LEVÍTICO 6 - Quichua Imbabura Bible

1Mandaj Diosca, Moisesmanmi cashna nishpa villajurca:

2“Maijan cashpapash juchata rurashpami, yachashpata na cazushpa, Mandaj Diostaca ninanda fiñachinga. Paipaj cumba runagu imagutapash mingajpi, na cashpaca paipaj maquipi imagutapash saquijpi na tigrachishpa, na cashpaca shuhuashpa, na cashpaca paipaj cumba runagutallata, yangata juchachishpami fiñachinga.

3Na cashpaca chingachishcata tarishpapapash, na tigrachishpami llullashpa juramentunga. Gentecuna tucui ima juchata ruranata yachanshnallata ima juchatapash rurashpami fiñachinga.

4Chashna juchata rurashpa llaquichishcamandaca, imata shuhuashcatapash tigrachinatami charin. Na cashpaca yangata juchachishpa llaquichishcamandapash, mingashcata umachishpa na tigrachishcatapash, chingachishcata tarishcatapash tigrachinatami charin.

5Na cashpaca tucui imamanda cashpapash llullashpa juramentushpa na tigrachishcataca, maijambaj cajpipash tucuillata tigrachinatami charin. Chashna tigrachijushpaca, juchamanda animalta Diosman cujui punllallatami, pichacaman ashtahuan mirachishpa cunga.

6Nalita rurashcamanda Mandaj Diosman cungapaj apamushpaca, can ricushpa mashnata valichishcatami, llamacunamanda imapash na tucushca shuj jari llamata apamunga. Chai llamataca, juchamanda Diosman cuchunmi curaman cunga.

7Chashna cujpimi, chai runapaj juchamanda cushpa, Mandaj Diospaj ñaupajpi curallata rupachijunga. Chashna rurajpimi, tucui nalicunata rurashcatapash anchuchi tucunga” nijurcami.

Animalcunata Diosman imashna huañuchinatami mandashca

8Mandaj Diosca, Moisestaca cashnatapashmi nijurca:

9“Aarondapash, paipaj churicunatapash cashna nishpa mandai: ‘Animalta Diosman cushpa tucuillata rupachingapaca, cai mandashcatami rurana: Tucuillata rupachina animalca, ninata japichishca altarpimi, punllayangacaman tucui tuta rupashpa pacaringa. Tucuillata rupachina animaltaca, altarpi rupajuj ninami rupachinga.

10Shinallata curapashmi, lino telata rurashca churajunata, lino puchata ahuashca ucuman churajuna calzonda churajunga. Tucuillata rupachina animalta tucuillata rupachishca jipaca, curami chai altar jahuamanda uchufataca, altar ladoman churanga.

11Chai jipami, chai churajushcata llujchishpa, shuj churajunacunata churajushpa, chai uchufataca, carpacunata shayachishca pushtumanda caruman apashpa, na mapayashca pushtupi churanga.

12Altarpi japichishca ninaca, na huañushpa rupajungallami. Ashtahuangarin chai altarpica curami, cada tutamanda yamdata churanga. Chai nina jahuapimi, tucuillata rupachina animaltapash aliguta churanga. Dioshuan ali cangapaj carashpa huañuchishca animalpaj viratapash, chai ninapimi rupachijunga.

13Chai altarpi ninaca rupajungallami. Chai ninaca, na huañungachu.

14Imagutapash Diosman carangapaca, cai mandashcatami rurana: Chai carashcataca, Aaronbaj churi curacunami, Mandaj Diospaj ñaupajman, altar ñaupajman apanga.

15Diosman carashca ashtahuan ali jacutaca, maqui jundata japishpami, chai jacupi churana aceitetapash, Diosman carashca jahuapi tiajuj tucuilla inciensotapash japishpa, altarpi rupachinga. Chaitaca yarichina cachunmi, Mandaj Dios ñucapaj mishquillagu ashnajuchun rupachinga.

16Chai puchushcataca, Aarón curami paipaj churi curacunahuan micunajunga. Chaitaca, ñucahuan tuparina jatun carpa patiopi, ñucapajlla shicanyachishca pushtupimi, levadura illajta micunajunga.

17Chaitaca, levadurata churashpaca na yanungachu. Ñucaman carashpa rupachishcacunamandami, paicuna micuchun carashcani. Chaicunaca, juchamanda ucaman cushpa huañuchishca animalshnallata, nalita rurashcamanda cushcatashnallata, ñucapajlla cachun shicanyachishcami.

18Chaicunataca, Aaronbaj miraicunamanda tucuilla jaricunami micunajunga. Mandaj Diosman cushpa rupachijuchun mandashcacunaca, cangunapaj miraicunapash tucui causaipi pactachinajuchun cushca shimicunami. Shinallata tucui ima cashpapash chaicunapi tacarishpaca, Diospajllami tucunga’ nishpa mandangui” nijurcami.

19Cashnatapashmi Mandaj Diosca, Moisesman cashna nishpa villajurca:

20“Aaronbash, paipaj churicunapash, aceiteta talishpa javi tucushca punllapi, Mandaj Diosman caranacunaca, caicunami: Paicunaca, ishcai kilo yali ashtahuan ali jacutami, tucui causaipi cunajunga. Chaitaca chaupitaca tutamanda, chaupitaca chishimi cunajunga.

21Chaitaca, sartenbi aceitehuan aliguta camllashpami apamuna cangui. Chai carashcamanda chaupishpa chaupishpa yanushcacunataca, Mandaj Diospaj mishquillagu ashnajuchun cungui.

22Aaronbaj randi cura cachun, paipaj churi puracunamanda aceiteta talishpa javi tucushca curapash, chashnallatami ruranga. Caitaca, tucui causaipi pactachinajuchun, Mandaj Dios cushca shimicunami. Chai carashcataca, tucuillatami rupachina.

23Tucui imatalla cura cushcataca, tucuillatami rupachinga. Chaitaca na micungachu” nijurcami.

24Mandaj Diosca, Moisestaca cashnami nijurca:

25“Aaronmambash, paipaj churicunamambash, cashna nishpa villangui: ‘Juchamanda Diosman cushca animalta huañuchijuchun mandashcacunaca, caicunami: Diosman cushpa tucuillata rupachina animalta, cungata muchushpa huañuchina pushtupillatami, juchamanda cushca animaltapash, Mandaj Diospaj ñaupajpi cungata muchushpa huañuchinga. Chaica, Diospajlla shicanyachishcami.

26Chaitaca, juchamanda Diosman cushpa rupachishca curami micunga. Dioshuan tuparina jatun carpa patiopimi, Diospajlla shicanyachishca pushtupi micunga.

27Tucui ima cashpapash chai aichapi tacarishpaca, Diospajllami tucunga. Shinallata animalpaj yahuar zimbrashpa churajunapi javirijpica, chai javirishca pushtutaca, Diospajlla shicanyachishca pushtupimi tajshana cangui.

28Chai aichata yanushca alpa mangataca faquinami. Bronce mangapi yanushca cashpaca, chaitaca aliguta jacushpami, yacuhuan maillana.

29Chai aichataca, cura puracunamanda tucui jaricunami micunga. Chaica, Diospajlla shicanyachishcami.

30Ashtahuangarin Dioshuan tuparina jatun carpa ucupi, juchamanda yahuarta Diosman cungapaj huañuchishca animalpaj aichataca napacha micunachu. Chaitaca ninapimi rupachina.