca apamunajurca.

21Eliseoca, yacu pugyucunaman rishpa, chai pugyucunapi cachita shitashpami cashna nijurca:

—Mandaj Diosca cashnami nin: ‘Ñucami, cai yacutaca jambircani. Shina cashcamanda cai yacupica, huañuipash, ung:uipash na ashtahuan tiangachu’ ninmi— nijurcami.

22Shina nijpimi chai yacuca ali tucushpa, Eliseo imashna nishcashnallata cunangaman ali.

23Chai jipaca, chai pueblomandaca Bet-el shuti pueblomanmi, Eliseoca vichai rijurca. Paica, ñanda vichai rijujpimi, pueblopi causanajuj shuj huambracuna llujshishpaca: “¡Lluchu uma runa, vichai rilla! ¡Lluchu uma runa, vichai rilla!” nishpa asinajurca.

24Chaimandami, huashaman tigrarishpa Eliseo ricushpaca, Mandaj Diospaj shutipi chai huambracunataca, cashna nirca: “Paicunataca, ima llaquipash japishpaca alichari canman” nircami. Chashna nijpimi, ishcai osocuna sachamanda llujshishpa, chuscu chunga ishcai huambracunataca, caita chaita fitishpa huañuchirca.

25Chai pueblomandaca, Carmelo shuti urcumanmi Eliseoca rirca. Chai urcumandaca, Samaria pueblomanmi tigrarca.