NÚMEROS 3 - Quichua Imbabura Bible

Levitacunata cuentashcatapash, paicuna imatalla ruranajushcatapashmi villajun

1Sinaí urcupi Moisesman, Mandaj Dios parlanajui punllacunapica, Moisespaj miraicuna, Aaronbaj miraicunaca, caicunami tiarca:

2Aaronbaj churicunapaj shuticunaca, caicunami carca: Punda churica, Nadab shutimi carca. Cati churicunaca: Abiú, Eleazar, Itamar shuticunami carca.

3Paicunaca, Aaronbaj churicunami carca. Paicunataca, aceiteta talichishpa javishpami, Diosta servij curacuna cachun shicanyachirca.

4Shina cashpapash Nadab shuti, Abiú shuti curacunaca, Sinaí shuti jichushca pambapi cashpami, napash rupachina ninahuan inciensota Mandaj Diosman cushpa rupachinajurca. Chashna ruranajushpami paicunaca, Mandaj Diospaj ñaupajpi huañurca. Paicunaca, huahuacunata na charircachu. Paicuna huañujpica Eleazarhuan, Itamarhuanmi curacuna imatalla ruranataca, paicunapaj taita Aarón mandajpi ruranajurca.

5Mandaj Diosca, Moisesmanmi cashna nishpa villajurca:

6“Leví aillu runacunataca, Aarón cura imatalla mandashcacunata rurashpa paita servinajuchun, paipaj ñaupajman pushamui.

7Paicunaca, Aarón imatalla mandashcacunata, tucuilla tandanajushca israelcuna imata mandashcacunatapash, ñucahuan tuparina jatun carpa ñaupajpi ruranajuchun, shinallata ñuca jatun carpapi ñucapajta ruranapi servinajuchun pushamui.

8Ñucahuan tuparina jatun carpapi tucui imalla tiajcunatapash, israelcuna tucui imatalla paicunaman mingashcatapash, paicunami cuidanajunga. Shinallata jatun carpapipash, paicunami ñucapajta rurashpa servinajunga.

9Levitacunaca, Israel puracunamandaca shicanyachi tucushcacunami. Chaimandami paicunataca, Aaronman paipaj churicunaman cungui.

10Curacuna imatalla ruranacunapi rurai callarichunga Aarondapash, paipaj churicunatapash churangui. Maijambash na rijsishca runa chaita rurangapaj yaicushpaca, huañungapachami” nijurcami.

11Cashnatapashmi Mandaj Diosca, Moisesman cashna nishpa villajurca:

12“Israelcunapaj punda ungushca churicunaca, tucuilla ñucapajmi. Ricuichi, israelcunapaj punda churicunata ñuca japinapaj randica, levitacunatami ñucapaj cachun japircani.

13Egipto llactapi causajcunapaj punda tucuilla churicunata huañuchijushpallatami, israelcunapaj tucuilla punda churicunataca, ñucapajlla cachun agllashpa na huañuchircani. Chaimandami, israelcunapaj punda huacharishca tucuilla jari huahuacunatapash, punda huacharishca tucuilla animalcunatapash, ñucapajlla cachun agllarcani. Ñucami, Mandaj Dios cani” nijurcami.

14Mandaj Diosca, Sinaí shuti jichushca pambapimi, Moisesman cashna nishpa villarca:

15“Levipaj miraicunataca, shuj quillata charijmanda callarishpa, tucuilla jari huahuacunata cuentangui. Paicunapaj ñaupa taitacunapaj huasi ucu puracuna, paicunapaj familiacuna imashna tandanajushcapi cuentangui” nircami.

16Shina nijpimi Moisesca, Mandaj Dios villashcashnallata cuentanajurca. Paita imashna mandashcashnallatami cuentajurca.

17Levipaj churicunapaj shuticunata imashna cuentashcashnallata, caicunami. Paicunaca: Gersón, Coat, Merari shuticunami carca.

18Gersonbaj churicunapaj shuticunaca, paicunapaj familiacuna imashna tandanajushcapi, Libni shuti, Simei shutimi carca.

19Coat shuti runapaj churicunapaj familiacuna imashna tandanajushcapi, caicunami: Amram, Izhar, Hebrón, Uziel shuticunami carca.

20Merari shuti runapaj churicunapaj familiacuna imashna tandanajushcapash, caicunami: Mahli shuti, Musi shuticunami carca. Paicunami, paicunapaj ñaupa taitacunapaj huasi ucu puracuna imashna tandanajushcashnallata, Levipaj familiacuna carca.

21Gersonbaj mirai familiacunaca: Libni shuti, Simei shuticunami carca. Paicunami, Gersonbaj familiacuna carca.

22Paicuna puramandaca, shuj quillata charij huahuamanda callarishpa tucuilla jaricunata imashna cuentashcashnallata, canchis huaranga picha patsaj jaricunami carca.

23Gersonbaj mirai familiacunaca, Diospaj jatun carpa huasha ladopimi, indi huashajuj ladoman carpacunata shayachishpa tianajunga.

24Gersonita nishca miraicunata mandajca, Lael shuti runapaj churi Eliasafmi canga.

25Gersonbaj miraicunaca, Dioshuan tuparina jatun carpapica, Diospaj jatun carpata, carpata jatariajuj carata, Dioshuan tuparina jatun carpaman yaicuna pungupi cortinatami cuidanajunga.

26Shinallata jatun carpa patiota jarcashpa muyushca cortinacunatapash, carpa patioman yaicuna pungu cortinatapash, Diospaj carpa ladopi altarta jarcashpa muyushca cortinatapash, chai cortinacunatallata huatana cabiacunatapash paicunallatami cuidanajunga.

27Coat shuti runapaj miraicunaca: Amramita, izharita, hebronita, uzielita nishca familiacunami. Paicunami, coatita nishca familiacuna carca.

28Diospajlla huasita cuidana jaricunata, shuj quillata charij huahuamanda callarishpa tucuillata cuentajpica, pusaj huaranga sucta patsaj jaricunami carca.

29Coat runapaj churicunapaj mirai familiacunaca, Diospaj jatun carpa ura ladomanmi, carpacunata shayachishpa tianajunga.

30Coat runapaj mirai familiacunata mandajca, Uziel shuti runapaj churi Elizafanmi canga.

31Paicunaca, Diospaj arcata, mezata, candelerota, altarcunata, Diospajlla huasipi Diospajta rurangapaj tucui imalla tiajcunata, jarcariajuj telata, chaipi tucui imalla tiajcunatapashmi cuidanajunga.

32Levitacunata mandajcunata mandajca, Aarón curapaj churi Eleazarmi canga. Paica, Diospajlla huasita cuidajcunata mandajmi canga.

33Merari shuti runapaj miraicunaca: Mahlita nishca, musita nishca familiacunami. Paicunami, Merari runapaj familiacuna carca.

34Paicuna puramandaca, shuj quillata charij huahuamanda callarishpa tucuilla jaricunata imashna cuentashcashnallata, sucta huaranga ishcai patsaj jaricunami carca.

35Merari shuti runapaj mirai familiacunata mandajca, Abihail shuti runapaj churi Zurielmi canga. Paicunaca, Diospaj jatun carpa jahua ladomanmi carpacunata shayachishpa tianajunga.

36Merari shuti runapaj miraicunaca, Diospaj jatun carpapaj tablacunata, caspicunata, pilarcunata, pilarcunata shayachina bazacunata, chaipi tucui ima tiajcunatapashmi cuidanajunga.

37Shinallata carpa patio muyundipi tianajuj pilarcunatapash, chai pilarcunapaj bazacunatapash, estacacunatapash, chai estacacunapi huatana cabiacunatapashmi, paicunallata cuidanajunga.

38Moiseshuan, Aaronhuan, Aaronbaj churicunahuanga, Dioshuan tuparina jatun carpa ñaupa ladomanmi, carpacunata shayachishpa tianajunga. Paicunaca, indi llujshimuj ladoman tiarishpami, Diospajlla huasitaca israelcunapaj randi cuidanajunga. Na rijsishca runa chaiman chayashpaca, huañungapachami.

39Moiseshuan, Aaronhuanga imashna Mandaj Dios mandashcashnallatami, levitacunapaj familiacuna imashna tandanajushcapi, shuj quillata charijmanda callarishpa cuentanajurca. Chai cuentashcacunaca, ishcai chunga ishcai huaranga jaricunami carca.

Punda huacharishcacunata cacharichingapajmi, culquita cushca

40Mandaj Diosca, Moisestaca cashnami nijurca:

“Israel puracunapi tucuilla punda churicunataca, shuj quillata charijmanda callarishpa cuentangui. Paicunataca, paicunapaj shuticunata imashna japinajushcanallata cuentangui.

41Israel puracunapaj tucuilla punda churicunapaj randica, levitacunata ñucapajlla cachun shicanyachingui. Israelcunapaj animalcunamanda punda huacharishca tucui animalcunapaj randica, levitacunapaj animalcunamanda punda huacharishcacunata, ñucapajlla cachun shicanyachingui. Ñucami, Mandaj Dios cani” nijurcami.

42Moisesca, Mandaj Dios mandashcashnami, Israel puracunapi tucuilla punda churicunataca cuentarca.

43Punda huacharishca tucui jaricunataca, paicunata cuentashpa shuticunata imashna japinajushcashnallata cuentangui. Shuj quillata charijmanda callarishpa cuentajpica, 22.273mi carca.

44Chai jipami Mandaj Diosca, Moisesman cashna nishpa villajurca:

45“Israel puracunapi tucuilla punda churicunapaj randica, levitacunata ñucapajlla cachun japi. Israelcunapaj animalcunamanda punda huacharishca animalcunapaj randica, levitacunapaj animalcunamanda punda huacharishca animalcunata ñucapajlla cachun japi. Levitacunaca ñucapajmi, ñucami Mandaj Dios cani.

46Israel puracunapi punda huacharishca churicunaca, ashtacacunami. Chaimandami levitacunataca, ishcai patsaj canchis chunga quimsa jaricunahuan yalin. Shina cashcamanda paicuna cacharishca quedachunga,

47cada jarimandami picha chunga canchis gramota pezaj culquita japina cangui. Chai culquitaca, ñucapajlla huasipi tiaj culquita imashna pezashcashnatallatami japina cangui. Shuj siclo culquica, ishcai chunga gera nishcacunatami charin.

48Chai yalilla tiashca jaricuna cacharishca quedachun japina culquitaca, Aaronmambash, paipaj churicunamambash cungui” nijurcami.

49Shina nijpimi Moisesca, levitacuna cacharichishcamanda ashtahuan yali tiashca jaricuna cacharichi tucuchunga, culquita japirca.

50Israel puracunapi punda churicuna cacharishca quedachunga, chunga picha kilo chaupi yalita pezashca culquitami, Diospajlla huasipi tiaj culquita imashna pezashcashnallata japinajurca.

51Cacharishca quedachun cushca culquita Moisés japishpaca, Mandaj Dios mandashcashnallatami Aaronmambash, paipaj churicunamambash curca. Mandaj Dios imashna Moisesta mandashcashnallatami curca.