PROVERBIOS 4 - Quichua Imbabura Bible

Ali yachaimi alicunata caramun

1Huahuacuna, taita yachachishcata uyaichi.

Aliguta yarishpa causanata rijsingapajmi,

aligutapacha uyana canguichi.

2Ñucaca, alitami cangunaman yachachijuni.

Ñuca mandashcataca, na jichushpa saquinachu canguichi.

3Ñucapash, ñuca taitapaj juyashca

churillatami carcani.

Ñuca mamapaca, shujlla huahuashna,

ninanda juyai tucushcami carcani.

4Ñuca taitaca, cashna nishpami yachachin carca:

“Ñuca cushca yuyaicunataca,

cambaj shungupi charingui.

Ñuca mandashcacunata cazushpaca causanguimi.

5Ali yachaita japingui, ali yuyaitapash japingui.

Ñuca shimihuan yachachishca yuyaicunataca,

ama cunganguichu, ama saquinguichu.

6Can na saquijpica, cai ali yachaimi

candapash huacaichinga.

Can juyajpica, candapash cuidangami.

7Tucuimanda yalica, ali yachaimi ashtahuan ali.

Ali yachaitami japina cangui.

Tucui ima charinacunamanda yalica,

ali yuyaitami japina cangui.

8Cai ali yachaita can jatunyachijpica,

candapash jatunyachingami.

Paita can ugllarijpica, candapash alicachingami.

9Cambaj umapipash, juyaillagu

ricurijujtami churachinga.

Juyailla ricurijuj coronatami caranga”

nishpami yachachin carca.

10Ñuca huahualla, ñuca yachachishca

yuyaicunata uyashpa chasquiyari.

Shina causajpimi, can causana

huatacunapash ashtahuan miranga.

11Candaca, aliguta yachajuna ñambimi pushashcani.

Alitalla rurashpa purina ñangunapimi pushashcani.

12Chai ñambi can purijujpica,

imapash na jarcangachu.

Calpashpa rijushpapash, na nitijanguichu.

13Ali yuyaita ñuca cushcataca,

chaririashpa ama saquinguichu.

Chai yachaitaca alichingui.

Chaimari cambaj causai canga.

14Diosta na manllajcuna purina

ñambica, ama yaicunguichu.

Nalicunapaj ñandapash, ama ringuichu.

15Chai ñandaca, ama rishpa saquilla.

Chaimanda anchurishpa yalinguilla.

16Paicunaca, imapash nalita na

rurashpaca, na puñui ushanllu.

Pitapash na urmachishpaca,

puñuitapash chingachinmi.

17Nalita rurashcahuanllami micunajun,

vinotapash shuhuashcatallami ufianajun.

18Ashtahuangarin imatapash cashcatapacha

rurashpa causajcunapaj ñanga, yurajlla

punllayamujuj michashnami.

Ashtahuan ashtahuan punllayamushpa,

alipacha punllayanshnami.

19Diosta na manllajcunapaj ñanga, yana tutashnami.

Paicunaca, imapi nitijarijtapash na yachanajunllu.

20Ñuca huahualla, ñuca yachachishca

shimicunataca aligutapacha uyahuangui.

Ñuca cushca yuyaicunataca, aliguta uyahuangui.

21Cai yachachishcacunaca, cambaj

ñaupajmandapash ama anchurichun.

Cambaj shungu ucupipash, alichishpa charingui.

22Cai yachachishcacunata tarijcunapaca,

causaita cuj cashcamanda, tucuilla cuerpopaj

jambi cashcamanda chashna charingui.

23Tucui imatalla alichishcamanda yalica,

cambaj shungutara alichingui.

Shungumandami causaica llujshijun.

24Cambaj shimihuan jatun nalita rimanataca saquingui.

Cambaj shimihuan nalita rimanatapash jarcaringui.

25Cambaj ñavihuambash, aligutalla ricungui.

Imata cashpapash, ñaupajman ricushpa catingui.

26Can saruna chaqui ñandapash,

imashna cajta ali ricungui.

Tucui imata rurashpapash, aligutalla rurangui.

27Ali ladomambash, lluqui ladomambash ama anchuringuichu.

Cambaj chaquitaca, ima nalimandapash anchuchingui.