EZEQUIEL 25 - Quichua Imbabura Bible

Amón shuti llactata llaquichinatami villashca

1Mandaj Diosca, cai shimicunatami cashna nishpa villahuarca:

2“Huañuna aichayu runa. Amonitacunata ricushpa, paicunata llaquichinata villagri.

3Amonitacunataca, cashna ningui: Mandaj Jatun Dios rimashcata uyaichi. Mandaj Jatun Diosca, cashnami nin: ‘Cangunaca, ñucapajlla huasita yangapi churashcatapash, Israel llactata llaquinayaita tucuchishcatapash, Judá llactapi causajcuna prezu apai tucushcatapash: ¡Alita chashna tucurca! nishpami cushijurcanguichi.

4Chaimandami cangunataca, indi llujshimuj ladopi causajcuna japichun cushpa saquisha. Cangunapaj llactapica corralcunata, carpacunatami shayachinajunga. Canguna tarpushca granocunatapash paicunami micunga, lechetapash paicunami ufianajunga.

5Rabá shuti pueblotaca, camellocuna causachunmi saquisha. Amón llactataca, llamacunata michina pambatami rurasha. Shina rurajpimi ñucataca, Mandaj Dios cajta yachanguichi’ ninmi nishpa villangui” nihuarcami.

6Mandaj Jatun Diosca, cashnatapashmi nijurca: “Israel llactataca, tucui alma ninandapacha nalicachishpami, maquita huactarishpa, chaquihuan tushurishpa ninanda cushijurcanguichi.

7Ricui, shina rurashcamandami, ñuca maquita chutashpa cangunatapash llaquichisha. Shinallata canguna imata charishcatapash quichushpa apachunmi, shuj llactacunapi causajcunapaj maquipi churasha. Cangunataca, shuj gentecunapaj chaupipi causanajujpipash huañuchishpami, shuj llacta chaupicunapi causanajujpipash tucuchisha. Shina tucuchijpimi ñucataca, Mandaj Dios cajta yachanguichi” nijurcami.

Moab shuti llactata llaquichinatami villashca

8Mandaj Jatun Diosca, cashnami nirca: “Moab shuti, Seir shuti llactacunapi causajcunaca, cashnami ninajurca: ‘Ricuichi, Judá llactapica, tucui shuj llactacunashnallatami causanajun’ ninajurcami.

9Ricuichi, chaimandami ñucapash, Moab shuti llacta linderocunataca, pueblocunamanda callarishpa pascasha. Lindero ladollapi tiaj paicunapaj pueblocunamanda callarishpaca, paicuna munashca Bet-jesimot, Baal-meón, Quiriataim shuti pueblocunacamanmi pascasha.

10Indi llujshimuj ladoman causajcunataca, amonitacunahuan macanajuna yuyaitami cusha. Paicunapaj cachunmi, paicunaman cusha. Amonitacunataca, shuj llacta puracunapica, yaritapash ama yarinajuchunmi, chashna rurasha.

11Moab shuti llactapipash, ninandami llaquichisha. Shina rurajpimi ñucataca, Mandaj Dios cajta yachanajunga” nircami.

Edom shuti llactata llaquichinatami villashca

12Mandaj Jatun Diosca, cashnami nirca: “Edom shuti llactapi causajcunaca, paicunata llaquichishcamandami Judá llactapi causajcunataca, imashna llaquichishnallata llaquichinajurca. Paicunataca, imashna llaquichishcashnallata llaquichishpami, yapapacha nalita ruranajurca.

13Chashna cashcamandami, Mandaj Jatun Dios ñucaca, cashna nini: Ñucapash ñuca maquita chutashpami, Edom shuti llactataca llaquichisha. Chai llactapica, runacunatapash, animalcunatapash huañuchishpami, llaquinayaita tucuchishpa saquisha. Temán shuti llactamanda callarishpaca, Dedán shuti llactacunacamanmi espadapi huañunajunga.

14Paicuna llaquichishcashnallata llaquichingapajmi, Edom shuti llactapi causajcunataca, ñuca agllashca israelcunapaj maquipi churasha. Paicunami, Edom shuti llactapi causajcunataca, ñuca ninanda fiñarishpa llaquichingapaj munashcashnallata llaquichinajunga. Shina rurajpimi, ñucataca imashna llaquichishcashnallata llaquichij cajtaca yachanajunga” nijurcami Mandaj Jatun Diosca.

Filisteocunata llaquichinatami villashca

15Mandaj Jatun Diosca, cashnami nirca: “Filisteocunaca, punda fiñanajushcata na cungashpami, llaquichinata yariajlla causanajurca. Chaimandami imashna llaquishcashnallata, ninanda fiñarishpa tucuchinajurca.

16Chashna rurashcamandami Mandaj Dios ñucaca, cashna nini: Ricuichi, filisteocunataca ñuca maquita chutashpa llaquichishpami, cereteocunatapash huañuchisha. Shinallata mama cucha manñapi huaquin puchushcacunatapashmi tucuchisha.

17Paicunataca, nalita ruranamanda jarcashpa rimashpami, ninandapacha fiñarishpa paicuna llaquichishcashnallata llaquichisha. Imashna llaquichishcashnallata llaquichijpimi ñucataca, Mandaj Dios cajta yachanajunga” nircami.