ÉXODO 25 - Quichua Imbabura Bible

Diospaj jatun carpata rurangapaj, imagutapash carachun mandashcami(Éx. 35:4-9)

1Mandaj Diosca, Moisestaca cashnami nijurca:

2“Israelcunataca, cashna ningui: ‘Ñucaman imatalla carashcacunata japipaichi. Tucui jaricuna, paicunapaj tucui shungu munashpapacha ñucaman carashcacunata japipaichi.

3Chai carashcacunata japinacunaca, caicunami canga: Orota, culquita, cobreta,

4azul, morado, yana puca puchacunata, ashtahuan juyailla lino puchata, chivo milmata,

5jari llama caracunata pucata tenishpa, tejón nishca animalpaj caracunata, acacia caspita,

6michata japichingapaj aceiteta, talishpa javina aceiteta, mishquillagu ashnajuj inciensota rurana yacuta,

7ónice nishca rumicunatapash, efod nishcapi, pectoral nishcapi muyundi churana rumigucunatapash japinguichi.

8Ñucapajlla shuj huasi tiachumbash ruranguichi. Chaipimi, paicunapaj chaupipi causasha.

9Jatun carpata ruranata, ñuca ricuchishcashnallata tucui ima minishtishcacunata ruranata, ñuca ricuchishcashnallata chashnatapacha ruranguichi.

Dios mandashcacunata alichina arcata rurachunmi mandashca(Éx. 37:1-9)

10Shinallata acacia caspi arcatapashmi ruranajunga. Chai arcataca, shuj metro chunga centímetro largota, sucta chunga canchis centímetro anchota ruranajunga. Shinallata sucta chunga canchis centímetro jatundami ruranajunga.

11Chai arcataca ucumambash, canllamambash, ashtahuan ali orohuan quilpangui. Chai jahua manñataca, orohuan muyundi juyaillaguta rurangui.

12Chaipi churangapaca, orota yacuyachishca, chuscu oro argollacunata rurangui. Chai argollacunataca, chuscundi esquinapi ishcaitaca shuj ladoman, shuj ishcaitaca caishuj ladoman churangui.

13Acacia caspi varacunata rurashpaca, orohuan jahualla quilpangui.

14Chai vara caspicunataca, chaicunahuan arcata huandushpa apangapaj, arcapaj ishcandi ladopi churashca argollacunapi churachingui.

15Chai vara caspicunaca, chai arcapaj argollacunapimi quedanga. Chaimandaca na anchuchinachu.

16Imashna causanata yachachishcataca, canmanmi cusha. Chaitaca, chai arcapi churangui.

17Arcapaj tapataca, ashtahuan ali orota rurangui. Shuj metro chunga centímetro largota, sucta chunga picha centímetro anchota rurangui.

18Shinallata ishcai querubín nishcacunatapash, orotallata rurangui. Chaicunataca, tapa jahua ishcandi manñacunapi, martillohuan aliguta labrashpa rurangui.

19Shuj querubindaca, caishuj manñapi, caishuj querubindaca caishuj manñapi rurangui. Chaicunataca, ishcandi manñapi tapahuanllata shujllata rurangui.

20Querubingunaca, alascunata jahualla pascashcami, paicunapaj alascunahuan arca tapata quilpanajunga. Querubingunapaj ñavicunaca, caishujhuan chaishujhuan chimba purami, chai tapata ricunajunga. Querubingunapaj ñavicunahuanmi, chashna ricunajurca.

21Shina rurashpaca tapataca, arca jahuapi churangui. Imashna causanata yachachishcataca, canmanmi cusha. Chaitaca, chai arcapi churangui.

22Chaipimi canman villasha. Chai tapa jahuamandami, imashna causanata ñuca yachachishcacuna tiajuj arca tapapi tianajuj ishcai querubingunapaj chaupimanda canhuan rimasha. Israelcunaman mandana tucui shimicunatami, canman mandasha.

Diosman shicanyachishca tandata churana mezata rurachunmi mandashca(Éx. 37:10-16)

23Shinallata shuj mezatapash, acacia caspita rurangui. Chai mezataca, iscun chunga centímetro largota, chuscu chunga picha centímetro anchota rurangui. Shinallata sucta chunga canchis centímetro jatunda rurangui.

24Chai mezataca, ashtahuan ali orohuan jahualla quilpangui. Shinallata chai meza manña muyunditaca, orohuan juyaillaguta rurangui.

25Chai manñatapash, shuj canchis centímetro anchota jarcashpa, asha llujshirishcata muyundi rurangui. Chai jarcashca manña muyunditapash, orohuan juyaillaguta rurangui.

26Chai mezapica, chuscu oro argollacunata rurangui. Chai argollacunataca, mezapaj chuscundi chaqui esquinapi, chaquita churashca chuscundi esquinapi churangui.

27Argollacunaca, meza manñata jarcashpa rurashca ucu ladomanmi tianajunga. Chai argollacunaca, vara caspicunata churachishpa, mezata huandushpa apangapajmi chashna tianajunga.

28Vara caspicunataca, acacia caspita rurashpa, chai varatapash orohuan jahualla quilpangui. Chai varacunahuanmi, mezataca apanajunga.

29Shinallata vishishpa talingapaj platocunatapash, cucharacunatapash, copacunatapash, jatun tastacunatapash rurangui. Chaicunataca, ashtahuan ali orohuan rurangui.

30Chai mezapimi, ñucaman shicanyachishca tandataca, ñuca ñaupajpi punllandi churangui.

Oro candelerota rurachun mandashcami(Éx. 37:17-24)

31Shinallata candelerotapash, ashtahuan ali orota rurangui. Chai candeleroca, martillohuan tacashpa labrashcami canga. Candelero chaquitapash, chaquimanda vichai yalishca troncotapash, copacunatapash manzanacunatapash, sisacunatapash, chaipillata chashnatallata rurashcami canga.

32Candeleropaj troncomandaca, sucta maquimi llujshinga. Caishuj ladomambash quimsa maqui, chaishuj ladomambash quimsa maquimi llujshinga.

33Shuj maquipica, almendro sisatashnalla rurashca, quimsa copata, shujlla manzanata, shujlla sisatami rurashca canga. Caishuj maquipipash, almendro sisatashnallata rurashca, quimsa copata, shujlla fangata, shujlla sisatami rurashca canga. Candeleromanda llujshishca sucta maquipica, chashnallata rurashcami canga.

34Tucuita charijuj chaupi troncopica, almendro sisatashnalla rurashca, chuscu copatapash, paipaj fangacunatapash, paipaj sisacunatapash rurashcami canga.

35Ishcai maquipaj ucu ladopica, shuj manzanatami chaipillata rurashca canga. Caishuj ishcai maquipaj ucu ladopipash, shuj manzanatami chaipillata rurashca canga. Chaishuj ishcai maquipaj ucu ladopipash, shuj manzanatami chaipillata rurashca canga. Chashnami, candelero troncomanda llujshijuj sucta maquipaj rurashca canga.

36Chai candeleropaj manzanacunapash, maquicunapash, shujllata rurashcami canga. Tucui chaicunaca, ashtahuan ali orota martillohuan tacashpa labrashcami canga.

37Shinallata chai candeleropica, canchis uchilla lamparacunatapash rurangui. Chaicunataca, ñaupa ladoman punchayachijuchunmi michata japichina cangui.

38Shinallata micha rupashca pavizacunata anchuchinacunatapash, chai uchufata churana platillocunatapash, ashtahuan ali orota rurangui.

39Chai candelerotaca, chaipi tucui charinacunandi, quimsa chunga chuscu kilota pezaj ashtahuan ali orota rurangui.

40Chaicunataca, imashna ruranata urcupi canman ricuchishcashnallata ali ricushpa rurangui.