NÚMEROS 15 - Quichua Imbabura Bible

Diosman imagutapash caranacunamanda mandashcacunami

1Mandaj Diosca, Moisestaca cashnami nirca:

2“Israelcunaman, cashna nishpa villangui: ‘Cangunaca, ñuca carashca llactamanmi causangapaj yaicunguichi.

3Chaiman yaicushpaca, Mandaj Dios ñucaman rupachishpa caranatami apamunguichi. Shinallata ñucaman cushpa tucuillata rupachina animalta, na cashpaca ñucaman cushpa huañuchina animalta, na cashpaca imagutapash carashapachami nishpa shicanyachishcata, na cashpaca cangunapaj munaillata carangapaj shicanyachishcata, na cashpaca cangunapaj jatun fiestacunapi, Mandaj Dios ñucapajman mishquillagu ashnajuchun carangapajmi apamunguichi. Chaicunata apamushpaca, huarmi huagracunata, na cashpaca llamacunata apamunguichi.

4Mandaj Dios ñucaman imagutapash carangapaj apamushpaca, ishcai kilo yali ashtahuan ali jacuta, shuj litro chaupi aceitehuan masashcatami cuhuanga.

5Shinallata ñucaman cushpa tucuillata rupachishca jahuapash, animalta ñucaman cushpa huañuchishca jahuapash, tucui maltun llamahuanmi shuj litro chaupi talina vinotapash apamuna cangui.

6Tucui jari llamacunamandami, chuscu kilo chaupi ashtahuan ali jacuta, ishcai litro yali aceitehuan masashcata apamuna cangui.

7Shinallata Mandaj Dios ñucaman cushpa rupachijujpi mishquillagu ashnajuchunga, ishcai litro yali talina vinotapashmi apamuna cangui.

8Ñucaman maltun shicuta cushpa tucuillata rupachina cashpa, na cashpaca carashapachami nishcata pactachingapaj ñucaman huañuchishpa carana cashpa, na cashpaca Mandaj Dios ñucahuan ali cangapaj carashpaca, cashna rurangui:

9Chai maltun shicutaca, sucta kilo chaupi yali ashtahuan ali jacuta, quimsa litro yali aceitehuan masashcata cuhuangui.

10Shinallata quimsa litro yali talina vinotapash cuhuangui. Mandaj Dios ñucapaj mishquillagu ashnajuchunmi, shina cushpa rupachina cangui.

11Huagrata cashpa, jari llamata cashpa, maltun llamata cashpa, chivota cashpapash ñucaman carashpaca, cai mandashcapi nijunshnami rurana canguichi.

12Mashna animalta carashcashnallata, cada animalmanda chashna ruranguichi.

13Mandaj Dios ñucapajman ali mishquillagu ashnajuchun rupachingapaj carashpaca, cai llactapi huacharishca tucui gentecunami, cai mandashcapi nishcashna ruranga.

14Shinallata shuj llactamanda shamushca runa cangunahuan causashpa, na cashpaca cangunapaj miraicunahuan causajushpapash, ñucapajman mishquillagu ashnajuchun ñucaman rupachingapaj munashpaca, canguna imashna rurashcashnallatami, paipash ruranga.

15Tandanajushca Israel puramanda cangunapash, cangunahuan causajuj shuj llactamanda runapash, pactachinajuchun cushca cai shimitallatami pactachinga. Cangunapaj miraicunapash, tucui causaipi pactachinajuchun cushca cai shimicunatami ruranajunga. Mandaj Diospaj ñaupajpica, shuj llactamanda runapash, cangunashnallatami canga.

16Cangunapash, shuj llactamanda shamushpa cangunahuan causajuj runapash, cai mandashcapi nijunshnallata, imata rurachun mandashcapi nijunshnallatami rurana canguichi’ nishpa villangui” nijurcami.

17Mandaj Diosca, cashnatapashmi Moisestaca nijurca:

18“Tucui israelcunaman, cashna nishpa villangui: ‘Ñuca pushajuj llactamanmi, cangunaca yaicunguichi.

19Chaiman yaicushpa, chai llactapi fucushca granocunata ña micui callaringapaca, Mandaj Diosmanra imagutapash punda caranguichi.

20Imashnami trillana pambamandaca, Diosmanra punda cunguichi, chashnallatami punda masata rurashpaca, punda japishpa, mishqui tandata rurashpa carana canguichi.

21Tandata rurangapaj punda masashcataca, Mandaj Diosmanrami cuna canguichi. Cangunapaj miraicunapash, chashnallatami cunajunga.

22Moisesman, Mandaj Dios villashca tucui cai mandashcacunatara, pandashpa na ruranguichiman.

23Tucui cai mandashcacunataca, Mandaj Diosmi cangunaman villachun Moisesta mandarca. Mandaj Dios mandashca punllamandapacha, canguna causanajuj tucui huatacunapi pactachinajuchunmi mandarca.

24Tucui tandanajushcacunaca, na yachaimanda pandashpa juchata rurashpaca, tucui tandanajushcacunami, Mandaj Diospaj mishquillagu ashnajuchun, tucuillata rupachingapaj shujlla maltun shicuta cuhuanga. Shinallata mandashcapi nijunshnallatami, imatalla cunatapash, talina vinotapash cuna canguichi. Cangunapaj juchamandapash, shuj jari chivotami cuna canguichi.

25Tucuilla tandanajushca israelcunapaj juchamandaca curami, animalta Diosman cunga. Chaitaca, pandashpa rurashca jucha cajpimi, Diosca cunganga. Paicunallatami, Diosman imaguta caranacunatapash, Mandaj Diosman rupachishpa caranatapash apamunga. Pandashpa juchata rurashcamandaca, Mandaj Diospaj ñaupajpimi cunajunga.

26Shina rurajpimi, tucuilla tandanajushca israelcunapaj juchatapash, shuj llactamanda shamushca paicuna purapi causaj runapaj juchatapash cunganga. Tucui gentecuna pandashpa, juchata rurashca cajpimi cunganga.

27Maijan cashpapash pandashpa juchata rurashpaca, shuj huatata charij chivotami, chai juchamandaca Diosman cunga.

28Pandashpa juchata rurashca runapaj juchamandaca curami, Diosman animalta cunga. Mandaj Diospaj ñaupajpi pandashpa juchata rurashcamanda ali tucujpimi, Diosca chai juchataca cunganga.

29Israel purapillata huacharishca runapash, shuj llactamanda shamushpa, Israel puracunapi causajuj runapash, pandashpa imatapash rurashcamandaca, shuj mandashcatallami charinguichi.

30Ashtahuangarin cai llactapillata huacharishca cashpapash, shuj llactamanda shamushca cashpapash, jariyashpa jatun tucushpa imatapash rurashpaca, Mandaj Diostami fiñachin. Chai fiñachij runaca, Israel puracunamandaca anchuchi tucungami.

31Mandaj Diospaj Shimita yangapi churashpa, pai mandashca shimicunata na alicachishcamandaca chai runaca, Israel puramanda anchuchi tucungapachami. Pai nalita rurashcapash, paipaj jahuapillatami urmanga’ nishpa villangui” nijurcami.

Samana punllapi trabajaj runataca, rumicunahuanmi huañuchishca

32Israelcunaca, jichushca pambapi causanajushpami, paicuna puramanda shuj runataca, samana punllapi yamdajujta japirca.

33Yamdajujta japishpaca Moisespajman, Aaronbajman, tucuilla tandanajushca israelcunapaj ñaupajmanmi pushamunajurca.

34Chai runataca, imata ruranatapash nara villashca cajpimi, prezu churanajurca.

35Chaipimi Mandaj Diosca, Moisesta cashna nirca: “Chai runataca, na llaquishpami huañuchina canguichi. Paitaca, carpacunamanda canllaman llujchishpami, tandanajushca tucui israelcuna rumicunahuan huañuchina canguichi” nircami.

36Shina nijpimi tandanajushca israelcunaca, Mandaj Dios imashna Moisesta mandashcashnallata, chai runataca carpacunamanda canllaman llujchishpa, rumicunahuan huañuchinajurca.

Churajunacunapi flecoscunata churachun mandashcami

37Mandaj Diosca, Moisestaca cashnami nijurca:

38“Israelcunaman, cashna nishpa villangui: ‘Cangunapash, cangunapaj miraicunapash, cangunapaj churajuna pundacunapi flecosta churaichi. Flecosta churashca chai churajuna pundapica, racuta caupushca azul puchata churaichi.

39Chai flecosta canguna ricushpami, Mandaj Dios ñuca tucui imatalla mandashcacunataca yarishpa pactachishpa causanguichi. Shinallata canguna imata ricushcata, shungupi ima nalita munashcata catishpa huainayashna ama causangapajmi, ali canga.

40Shina causashpami cangunaca, tucuita ñuca mandashcacunata yarishpa pactachinguichi. Shinallata cangunaca, cangunapaj Taita Diospajllami causanguichi.

41Ñucami, cangunata Mandaj Taita Dios cani. Cangunapaj Taita Dios cangapajmi, cangunataca Egipto llactamanda llujchimurcani. Ñucami, cangunata Mandaj Taita Dios cani’ ninmi nishpa villangui” nijurcami.